ကျော်ဇော/People’s Spring
တနင်္သာရီမြို့နယ်တွင် သုံးရက်ဆက်တိုက်ပွဲဖြစ်ပွားခဲ့ပြီး စစ်ကောင်စီတပ်နှင့် တော်လှန် ရေးတပ်ဖွဲ့များကြား နှစ်ဖက်စစ်ရေးတင်းမာလျှက်ရှိကြောင်း မြိတ်ခရိုင်၊ ပြည်သူ့ကာကွယ်ရေးပူးပေါင်းစစ်ကြောင်း(၂)မှ တာဝန်ရှိသူတစ်ဦးက ပြောသည်။
ထိတွေ့တိုက်ပွဲများမှာ စက်တင်ဘာ ၄ ရက်က စတင်ဖြစ်ပွားနေပြီး ဘန်လော၊ ထုံထော်နှင့် ၆ မိုင်ရွာများအနီး တိုက်ပွဲများဆက်လက်ဖြစ်ပွားလျှက်ရှိရာ နှစ်ဖက်ထိခိုက်မှုများရှိနေကြောင်း စုံစမ်းသိရသည်။
Public Service Announcement
” စက်တင်ဘာ၄ ရက်နေ့ကတည်းကပြန်စနေတာပါ။ စစ်ကြောင်း ၃ ကြောင်းထိုးနေတာပါ။ တိုက်ပွဲက ၃ နေရာလုံး ဖြစ်နေပါတယ်”ဟု မြိတ်ခရိုင် ပြည်သူ့ကာကွယ်ရေးပူးပေါင်းစစ်ကြောင်း(၂)မှ တာဝန်ရှိသူတစ်ဦးက လူထုနွေဦးသို့ ပြောသည်။
နှစ်ဖက်တိုက်ပွဲများမှာ ပြန်ဆုတ်လိုက် ပြန်တိုက်လိုက်ဖြင့် တနေကုန်နီးပါးဖြစ်နေပြီး စစ်ကောင်စီဘက်မှ ၂၀နီးပါး ထိခိုက်သေဆုံးထားကာ တော်လှန်ရေးပူးပေါင်းတပ်များဘက်မှ နှစ်ဦး၊ အရပ်သားပြည်သူနှစ်ဦး ထိ ခိုက်ဒဏ်ရာများရထားကြောင်း ၎င်းက ဆက်ပြောသည်။
ထို့အပြင် စင်တင်ဘာလ ၅ ရက်က ရောက်ရှိလာသော စစ်ကောင်စီတပ်၏ ထောက်ပို့ယာဥ်သုံးစီးကို ဘန်လောရွာလမ်း ဆုံအနီး၌ တော်လှန်ရေးတပ်ဖွဲ့များက လက်ဦးမှုယူတိုက်ခိုက်ခဲ့ရာ ယာဥ်များထိုးရပ်ကာ ရှေ့ ဆက်မသွားနိုင်တော့ဘဲ ယာဥ်ပေါ်ပါ တပ် သားများလည်း သေဆုံးမှုရှိကြောင်း စစ်ကြောင်း(၂)ထံမှ သိရသည်။
အထက်ပါ ဘန်လော၊ ထုံထော်နှင့် ၆ မိုင်ရွာများအနီးတွင် စစ်ကောင်စီတပ်ဘက်မှ အင်အား ၂၀၀ ခန့်ဖြင့် ၃နေရာခွဲဖြန့်နေရာယူထားရာ စက်တင်ဘာ ၆ ရက် ညပိုင်းအထိ နှစ်ဖက်ပစ်ခတ်မှုများဆက်ရှိနေကြောင်း စုံစမ်းသိရသည်။
တနင်္သာရီမြို့နယ်၊ ၆ မိုင်ကျေးရွာအနီးတွင် ပြီးခဲ့သည့် ဩဂုတ် ၂၆ ရက်မှ ၂၉ ရက်အထိ နှစ်ဖက်တိုက်ပွဲများဖြစ်ပွားခဲ့ရာ စစ်ကောင်စီဘက်မှ ဗိုလ်ကြီးတစ်ဦးအပါအဝင် ခုနစ်ဦးသေဆုံးခဲ့သေးသည်။
