စက်တင်ဘာ- ၂၁၊၂၀၂၆။မိုမို/People’s Spring
နေပြည်တော်၊ တပ်ကုန်းမြို့နဲ့ မကွေးတိုင်း မြို့သစ်မြို့က ဒေသခံတွေဆီက WY စိတ်ကြွဆေးပြား ၂၀၀၀၀ ကျော် ဖမ်းဆီးရမိတယ်လို့ နတ်မောက်ဂဠုန် PDF တပ်ဖွဲ့တာ၀န်ရှိသူက ပြောပါတယ်။
ပြီးခဲ့တဲ့စက်တင်ဘာ ၁၉ ရက် ညနေက နယ်မြေရှင်းလင်းစစ်ဆေးချိန်မှာ WY စိတ်ကြွရူးသွပ်ဆေး ၂၀၀၀၀ ကျော် ၊ ဘိန်းမဲ ၂ပိဿာကျော် နဲ့ ဆက်စပ်ပစ္စည်းတွေ သိမ်းဆည်းရမိတာလို့ ဆိုပါတယ်။
ဖမ်းဆီးရမိမှုဖြစ်စဉ်တွေအရ တပ်ကုန်းမြို့ တည်ပင်ကျေးရွာ နဲ့ မြို့သစ်မြို့ ချားပင်ရေကျေးရွာနေသူ ၇ဦးကို မူးယစ်ဆေးဝါးတွေနဲ့ ဖမ်းမိမှု ဖြစ်စဉ်ကို စစ်ဆေးနေတယ်လို့ အသိပေးပါတယ်။
Public Service Announcement
“နောက်ကွယ်မှာဘယ်သူတွေ ပါ၀င်နေသလဲဆိုတာ စစ်ဆေးနေတယ်။သိရတာအချက်အလက်တွေကို ထုတ်ပြန်အသိပေးမယ်”လို့ နတ်မောက်ဂဠုန် PDF တပ်ဖွဲ့တာ၀န်ရှိသူက ပြောပါတယ်။
မြန်မာနိုင်ငံဟာ ကမ္ဘာ့တရားမဝင် မူးယစ်ဆေးဝါး အဓိကထုတ်လုပ်ရာနဲ့ သယ်ယူဖြန့်ဖြူးရာ နိုင်ငံတစ်ခုအဖြစ် အမေရိကန်ရဲ့ Blacklist စာရင်း မှာ ပြီးခဲ့တဲ့ရက်ပိုင်းက ထည့်သွင်းခံထားရပါတယ်။
စစ်တပ်အာဏာသိမ်းပြီးနောက်ပိုင်း မူးယစ်ဆေးဝါး ထုတ်လုပ်မှုနဲ့ သယ်ဆောင်မှု ပြဿနာတွေက ပြည်တွင်းသာမက ဒေသတွင်းနိုင်ငံတွေအထိ ပိုမိုဆိုးရွားလာနေတယ်လို့ ဆိုပါတယ်။
တဖက်မှာလည်း တော်လှန်ရေးနယ်မြေတွေအတွင်း မူးယစ်ဆေးဝါး ရောင်းဝယ်တာနဲ့ သုံးစွဲတာကို အမျိုးသားညီညွတ်ရေးအစိုးရ(NUG)က တင်ကြပ်စွာ တားမြစ်ကန့်သတ်ထားပါတယ်။ဒါ့အပြင် မူးယစ်ဆေးနဲ့ တော်လှန်ရေးမလုပ်ဘူးလို့လည်း ကြေညာထားပါတယ်။
