▪︎ရဟတ်ယာဉ်ဟန့်တားနိုင်သည့်လက်နက်များကိုင်တွယ်အသုံးပြုနေ၊ ဂျက်တိုက်လေယာဉ်ဟန့်တားနိုင်မည့် လက်နက်မျိုးရရှိရေးဆက်လက်ကြိုးပမ်းနေဟုအသိပေး
တော်လှန်ရေးအတွက် အကြီးမားဆုံးခြိမ်းခြောက်မှုဖြစ်သည့် ရန်သူစစ်ကောင်စီ၏လေတပ်ကိုဟန့်တားနိုင်ရန်နည်းပေါင်းစုံဖြင့် ကြိုးစားနေကြောင်း အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာနပြည်ထောင်စုဝန်ကြီး ဦးရည်မွန်က ပြောကြားသည်။
နိုင်ငံတကာရောက်နေသောမြန်မာပြည်သူများနှင့် အမျိုးသားညီညွတမရေးအစိုးရ(NUG)မှတာဝန်ရှိသူများဖေဖော်ဝါရီ ၅ ရက်တွင် အွန်လိုင်းမှတွေ့ဆုံ၍ မေးမြန်းဖြေကြားကြသော Myanmar Global Town Hall 2023 “ပြည်သူ့ခုခံတော်လှန်စစ် မေးကြမယ် ဖြေကြမယ် အစီအစဉ်” အစီအစဥ်၌ ဝန်ကြီးက ထိုသို့ ပြောကြားခြင်းဖြစ်သည်။
မြေပြင်တော်လှန်ရေး ရဲဘော်များ ပြောလေ့ရှိသည့် စကားမှာ စစ်ကောင်စီ၌ လေတပ်မရှိပါက တော်လှန်ရေး အနိုင်ရရှိနေပြီဆိုသည့်စကားဖြစ်ကြောင်းNUGဝန်ကြီးကပြောသည်။
“ကျွန်တော်တို့တော်လှန်ရေးအတွက်အကြီးမားဆုံးခြိမ်းခြောက်မှုကရန်သူရဲ့ လေတပ်။လေတပ်နဲ့အတူတွဲပြီးပါလာတာက လက်နက်ကြီးပေါ့။ ဒီကိစ္စမှာကတော့စစ်ကောင်စီအနေနဲ့ တော်လှန်ရေး အင်အားစုတွေထက်ပိုပြီး အားသာတဲ့အချက်လို့ ပြောလို့ရတယ်။သို့သော်ရန်သူ့လေကြောင်းကို ဟန့်တားတဲ့အခါ နည်းလမ်းတွေက တစ်ခုမက ရှိလိမ့်မယ်လို့ ကျနော်တို့ မြင်ပါတယ်” ဟု ကာကွယ်ရေးဝန်ကြီးကပြောသည်။
Public Service Announcement
အဆိုပါ နည်းလမ်းများအနက် လေယာဉ်ပစ် လက်နက်ရရှိရေးအတွက် အမျိုးသားညီညွတ်ရေး အစိုးရက နည်းလမ်းစုံဖြင့် ကြိုးစားနေကြောင်း ၎င်း ကဆိုသည်။လေကြောင်းဟုဆိုရာတွင်လေယာဉ်နှင့်ရဟတ်ယာဉ်ကိုခွဲခြားပြီးစဉ်းစားရန်လိုကြောင်းလည်းဆက်ပြောသည်။
