ရှမ်းပြည်နယ်တောင်ပိုင်း မိုးဗြဲမြို့တွင် နင်းမိုင်းထိမှန်၍ ကလေးငယ်သုံးဦး ထိခိုက်ဒဏ်ရာရရှိပြီးတစ်ဦးမှာစိုးရိမ်ရကြောင်း Mobye Rescue Team တာဝန်ရှိသူက ပြောသည်။
မိုးဗြဲမြို့အနောက်ခြမ်းနေရာတစ်ခုတွင် ယမန်နေ့ (နိုဝင်ဘာ ၂၇ ရက်)နေ့လယ်က ဖြစ်ပွားခဲ့သော နင်းမိုင်းပေါက်ကွဲမှုကို Mobye Rescue Teamနှင့် တော်လှန်ရေးမဟာမိတ်များ ပူးပေါင်း၍ သွားရောက် ကယ်ထုတ်ခဲ့ခြင်းဟု ဆိုသည်။
“စိုးရိမ်ရတဲ့ကလေးက ခေါင်းကိုထိတာ။ကျန်တဲ့ကလေးနှစ်ယောက်မှာ တစ်ဦးကပေါင်ထိတယ်။နောက်တစ်ဦးက ခြေထောက်ထိတာ”ဟု အထက်ပါတာဝန်ရှိသူက ရှင်းပြသည်။
ထိုကြောင့် ပြည်သူများအနေဖြင့် ခရီးသွားလာပြုလုပ်ရာတွင် အထူးဂရုစိုက်ဆင်ခြင်ကြရန်Mobye Rescue Teamက သတိပေးသည်။
Public Service Announcement
ရှမ်း – ကယား(ကရင်နီ)ဒေသအစပ်ရှိ စစ်ရေး အရအရေးပါသော မိုးဗြဲမြို့ကို ယခုနှစ်စက်တင်ဘာလဆန်းပိုင်းကစ၍ စစ်ကောင်စီက အင်အားအလွန်အကျွံအသုံးပြု၍ ထိုးစစ်ဆင်ခဲ့သည်။
ထိုးစစ်ဆင်မှုများအတွင်း ဘုရားကျောင်းများနှင့် လူနေရပ်ကွက်များအတွင်းပါ နင်းမိုင်း၊တိုက်မိုင်းများကို အကြမ်းဖက်စစ်တပ်က အသုံးပြုထားသည့် ရုပ်သံဖိုင်မှတ်တမ်းများလည်း ထွက်ပေါ်ခဲ့သည်။
