မိထက်၊ဟန်နွေ/People’s Spring
လားရှိုးမြို့ပေါ်ကို ယနေ့(စက်တင်ဘာ ၉ရက်) နံနက်၁၀နာရီ ၂၅မိနစ်ကစ၍ စစ်ကောင်စီက လေကြောင်းမှ ဗုံးကြဲချတိုက်ခိုက်နေကြောင်း ဒေသခံများက ပြောသည်။
နံနက် ၁၀နာရီ ၂၅မိနစ်တွင်တစ်ကြိမ်၊ ၁၀နာရီ ၃၃ မိနစ်တွင်တစ်ကြိမ် တိုက်လေယာဉ် ၂စီးဖြင့် မြို့နယ်အထွေထွေအုပ်ချုပ်ရေးမှူးရုံးနှင့် ဗျူဟာလမ်းအနီးတို့တွင် ဗုံးကြဲတိုက်ခိုက်ခဲ့ခြင်းဖြစ်သည်ဟု သတင်းရင်းမြစ်တစ်ဦးက ပြောသည်။
ဒေသခံတစ်ဦးကလည်း “ဟုတ်ပါတယ်။ နှစ်ခါလာကြဲသွားတယ်လို့ ပြောတယ်”ဟု ပြောသည်။
Public Service Announcement
လေကြောင်း တိုက်ခိုက်မှုကြောင် လူထိခိုက်မှုရှိ၊မရှိ အခြေအနေကို ဆက်လက်စုံစမ်းနေဆဲဖြစ်သည်။
စစ်ကောင်စီ ဗုံးကြဲလေယာဉ် ဆက်ပျံဝံနေဆဲဖြစ်ပြီး မြို့ပေါ်ရပ်ကွက်နေပြည်သူများ သတိပြုနေထိုင်ရန် ဒေသခံအချင်းချင်း သတိပေးနေကြသည်။
“ဗျူဟာလမ်းကို ကြဲချတာ။ အခုပြောနေရင်းကနေ ဆက်ကြဲနေတယ်”ဟု ဒေသခံတစ်ဦးက ပြောသည်။
လားရှိုးမြို့ ရပ်ကွက်(၁၂)ကို ယနေ့(စက်တင်ဘာ ၈ရက်) နံနက်၄နာရီခန့်တွင် စစ်ကောင်စီက လေကြောင်းမှ ကြဲချတိုက်ခိုက်ပြီးနောက် စက်တင်ဘာ ၉ရက်တွင် ထပ်မံဗုံးကြဲခဲ့ခြင်းဖြစ်သည်။
တော်လှန်ရေးအင်အားစုများ ထိန်းချုပ်ထားသည့် မြို့ရွာများကို လိုအပ်သလိုတုံ့ပြန်မည်ဟု အာဏာသိမ်းခေါင်းဆောင်က ကြုံးဝါးပြီးနောက် ရှမ်းပြည်နယ်မြောက်ပိုင်းမှ နမ့်ခမ်း၊ နောင်ချိုမြို့တို့ကိုလည်း စက်တင်ဘာ ၆ရက်က ဆက်တိုက်ဗုံးကြဲခဲ့ရာ အရပ်သား ၁၃ဦး သေဆုံးခဲ့သည်။
စက်တင်ဘာ ၈ရက်က လေကြောင်းတိုက်ခိုက်မှုတွင် လားရှိုးမြို့ မိုးလုံလေလုံအားကစားကွင်းနှင့် ရေပူစမ်းအနီးရှိ Silver Skyဟိုတယ်အနီးဗုံးများ ပေါက်ကွဲခဲ့ပြီး ဒေသခံများပိုင်ကားနှင့် ဆိုင်ကယ်အများအပြား ပျက်စီးခဲ့သည်။ယနေ့တိုက်ခိုက်မှုတွင် ထိခိုက်ပျက်စီးမှုကို မသိရသေးပေ။
စစ်ကောင်စီတပ်က လားရှိုးမြို့အပါအဝင် တိုက်ပွဲဖြစ်ပွားမှုမရှိသည့် နေရာများကို လေကြောင်းတိုက်ခိုက်မှုများ ကျူးလွန်နေခြင်းသည် ရိုင်းစိုင်းသောလူ့အခွင့်အရေးချိုးဖောက်မှု ဖြစ်ကြောင်း ကိုးကန့်တပ်မတော်(MNDAA)က သတင်းထုတ်ပြန်သည်။
စစ်ကောင်စီသည် MNDAAသိမ်းပိုက်ထားသည့် လားရှိုးမြို့ကို တိုက်ပွဲဖြစ်ပွားမှုမရှိဘဲ ဩဂုတ် ၃၀ရက်တွင် တစ်ကြိမ်၊ စက်တင်ဘာ ၈ရက်တွင် တစ်ကြိမ် လေကြောင်းတိုက်ခိုက်ခဲ့ခြင်းဖြစ်သည်။
