နိုင်ငံရေး အကျဉ်းသားတွေ လွှတ်ပေးဖို့အချက် အာဆီယံသ‌ဘောတူညီချက် ထုတ်ကာနီးမှ ချန်ခဲ့

မြန်မာ့နိုင်ငံရေး အကျပ်အတည်းနဲ့ ပတ်သက်လို့ ဧပြီ ၂၄ ရက်မှာ အာဆီယံ အဖွဲ့ရဲ့ အထူးအစည်းအဝေးကို ပြုလုပ်ခဲ့ပြီးတဲ့နောက် အဖွဲ့ဝင် နိုင်ငံ အားလုံးရဲ့ ဘုံသဘောတူညီချက် ၅ ခုကို ထုတ်ပြန်ခဲ့ပါတယ်။ အဲဒီထဲမှာ အာဏာသိမ်း မြန်မာစစ်တပ်က ဖမ်းဆီးထားတဲ့ နိုင်ငံရေး အကျဉ်းသား အားလုံး ပြန်လွှတ်ပေးဖို့ဆိုတဲ့ အချက် ပါမလာလို့ စောင့်ကြည့် လေ့လာသူတွေ ကိုယ်တိုင် အံ့ဩခဲ့ကြပါတယ်။

အာဆီယံ ဥက္ကဋ္ဌ ဘရူနိုင်း နိုင်ငံက အဲဒီ ဘုံသဘောတူညီချက်တွေ မထုတ်ပြန်ခင် အစည်းအဝေး တက်ရောက်ခဲ့တဲ့ အင်ဒိုနီးရှား၊ မလေးရှားနဲ့ စင်ကာပူ နိုင်ငံခေါင်းဆောင်တွေက မီဒီယာတွေကို တွေ့ဆုံခဲ့ကြရာမှာ မြန်မာ့ နိုင်ငံရေး အကျဉ်းသားတွေ ပြန်လွှတ်ပေးဖို့ အာဏာသိမ်း စစ်ခေါင်းဆောင် မင်းအောင်လှိုင်ဆီ တောင်းဆိုခဲ့ကြကြောင်း အသီးသီး အတည်ပြုခဲ့ကြပါတယ်။

ဒါပေမဲ့ ဘရူနိုင်းက ဘုံသဘောတူညီချက်တွေ ထုတ်ပြန်တဲ့ အခါ နောက်ဆုံး အချိန်ကျမှ ကပ်ပြီး အဲဒီ အချက်ကို ပြောင်းလဲလိုက်တာလို့ ဒီကိစ္စနဲ့ နီးစပ်တဲ့ သတင်းရင်းမြစ် နှစ်ဦးက ပြောကြားခဲ့ပါတယ်။ အာဆီယံရဲ့ ထုတ်ပြန်ချက်တွေဟာ အာဏာသိမ်း စစ်တပ်ရဲ့ ဆိုးရွားတဲ့ လုပ်ရပ်တွေအပေါ် ပြင်းပြင်းထန်ထန် ဆန့်ကျင်တာမျိုး မရှိတဲ့အတွက် လူ့အခွင့်အရေး လှုပ်ရှားသူတွေ၊ မြန်မာ့ ဒီမိုကရေစီရေး တက်ကြွ လှုပ်ရှားသူတွေအတွက် စိတ်ပျက်စရာ ဖြစ်ခဲ့ပါတယ်။

အာဏာသိမ်းမှုအပြီးမှာ နိုင်ငံရေးသမားတွေ၊ ကျောင်းသားတွေ၊ ဆန္ဒပြသူတွေ အပါအဝင် လူပေါင်း ၃၃၀၀ ကျော်ကို အဖမ်းခံထားရပြီး စစ်တပ်နဲ့ ရဲတွေရဲ့ အင်အားသုံး ပစ်ခတ် ဖြိုခွဲမှုတွေကြောင့် ပြည်သူ ၇၅၀ လောက် အသက်ဆုံးရှုံးခဲ့ရပါတယ်။

Public Service Announcement

မြန်မာ့အရေးနဲ့ ပတ်သက်ပြီး အာဆီယံက ထုတ်ပြန်တဲ့ ဘုံသဘောတူညီချက်မှာ အပြောင်းအလဲ ဖြစ်သွားတဲ့အပေါ် အရှုပ်အထွေး တချို့လည်း ရှိနေပေါတယ်။ မလေးရှား နိုင်ငံခြားရေးဝန်ကြီး ဟီရှမ်မူဒင် ဟူစိန်က နိုင်ငံခေါင်းဆောင်တွေဟာ ဘုံသဘောတူညီချက်ထဲမှာ မြန်မာ့ နိုင်ငံရေး အကျဉ်းသားတွေ ပြန်လွှတ်ပေးဖို့ ထည့်သွင်း သဘောတူခဲ့ကြတယ်လို့ ဧပြီ ၂၅ ရက်က Twitterမှာ ရေးသားထားပါတယ်။

အမည်ဖော်မပြတဲ့ သတင်းရင်းမြစ် နှစ်ဦးကတော့ အာဆီယံရဲ့ ဘုံသဘောတူညီချက် ထုတ်ပြန်ချိန်မှာ အသုံးအနှုန်း ပြောင်းသွားတာနဲ့ ပတ်သက်လို့ အံ့ဩမိကြောင်း၊ ဒါပေမဲ့ ဘာကြောင့် အခုလို ဖြစ်သွားတယ် ဆိုတာကိုတော့ အကြောင်းရင်း မသိရကြောင်း Reuters သတင်းဌာနဆီ ပြောကြားခဲ့ပါတယ်။

Reutersက ဒီဖြစ်ရပ်နဲ့ ပတ်သက်ပြီး ဆက်သွယ် မေးမြန်းမှုကို ဘရူနိုင်း နိုင်ငံခြားရေး ဝန်ကြီးဌာနက ဘာမှတ်ချက်မှ မပေးသေးပါဘူး။ အာဆီယံရဲ့ ဘုံသဘောတူညီချက် ၅ ခုမှာ မြန်မာ့နိုင်ငံရေး အကျပ်အတည်းနဲ့ ပတ်သက်ပြီး အဖွဲ့အစည်း အားလုံး စုံစုံညီညီ ပါဝင် ဆွေးနွေးဖို့ကိုပဲ ဦးတည် တိုက်တွန်းထားတာ တွေ့ရပါတယ်။