အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်၊ သမ္မတဦးဝင်းမြင့်အပါအဝင် ဖမ်းဆီးခံနိုင်ငံရေး အကျဉ်းသားအားလုံးကို ပြန်လွှတ်ပေးဖို့ ကုလသမဂ္ဂအထွေထွေ အတွင်းရေးမှူးချုပ်က ရပ်တည်ချက် မပြောင်းလဲဘဲ တောင်းဆိုတယ်လို့ ကုလသမဂ္ဂပြောခွင့်ရပုဂ္ဂိုလ်က မနေ့(အောက်တိုဘာ၁၈)က ပြောပါတယ်။
ကုလသမဂ္ဂပြောခွင့်ရပုဂ္ဂိုလ်ရဲ့ ပုံမှန်သတင်းစာရှင်းလင်းပွဲမှာ သတင်းထောက်တစ်ဦးက မြန်မာနိုင်ငံမှာ ဖမ်းဆီးထိန်းသိမ်းခံ ၅၆၀၀ဦး ပြန်လွှတ်ပေးတဲ့အပေါ် ကုလသမဂ္ဂရဲ့ တုံ့ပြန်ချက်ကို မေးမြန်းရာမှာ နိုင်ငံရေးအကျဉ်းသားအားလုံးကို ပြန်လွှတ်ပေးဖို့၊ အကြမ်းဖက်မှုတွေ ရပ်တန့်ဖို့နဲ့ ဖိနှိပ်မှုတွေအဆုံးသတ်ဖို့ဆိုတဲ့ ကုလသမဂ္ဂအတွင်းရေးမှူးချုပ် ထပ်တလဲလဲတောင်းဆိုမှုတွေ အတိုင်းမပြောင်းလဲကြောင်း Stephane Dujarric က ပြောပါတယ်။
ဒါ့အပြင် မကြာခင်သက်တမ်းကုန်ဆုံးတော့မယ့် ကုလသမဂ္ဂအတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးကိုယ်စားလှယ်နဲ့ အသစ်ခန့်အပ်ရေးနဲ့ပတ်သက်လို့ ကြေညာဖို့ရှိတယ်လို့ ပြောခွင့်ရပုဂ္ဂိုလ်Stephane Dujarricက ပြောပါတယ်။
ဆွစ်ဇာလန်သံတမန် Christine Schraner Burgener ဟာ ကုလသမဂ္ဂအတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးကိုယ်စားလှယ်အဖြစ် ၂၀၁၈ ဧပြီမှာစတင်တာဝန်ထမ်းဆောင်ခဲ့တာ ဖြစ်ပါတယ်။
Public Service Announcement
