ကရင်နီ(ကယား)ပြည်နယ်၊ ဘောလခဲမြို့နယ် ထူးချောင်းကျေးရွာရှိ စစ်ကောင်စီတပ်စခန်းကို တိုက်ခိုက်ရာ စစ်ကောင်စီတပ်သားတစ်ဦးသေဆုံးပြီး နှစ်ဦးအပြင်းအထန်ဒဏ်ရာရရှိကြောင်း Karenni Revolution Union (KRU)မှ တာဝန်ရှိသူက ပြောသည်။
နိုဝင်ဘာ ၂၇ရက် နံနက် ၈နာရီခန့်ကစ၍ KRUနှင့် ဘောလခဲပြည်သူ့ကာကွယ် ရေးတပ်(BPDF) တပ်ရင်း(1105)တို့ ပူးပေါင်းကာ ထူးချောင်းစစ်ကောင်စီတပ်စခန်းကို စနိုက်ပါမစ်ရှင် ဖော်ဆောင်တိုက်ခိုက်ခဲ့သည်ဟု ဆိုသည်။
“သုံးနာရီကျော်လောက်ပြင်ဆင်ခဲ့ပြီးမှ တပ်စခန်းကို တိုက်ခဲ့တယ်။ တိုက်ပွဲက ၁၅မိနစ်လောက်ကြာတယ်။ အထိနာတဲ့အချိန် သူတို့ဘက်က လက်နက်ကြီးတွေနဲ့ ပြန်ပစ်တဲ့အချိန် ဆုတ်ခွာခဲ့တာ”ဟု KRU တာဝန်ရှိသူက လူထုနွေဦးသို့ ပြောသည်။
အဆိုပါတိုက်ခိုက်မှုအတွင်း ကရင်နီပူးပေါင်းတပ်များ အထိအခိုက်မရှိခဲ့ကြောင်း အသိပေးသည်။
Public Service Announcement
လက်ရှိ ကရင်နီပြည်နယ်အတွင်း စစ်ကောင်စီက စစ်ရေးအရှိန်မြှင့်တင်ရန် ကြိုးပမ်းမှုများရှိနေ ကြောင်းလည်း ကရင်နီပြည်သူ့ကာကွယ်ရေးတပ်များက သတိပေးထားသည်။
ထို့ကြောင့် တိုက်ပွဲများပြင်းထန်လာနိုင်သည့်အတွက် ပြည်သူများအနေဖြင့် သတိပေးထုတ်ပြန်ချက်များကို နားစွန့်ရန်နှင့် လိုက်နာပေးရန်လည်း ပြည်သူ့ကာကွယ်ရေးတပ်များက တိုက်တွန်းထားသည်။