“တော်လှန်ရေးအဖွဲ့အစည်းတွေအနေနဲ့ဂျက်တိုက်လေယာဉ်တွေကို ဟန့်တားဖို့ အခက်အခဲရှိနေသည် ဆိုသည့် တိုင်အောင် ရန်သူရဲ့ ထောက်ပို့အဖြစ်ရော တိုက်ခိုက်ရေးအတွက်ပါ သုံးနေတဲ့ ရဟတ်ယာဉ်မျိုးကို ကျနော်တို့ ဟန့် တားနိုင်ဖိုပ ထိန်းချုပ်နိုင်ဖို့ ထိုက်သင့်တဲ့ စစ်လက်နက်ပစ္စည်းများကိုတော့ ကိုင်တွယ်အသုံးပြု နိုင်နေပြီ ဆိုတာကို ကျွန်တော်တစ်ပါတည်း အသိပေးလိုပါတယ်။တချိန်တည်းမှာ ဂျက်တိုက်လေယာဉ်တွေကို ဟန့်တား နိုင်မယ့် လက်နက်မျိုးတွေ ရရှိရေးလည်း ဆက်တိုက်ကြိုးစားဆောင်ရွက်နေပါတယ်” ဟု၎င်းကပြောသည်။
စစ်ကိုင်းတိုင်းမှ ပြည်သူတစ်ဦးက “လေယာဥ်တွေပစ်နိုင်ရင် ကောင်းတာပေါ့။ အောက်ကနေစစ်ကြောင်းတွေထိုးလိုက် မီးရှို့လိုက်၊ အပေါ်ကနေ လေယာဥ်နဲ့လာပစ်လိုက်နဲ့ ကိုယ့်မှာလေယာဥ်ပစ်စရာမရှိတော့ ပြန်ပြေးရလိုက်နဲ့ အဆင်မပြေဘူး။ အခုလေယာဥ်ပစ်လက်နက်ရှိတော့ အနည်းအကျဥ်းပေါ့ တော်ရုံနဲ့လေယာဥ်ဝင်မလာရဲဘူးပေါ့။ စစ်ကိုင်းတိုင်းသုံးလေးနေရာလောက် ကောင်းကောင်းလေးရှိရင်အဆင်ပြေပြီ။”ဟုပြောသည်။
အခြားပြည်သူတစ်ဦးကလည်း “လေယာဉ်ပစ်သာရရင် ဟိုကောင်တွေ တက်ရဲမှာမဟုတ်တော့ဘူး။လေယာဉ်ပစ်မရှိပဲ ရှိတယ်လို့မပြောစေချင်ဘူး။အဲ့လိုပြောရင် ဟိုလူတွေက ရီမှာ။
ရှိတယ်ဆိုရင် တစီးလောက်ပစ်ချနိုင်ပြီဆိုမှထုတ်ရှိုးတာပိုကောင်းတယ်။ငါတို့မှာဒါရှိတယ် တက်ရဲရင်တက်ခဲ့လို့ပြောလိုက်တာပိုကောင်း။သူတို့သိတာထက် ပြည်သူတွေအမြင်ရှင်းဖို့လိုတယ်။တခြားနိုင်ငံတကာကန့်သတ်ချက်ရှိရင်တော့ ရှိတယ်ဆိုတာမကြေညာတာကောင်းတယ်။အဓိကက ငှက်ကင်နိုင်ဖို့ပဲလိုတယ်။”ဟုပြောသည်။
ဖေဖော်ဝါရီ ၁ ရက်ကစတင်သော ဟုမ္မလင်းမြို့နယ် ၊ရွှေပြည်အေးမြို့သိမ်းတိုက်ပွဲတွင် စစ်ကောင်စီတပ်က အထိနာလာပြီးနောက် လေကြောင်းတိုက်ခိုက်မှုများပြုလုပ်လာရာဖေဖော်ဝါရီ ၃ ရက်ညနေပိုင်းတွင် PDF များက စစ်ကောင်စီတပ်၏ Mi-17 ရဟတ်ယာဥ်တစ်စီးကိုပစ်ချခဲ့သည်။နွေဦးတော်လှန်ရေးတွင် PDFများကစစ်ကောင်စီ ရဟတ်ယာဥ်ကိုပစ်ချနိုင်မှုမှာ ပထမဆုံးအကြိမ်ဖြစ်သည်။ ထိုPDF များသည် KIA ကလေ့ကျင့်ပေးထားသော KPDF တပ်ဖွဲ့ဝင်များဖြစ်ကြောင်းလည်း KIO/KIA ပြန်ကြားရေးကအသိပေးထားသည်။
အခြားနည်းလမ်းများကိုလည်း တစ်ပြိုင်တည်း ပြင်ဆင်ဆောင်ရွက်နေသည်ဟုလည်းဆိုသည်။ နိုင်ငံတကာ၏ ပါဝင်မှု ပိုအားကောင်းလာပါကNo Fly Zone သတ်မှတ်ပေးလာခြင်းအထိမျှော်လင့်လို့ရကြောင်းလည်း ကာကွယ်ရေးဝန်ကြီးကပြောသည်။
