နေပြည်တော်တရားရုံးမှာရုံးထုတ်ပြီး ရမည်းသင်းအချုပ်ထောင်ကိုအပြန် ထွက်ပြေးသွားတဲ့ အချုပ်သား ၉ ဦး ကို တောနင်းရှာဖွေရာအသေမိသူ ၁ဦးအပါအဝင် စုစုပေါင်း ၄ ဦးပြန်မိတယ်လို့ စစ်ကောင်စီ လက်အောက်ခံ ရဲအသိုင်းအဝိုင်းဆီကသိရပါတယ်။
အချုပ်ကားပေါ်ကနေ အချုပ်သား ၉ ဦး ထွက်ပြေးတာဟာ မတ်လ ၁ ရက် ညနေပိုင်း ၅ နာရီဝန်းကျင်က ရန်ကုန် − မန္တလေး လမ်းဟောင်း နေပြည်တော် တပ်ကုန်းမြို့နယ်ထဲမှာ ဖြစ်ပွားခဲ့တာပါ။
ဖြစ်စဉ်ကို စစ်အုပ်စုရဲ့ ထုတ်ပြန်မှုမှာ အချုပ်သားတွေဟာ အချုပ်ကားနောက်ခန်းမှာ အစောင့်ပါလာတဲ့ ရဲဆီက သေနတ်လုကာ ပစ်ခတ်ပြီး ထွက်ပြေးသွားတာလို့ ဖော်ပြပါတယ်။
ပစ်ခတ်မှုကြောင့် ရဲတစ်ဦးရင်ဘတ်ကျည်မှန်ပြီး စိုးရိမ် ရပေမယ့် အချုပ်သားတွေ လုသွားတဲ့ သေနတ်ကို လုံးထွေး ပြန်လုရာမှာ ပြန်ရခဲ့တယ်လို့ စစ်ကောင်စီရဲ့သတင်းထုတ်ပြန်ချက်မှာတွေ့ရပါတယ်။
Public Service Announcement
အခင်းဖြစ်ပြီးနောက် စစ်ကောင်စီတပ်က ပိတ်ဆို့ရှာဖွေရာ နေပြည်တော် တပ်ကုန်းမြို့နယ်အတွင်း သဲဖြူကျေးရွာနဲ့ ရွှေစုကျေးရွာကြား ပြောင်းခင်းမှာတင် ၄ ဦး မိပြီး ခဲ့တယ်လို့ သိရပါတယ်။
အဲဒီ ၄ဦးထဲမှာ ၁ ဦး ကိုပစ်ခတ်ဖမ်းဆီးရာ သေဆုံးသွားတယ်လို့ စစ်ကောင်စီက ဆိုထားပါတယ်။
သေဆုံးသွားသူဟာ အသက် ၁၉ နှစ်အရွယ် လူငယ်ဖြစ်ပါတယ်။ကျန်တဲ့ ၅ ဦးကတော့ လွတ်မြောက်နေဆဲလို့သိရပါတယ်။
ပြီးခဲ့တဲ့ နှစ် စက်တင်ဘာလကုန်ပိုင်းက မန္တလေးမြို့ မြစ်ငယ်နားမှာ ကျောက်ဆည်ကနေ အိုးဘိုထောင်ကိုသွားတဲ့ နိုင်ငံရေးအကျဉ်းသားတွေသယ်လာတဲ့အချုပ်ကားကိုတော်လှန်ရေးအဖွဲ့ က ကြားဖြတ်တိုက်ခိုက်ပြီးကယ်ထုတ်ခဲ့တာမျိုးရှိခဲ့ပါတယ်။
အဲဒီဖြစ်စဉ်မှာတော့ စစ်ကောင်စီလက်အောက်ခံ ရဲ၂ ဦး သေပြီး အချုပ်သား ၈ ဦးထွက်ပြေးနိုင်ခဲ့ပေမယ့် ၆ ဦးပြန်ဖမ်းခံခဲ့ရပါတယ်။
ဓာတ်ပုံ − ရိုက်တာ
