ထားမြတ်/People’s Spring
ချင်းအမျိုးသားတပ်ဦး(CNF)၊ ဒေသကာကွယ်ရေးအဖွဲ့နှင့် ချင်းပြည်နယ် လွှတ်တော် ကိုယ်စားလှယ်များဖြင့် စုဖွဲ့ထားသည့် ချင်းပြည်အစိုးရ၏ အစိုးရယန္တရား အားကောင်းလာစေရေး ဝိုင်းဝန်းကြိုးပမ်းရန်လိုအပ်ကြောင်း ချင်းပြည်ဝန်ကြီးချုပ် ဦးပါထန်းက ပြောကြားသည်။
ဝန်ကြီးချုပ် ဦးဆောင်သည့် ချင်းပြည်အစိုးရ သည် ဧပြီ ၁၃ရက်မှ ၁၉ရက်အတွင်း ချင်းပြည်နယ်အတွင်းရှိ ဇိုဖေ၊ လောက်တူ၊ ဇိုတုန်နှင့် ဆဲန်ထန်ဒေသများသို့ သွားရောက်စဉ် အထက်ပါအတိုင်း ပြောကြားခဲ့သည်ဟု ချင်းပြည်အစိုးရက ထုတ်ပြန်သည်။
အဆိုပါ ခရီးစဉ်များတွင် ဝန်ကြီးချုပ်နှင့်အဖွဲ့သည် ဒေသအသီးသီးရှိ ကောင်စီဦးဆောင်အဖွဲ့များနှင့် ပြည်သူများအား တွေ့ဆုံခဲ့ပြီး ၎င်းဒေသများ၏ အုပ်ချုပ်ရေးလည်ပတ်မှုများကိုလည်းကောင်း၊ အစိုးရယန္တာရားလည်ပတ်နိုင်စေရန် လိုအပ်သော ကိစ္စရပ်များကို ဆွေးနွေးကာ ချင်းပြည်အစိုးရ၏ အုပ်ချုပ်ရေးဆိုင်ရာ ကိစ္စရပ်များကို ရှင်းလင်းပြောကြားခဲ့ကြောင်း ဖော်ပြထားသည်။
Public Service Announcement
ချင်းပြည်အစိုးရနှင့် ဒေသန္တာရအစိုးရအကြား အုပ်ချုပ်ရေးချိတ်ဆက်ဆောင်ရွက်နိုင်ရန် ဖက်ဒရယ်စနစ်ကိုအခြေခံသည့် ဒေသအသီးသီးမှ အုပ်ချုပ်ရေးဥပဒေကြမ်း တင်သွင်းလာသော ဒေသန္တာရအုပ်ချုပ်ရေးဥပဒေကို ရေးဆွဲပြဋ္ဌာန်းပြီး အုပ်ချုပ်ရေးအကောင်အထည်ဖော်ရန်လိုအပ်ကြောင်း၊ ချင်းပြည်သည် လွတ်လပ်ရေးမတိုင်ခင် ကတည်းကမရှိခဲ့ဖူးသော ချင်းလူမျိုးများကိုယ်တိုင်ရေးဆွဲသည့် ဖွဲ့စည်းပုံအခြေခံဥပဒေသည် ယခုအခါ ချင်းလူမျိုးများကိုယ်တိုင်ရေးဆွဲအတည်ပြုပြဋ္ဌာန်းနိုင်ခဲ့ပြီဖြစ်ကြောင်း စသည်တို့ကို လည်း ပြောကြားခဲ့သည်ဟု ဆိုသည်။
ထို့ပြင် ချင်းပြည်(Chinland)အစိုးရအနေဖြင့် ပြည်သူနှင့်အတူရပ်တည်ကာ ချင်းပြည်နှင့် ချင်းပြည်သူများ၏ အကျိုးကို ရှေ့ရှုပြီး အုပ်ချုပ်ရေး လုပ်ငန်းများဆောင်ရွက်သွားမည်ဖြစ်ကြောင်း ပြောကြားခဲ့ကြောင်း ဖော်ပြသည်။
ခရီးစဉ်တွင် လူသားချင်းစာနာထောက်ထားရေးနှင့် ပြန်လည်ထူထောင်ရေးဝန်ကြီး၊ ပြည်ထဲရေးဝန်ကြီး၊ ဆောက်လုပ်ရေးဝန်ကြီးတို့လည်း ဝန်ကြီးချုပ်နှင့်အတူ လိုက်ပါခဲ့သည်ဟု အသိပေးသည်။
CNF ဦးဆောင်သည့် ချင်းပြည်ကောင်စီက ယခုနှစ် ဖေဖော်ဝါရီ ၁ရက်တွင် ချင်းပြည်အစိုးရကိုဖွဲ့စည်းခဲ့သည်။
ချင်းပြည် အစိုးရ ဖွဲ့စည်းမှုကို ကြားကာလချင်းအမျိုးသားအတိုင်ပင်ခံကောင်စီ(ICNCC) နှင့် ဒေသကာကွယ်ရေးတပ်ဖွဲ့ အချို့က လက်မခံကြောင်း အသိပေးထားသည်။
