မင်းတပ်နှင့်​ကျောက်ထုကြား စစ်​ကောင်စီတပ်ယာဥ်တန်းတိုက်ခိုက်ခံရစဥ် စစ်တပ်က​လေ​ကြောင်းမှစစ်​ကူ​ပေး

မင်းတပ်နှင့်ကျောက်ထုမြို့ကြားသို့ရောက်နေသော စစ်ကောင်စီယာဉ်တန်းနှင့်ခြေလျင်စစ်ကြောင်းကို ပြည်သူ့ကာကွယ်ရေးမဟာမိတ်တပ်ဖွဲ့များက ပိတ်ဆို့တိုက်ခိုက်စဉ် စစ်ကောင်စီတပ်က လေကြောင်းမှ ဂျက်ဖိုက်တာ နှစ်စီးဖြင့် လာရောက် တိုက်ခိုက်သွားကြောင်း ​ဒေသခံ​ကာကွယ်​ရေးတပ်ဖွဲ့ဝင်များက​ပြောသည်။

“ဂျက်ဖိုက်တာနှစ်စီးနဲ့လာပစ်တာပါ။ မြေပြင်အခြေအနေကို မသိရသေးပါဘူး” ဟုကျောက်ထုမြို့နယ်မှ ပြည်သူ့ကာကွယ်ရေးရဲဘော်တစ်ဦးကပြောသည်။

စစ်ကောင်စီရိက္ခာတင်ကား ၉ စီးနှင့် အင်အား ၂၀၀ ကျော် လုံခြုံရေးယူထားသော စစ်ကောင်စီခြေလျင်စစ်ကြောင်းကို ပြည်သူ့ကာကွယ်ရေးတပ်ဖွဲ့များက ယနေ့ (ဇွန်လ ၂၆ရက်) နံနက်အစောပိုင်းတွင် တိုက်ခိုက်ခဲ့ခြင်းဟုသိရသည်။ မြေပြင်တွင် ပိတ်မိနေစဉ် စစ်ကောင်စီတပ်က နံနက် ၉ နာရီ ၃၀ မိနစ်တွင် ဂျက်ဖိုက်တာ ဖြင့် ဗုံးကြဲသွားသည်ဟု မင်းတပ်CDF မှ ရဲဘော်တစ်ဦးကလည်း အတည်ပြုသည် ။တိုက်ပွဲနှင့် ​​လေ​ကြောင်းတိုက်ခိုက်မှု​ကြောင့်ထိခိုက်မှုအခြေအနေကို မသိရသေးပေ။

ယ​နေ့(ဇွန် ၂၆ )နံနက်ပိုင်းတွင် ​တံတားဦး ၊​နေပြည်​တော် ၊​တောင်ငူ ၊နန့်ဆန်မှ ဂျက်တိုက်​လေယာဥ်များဆက်တိုက်ပျံသန်း​နေသည်ကို စစ်တပ်​လေ​ကြောင်း​စောင့်ကြည့်​ရေးသတင်းရင်းမြစ်များမှ သိရသည်။

Public Service Announcement

တံတားဦး​လေတပ်မှ အ​နောက်​မြောက်ဖက်အရပ်သို့ ဂျက်ဖိုက်တာ ၁ စင်းမှာ ၉ နာရီ ၂၃ မိနစ်တွင်ပျံသန်းသလို ၊ ၁၀ နာရီ ၄၉ မိနစ်တွင် တစ်စင်း ၊ ၁၁ နာရီ ၂၇ မိနစ်တွင် ၂ စင်း ဆက်လက်ပျံသန်း​ကြောင်း Enemy Air Route ချန်နယ်က​ဖော်ပြထားသည်။

ထိုအပြင် တံတားဦး​လေတပ်မှ ပင် ​မြောက်ဘက်သို့ တိုက်​လေယာဥ်တစ်စီး၉ နာရီ ၃၆ မိနစ်တွင် ၂ စင်း ပျံတက်သွားသည်။

ပခုက္ကူမှ ထွက်လာသော အဆိုပါစစ်ကောင်စီယာဉ်တန်းနှင့် ခြေလျင်စစ်ကြောင်းသည် ကျောက်ထုမြို့နယ်သို့ ဇွန်လ ၂၀ ရက်တွင် ရောက်ရှိလာခြင်းဖြစ်သည်။ ယနေ့တွင် ထီးလင်းမြို့ဖက်သို့ ဆက်လက်ဦးတည်နေစဉ် ပြည်သူ့ကာကွယ်ရေးမဟာမိတ်တပ်ဖွဲ့များက တိုက်ခိုက်ခဲ့ခြင်း​ဖြစ်​ကြောင်းသိရသည်။

စစ်ကောင်စီယာဥ်တန်းတွင်ခုနှစ်စီးတွင် ထောက်ပို့ပစ္စည်းများတင်ဆောင်လာပြီးနှစ်စီးတွင် စစ်ကောင်စီ အရာရှိအချို့လည်းလိုက်ပါလာသည်ဟု ပြည်သူ့ကာကွယ်ရေးရဲဘော်များက သတင်းရရှိထားသည်။

လတ်တလောတွင် ကျောက်ထု-ထီးလင်းလမ်းပိုင်း၌ ‌လမ်းတလျောက်ဒေသခံများ သတိရှိကြရန် ပြည်သူ့ကာကွယ်ရေးတပ်ဖွဲ့များက သတိပေးထားသည်။