“ဒီအတွက်လည်း အားလုံး ဝိုင်းပြီး ကြိုးစားရမှာ ဖြစ်တယ်” ဟု ဦးရည်မွန်ကပြောသည်။
မည်သည့် လေတပ်ကလေယာဉ်မည်မှထွက်ခွာသည်ဆိုသည့်သတင်းအချက်အလက်များကို အချိန်နှင့်တပြေးညီ ရယူကာ မြေပြင်က တော်လှန်ရေး အင်အားစုများကို သတင်းဖြန့်ဝေနိုင်ရေး စနစ် ဖော်ဆောင်နိုင်ရန် ညှိနှိုင်းပူးပေါင်းဆောင်ရွက်နေသည်ဟုလည်းဆိုသည်။ထို့အတွက်လိုအပ်သည့်စက်ပစ္စည်းဆိုင်ရာ များ နိုင်ငံတကာဘက်မှ အကူအညီ ရရအောင် ကြိုးစားနေသည်ဟုပြောသည်။
ထို့အပြင်လေကြောင်းအန္တရာယ်အတွက်ကာကွယ်ရေး၌ အရေးကြီးသည့် ပြင်ဆင်ဆောင်ရွက်ရမည့် ကိစ္စတစ်ခု ဖြစ်သည်။
“ကျွန်တော်တို့ ရဲဘော်တွေအနေနဲ့လေကြောင်းတိုက်ခိုက်မှုကို ရုတ်တရက် အကာအကွယ်ပြုနိုင်ဖို့ လိုအပ်တဲ့ကတုတ်တွေ၊ ဗုံးခိုကျင်းတွေ၊ လှိုဏ်တွေ ဒီတည်ဆောက်ရေးကိုလည်း ဆက်တိုက်တွန်းအားပေးပြီး ဆောင်ရွက်နေတာရှိတယ်။” ဟုကာကွယ်ရေးဝန်ကြီးကပြောသည်။
တစ်ဖက်တွင်လည်း စစ်ကောင်စီအား လေယာဉ်ဆီဖြတ်တောက်ပိတ်ဆို့နိုင်ရေး တော်လှန်ရေးအင်အားစုများက ကြိုးပမ်းနေသည်။ KNU ပြောရေးဆိုခွင့်ရှိသူ ပဒိုစောတောနီးကလည်း People’s Spring နှင့်သီးသန့်အင်တာဗျူးတွင် လေယာဥ်ဆီဖြတ်တောက်နိုင်ပါက စစ်ကောင်စီကိုအမြစ်ဖြတ်ချေမှုန်းရန်လွယ်ကူသွားပြီဟုပြောသည်။
“လက်ရှိမှာ စစ်ကောင်စီ ပြုတ်ကျရေးအတွက် လုပ်ဖို့ လိုအပ်နေတဲ့အပိုင်းတွေက စစ်ရေးဘက်မှာ နေ့စဉ်နဲ့အမျှ ဗုံးကြဲသတ်ဖြတ်နေတဲ့ဟာ အထူး သဖြင့် ဘာနဲ့ တူသလဲဆိုရင် မြွေတစ်ကောင်ကို ခေါင်းဖြတ်ပစ်လိုက်ဖို့ လိုအပ်တယ်ဆိုတာ ကျွန်တော်တို့က လုံးပမ်းနေတာ။ ဘာလဲဆိုတော့ ဒီစစ်လေယာဉ်ပျံတွေရဲ့လေယာဉ်ဆီကို ဖြတ်တောက်နိုင်ရေးပဲ။ အဲဒါက အခက်အခဲတော့အများကြီးရှိတယ်။ သို့သော်
ငြားလည်းပဲ ကျွန်တော်တို့ အချိတ်အဆက်တွေ ဒီထက်ပိုပြီးတော့ သက်ရောက်မှုရှိအောင် ထိရောက်မှု ပိုရှိအောင် ဆက်လုပ်သွားဖို့ရှိတယ်။ အဲဒါကနေ လေယာဉ်ဆီ ဖြတ်တောက်နိုင်ပြီဆိုရင် မြွေတစ်ကောင်ကို ခေါင်းဖြတ်လိုက်တာနဲ့အတူတူပဲ”ဟုKNU ပြောရေးဆိုခွင့်ရှိသူကပြောသည်။
