KIAဌာနချုပ်နယ်မြေသို့ စစ်ကောင်စီတပ် လေကြောင်းတိုက်ခိုက်ပြီး လက်နက်ကြီးများဖြင့် ပစ်ခတ်

ကချင်လွတ်လပ်ရေးတပ်မတော်(KIA) ဌာနချုပ်နယ်မြေသို့ စစ်ကောင်စီတပ်က ယခုရက်ပိုင်းအတွင်း လေကြောင်းမှ ဗုံးကြဲတိုက်ခိုက်မှု ခပ်စိပ်စိပ် လုပ်ဆောင်နေပြီး လက်နက်ကြီးပစ်ခတ်မှု ဆက်တိုက် လုပ်ဆောင်လျက်ရှိကြောင်း KIA သတင်းပြန်ကြားရေးဌာနက အသိပေးသည်။

ဒီဇင်ဘာ ၁၇ရက်မှ ၂၀ရက်အတွင်း စစ်ကောင်စီတပ်က လေကြောင်းမှဗုံးကြဲခြင်း၊ လက်နက်ကြီးဖြင့် ပစ်ခတ်မှုအခြေနေများကို ဖော်ပြခဲ့သည်။

ဒီဇင်ဘာ ၂၀ရက်တွင် မန္တလေးမြို့ တံတားဦး လေတပ်စခန်းမှ ဂျက်တိုက်လေယာဉ် နှစ်စီးဖြင့် KIA ဌာနချုပ်နယ်မြေရှိ ကျေးရွာအနီးသို့လာရောက် ဗုံးကြဲတိုက်ခိုက်ခဲ့ကြောင်း KIAက ဆိုသည်။

ဒီဇင်ဘာ ၁၉ရက်တွင်လည်း ခါရာဘွမ် နှင့် ဘွမ်ရယ်ဘွမ်တွင်တပ်စွဲနေရာယူထားသည့် စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ လက်နက်ကြီးများဖြင့် ရမ်းသမ်းပစ်ခတ်ခဲ့၍ မုန်လိုင်ခတ်ကျေးရွာအနီး ကျရောက်ပေါက်ကွဲခဲ့သည်ဟု ဆိုသည်။

Public Service Announcement

ထို့ပြင် ဒီဇင်ဘာ ၁၇ရက် နံနက် ၁နာရီခန့်တွင်လည်း တိုက်လေယာဉ် နှစ်စီးဖြင့် KIA ဌာနချုပ် နယ်မြေသို့ ဗုံးကြဲတိုက်ခိုက်ခဲ့ရာ ထိခိုက်မှု မရှိကြောင်း ဖော်ပြထားသည်။

စစ်ကောင်စီတပ်က လက်နက်ကြီးပစ်ခတ်မှု၊ လေကြောင်း တိုက်ခိုက်မှုများဖြင့် အရပ်သားရှိရာ ကျေးရွာအနီး ကျရောက်ပေါက်ကွဲမှုများရှိလာ၍ ဒေသခံများ စိုးရိမ်နေကြရကြောင်း KIA သတင်းပြန်ကြား ရေးဌာနက အသိပေးထားသည်။