စစ်ကိုင်းတွင် စစ်ကောင်စီတပ်က စစ်ကြောင်းထိုးမီးရှို့သတ်ဖြတ်နေ၍ ရွာပေါင်း ၂၀နီးပါး ထွက်ပြေးတိမ်းရှောင်နေရ

ဒေသခံပြည်သူ ခုနှစ်ဦးအား သတ်ဖြတ်သွားဟုဆို

စစ်ကိုင်းတိုင်း၊ စစ်ကိုင်းမြို့နယ်တွင် စစ်ကောင်စီတပ်က စစ်ကြောင်းထိုးမီးရှို့သတ်ဖြတ်နေ၍ ကျေးရွာပေါင်း ၂၀နီးပါး ထွက်ပြေးတိမ်းရှောင်နေရပြီး ၎င်းတို့အား တန်ပြန်တိုက်ခိုက်နေကြောင်း ဒေသကာကွယ်ရေးအဖွဲ့များက ပြောသည်။

ယမန်နေ့ (ဧပြီ ၃၀ ရက်) နံနက်ပိုင်းမှစ​၍ စစ်ကောင်စီတပ်သည် စစ်ကိုင်းမြို့နယ် လယ်ကြီးရွာ၊ သုံးလင့်ရွာနှင့် တစ်အိမ်တည်းရွာများကို စစ်ကြောင်းထိုးဝင်ရောက်ခဲ့၍ အနီးပတ်ဝန်းကျင်ရှိကျေးရွာပေါင်း၂၀ နီးပါး ထွက်ပြေးတိမ်းရှောင်နေရခြင်းဟု ဒေသခံများက ပြောသည်။

“နယ်မြေခံတွေပြောကြားချက်အရ ထွက်ပြေးတိမ်းရှောင်နေတဲ့ ပြည်သူ ခုနစ်ဦး သတ်ဖြတ်ခံခဲ့ရတယ်လို့သတင်းရရှိပါတယ်။”ဟု တိုက်နယ်စွန် PDF အဖွဲ့တာဝန်ခံက ပြောသည်။

ထို့အပြင် ပြည်သူ နှစ်ဦး၏ ရုပ်အလောင်းအား လက်တလောတွေ့ရှိထားပြီး တစ်ဦးမှာ ဒေသကာကွယ်ရေးရဲဘော်တစ်ဦးပါဝင်ကြောင်း ဒေသခံအချို့က ပြောသည်။

Public Service Announcement

ယနေ့ (မေလ ၁ ရက်)တွင် လယ်ကြီးရွာနှင့် ရွာမကြား၌ စစ်ကောင်စီတပ်နှင့်​ဒေသတွင်းကာကွယ်ရေးအဖွဲ့များ တိုက်ပွဲဖြစ်ပွားခဲ့ကြောင်း ​ဒေသကာကွယ်ရေးအဖွဲ့များက ပြောသည်။

ထို့နောက် စစ်ကောင်စီတပ်က တစ်အိမ်တည်းကျေးရွာသို့ ဝင်ရောက်ပြီး စက်လက်နှင့် ပစ်ခတ်ပြီးနောက် မီးရှို့ဖျက်ဆီးသွားကြောင်း ဒေသခံများက ပြောသည်။

အဆိုပါ စစ်ကြောင်းနောက်ပြန်လှည့်လာစေရန် နံနက် ၈နာရီခွဲခန့်တွင် မဟာမိတ်အဖွဲ့က ညောင်ပင်ဝန်းရဲစခန်းကို လက်နက်ကြီးဖြင့် သွားရောက်ပစ်ခတ်ခဲ့ကြောင်း တိုက်နယ်စွန် PDFအဖွဲ့က ပြောသည်။