မုန်တိုင်းဒဏ်သင့် ချင်းပြည်သူများအတွက် အမိုးအကာ၊ စားနပ်ရိက္ခာနှင့် ဆေးဝါးထောက်ပံပေးနိုင်ကြောင်း ICNCC အသိပေး

ချင်းပြည် (၈)မြို့နယ်၌ ထိခိုက်ပျက်စီးသည့် နေအိမ်အဆောက်အဦး သုံးထောင်ကျော်ရှိပြီး စပါးကျီ ၂၅၀ကျော် ပါဝင်

ချင်းပြည်နယ်အတွင်း မုန်တိုင်းကြောင့် ထိခိုက်ပျက်စီးသည့်နေအိမ်အဆောက်အဦး သုံးထောင်ကျော်ရှိရာ အမိုးအကာ၊ စားနပ်ရိက္ခာနှင့် ဆေးဝါးများ ထောက်ပံ့ပေးနိုင်ကြောင်း ကြားကာလချင်းအမျိုးသားအတိုင်ပင်ခံကောင်စီ(ICNCC)က ယနေ့ ထုတ်ပြန်သည်။

မေလ ၂၃ရက်အထိ ရရှိခဲ့သည့် မိုခါမုန်တိုင်းကြောင့် ချင်းပြည်နယ်အတွင်း ထိခိုက်ပျက်စီးမှု အခြေအနေကို ICNCCက အသိပေးခဲ့ခြင်းဖြစ်သည်။

ချင်းပြည်နယ်ရှိ မိုခါမုန်တိုင်းဘေးသင့်ခဲ့သည့် မြို့နယ်များ၌ ပျက်စီးသွားသည့် လူနေအိမ်များနှင့် အခြားအဆောက်အဦးများ ပြန်လည်ပြုပြင်ရန် အိမ်မိုးသွပ်ပြားများ၊ အိမ်ရိုက်သံများ မိုးကာများနှင့် တာလပတ်များ အရေးပေါ်လိုအပ်နေကြောင်း ဖော်ပြသည်။

ကျေးရွာများရှိ စပါးကျီများ ပျက်စီးသွားသည့် ဒေသများအတွက် ဆန်ရိက္ခာများနှင့် အခြေခံစားသောက်ကုန်များ၊ အခြေခံ အိမ်သုံးဆေးဝါးများ လိုအပ်နေကြောင်း အသိပေးခဲ့ပြီး ထောက်ပံ့ကူညီပေးလိုသည့် ပြည်တွင်း ပြည်ပရှိ အလှူရှင် အဖွဲ့အစည်းများအနေဖြင့် ICNCC သို့ ဆက်သွယ်နိုင်ကြောင်း လိပ်စာများ ထုတ်ပြန်သည်။

Public Service Announcement

ချင်းပြည်နယ်တွင် မြို့နယ် (၉)ခုရှိသည့်အနက် မုန်တိုင်းကြောင့် မြို့နယ် (၈)ခုတွင် ထိခိုက်ပျက်စီးမှုများရှိသည် တွန်းဇံမြို့နယ်မှအပ ကျန်မြို့နယ်များ၌ ထိခိုက်ပျက်စီးမှုများရှိခဲ့ရာ မတူပီနှင့် မင်းတပ် ၊ ပလက်၀မြို့နယ်များသည် ထိခိုက်ပျက်စီးမှု အများဆုံးဖြစ်ပြီးကျန်သည့် ကန်ပက်လက်၊ တီးတိန်၊ ထန်တလန်၊ ဖလမ်း၊ ဟားခါးမြို့နယ်များ၌လည်း အပျက်အစီးများရှိခဲ့သည်။

စပါးကျီများ ပျက်စီးမှုအများဆုံးဖြစ်ခဲ့သည့် မင်းတပ်မြို့နယ်ဒေသခံက စားနပ်ရိက္ခာ အကူအညီများ ပံ့ပိုးပေးရန် တောင်းဆိုထားသည်။ မင်းတပ်တွင် စပါးကျီ ၁၇၉လုံး ပျက်စီးခဲ့သည်။

မတူပီ CDF တာဝန်ရှိသူကမူ ၎င်းတို့ဒေသ၌ CDF တပ်ဖွဲ့စခန်းများနှင့် ပြည်သူလူထုနေအိမ်များ ပျက်စီးမှုများခဲ့ရာ အမိုးအကာများအတွက်အရေးပေါ် ကူညီပေးရန် တောင်းဆိုထားသည်။