ဘဝများ၊ အသက်များရင်းကာ (၂)နှစ်ကျော်လာသည်အထိ ကြံ့ကြံ့ခံပြီး ဆက်လက်တိုက်ပွဲဝင်နေကြသည့် CDM များကို DPNS ဂုဏ်ပြုမှတ်တမ်းတင်

တော်လှန်ရေးအပေါ် သစ္စာဖောက်သည့် Non-CDM များ ၎င်းတို့ ကျူးလွန်ခဲ့သော ပြစ်မှုများအရထိုက်သင့်သည့် ပြစ်ဒဏ်များကို ခံယူကြရမည်ဟု သတိပေး

ဒုက္ခအမျိုးမျိုးကို ရင်ဆိုင်အံတုလျက် ဘဝများ၊ အသက်များရင်းကာ (၂)နှစ် ကျော်လာသည်အထိ ကြံ့ကြံ့ခံပြီး ဆက်လက် တိုက်ပွဲဝင်နေကြသည့် CDM များကို ဂုဏ်ပြုမှတ်တမ်းတင်ကြောင်း လူ့ဘောင်သစ်ဒီမိုကရက်တစ်ပါတီ(DPNS)က ယနေ့ ထုတ်ပြန်သည်။

အကြမ်းမဖက် အာဏာဖီဆန်ရေးလှုပ်ရှားမှုတွင် ပါဝင်သူ (CDM)၊ မပါဝင်သူ (Non-CDM) များနှင့် ပတ်သက်၍ DPNS ၏ သဘောထားကို ကြေညာခဲ့ခြင်းဖြစ်သည်။

တော်လှန်ရေးကြီးတွင် မပါဝင်နိုင်သည့် Non-CDM များအနက် တော်လှန်ရေးကြီးကို ဖျက်လိုဖျက်ဆီး ပြုလုပ်သူ၊ စစ်ကောင်စီ၏ အာဏာယန္တယားများတွင် စိတ်ရောကိုယ်ပါ ပါဝင်ဆောင်ရွက်သူ၊ သူလျှိုများ၊ သတင်းပေးများ၊ ဒလန်များအဖြစ် ဆောင်ရွက်နေကြသူများသည် တော်လှန်ရေးအပေါ် သစ္စာဖောက်သူများ ဖြစ်သည်ဟု DPNSက ရှုမြင်ကြောင်း ဖော်ပြသည်။

ထိုကဲ့သို့သော တော်လှန်ရေးအပေါ် သစ္စာဖောက်သူများသည် ပြည်သူလူထုတရပ်လုံးနှင့် တော်လှန်ရေးကြီး၏ ဒဏ်ခတ်မှုကို မုချခံရမည် ဖြစ်ပြီး ၎င်းတို့ကျူးလွန်ခဲ့သော ပြစ်မှုများအရ ထိုက်သင့်သည့် ပြစ်ဒဏ်များကို ခံယူကြရမည်၊ ပြန်လည်ပေးဆပ်ကြရမည် ဖြစ်ကြောင်း DPNS က သတိပေးသည်။

Public Service Announcement

သို့သော် CDM လှုပ်ရှားမှုကြီးတွင် အကြောင်းအမျိုးမျိုးကြောင့် လက်တွေ့ကျကျ မပါဝင်နိုင်သေးသူ Non-CDM များအနက် အများစုကြီးသည် စစ်အာဏာရှင်စနစ် အကုန်အစင်ဖျက်သိမ်းရေး တိုက်ပွဲကြီးတွင် တနည်းမဟုတ် တနည်း တိုက်ရိုက်ဖြစ်စေ၊ သွယ်ဝိုက်ဖြစ်စေ ပါဝင်နိုင်သည့် နည်းသဏ္ဍာန်များဖြင့် ပါဝင်နေကြသည်ဟု DPNS က သိမြင်နားလည်ကြောင်း ဖော်ပြသည်။ နိုင်သမျှအားဖြင့် ယခုကဲ့သို့ ပါဝင်နေမှုများအပေါ်လည်း တန်ဖိုးထားပြီး ယခုကဲ့သို့ ပိုမို အရေးကြီးလာသည့် ကာလတွင် အတတ်နိုင်ဆုံး ပိုမို အားစိုက်ပါဝင်ပေးကြရန် အလေးအနက် တိုက်တွန်း ပန်ကြားထားသည်။