စစ်ကောင်စီ၏ ခြေလျင်တပ်ရင်းနှင့် ဆေးတပ်မှဗိုလ်မှူးနှစ်ဦး ဒေါနစစ်ကြောင်းထံ အလင်းဝင်

ဒီးဒီ/People’s Spring

စစ်ကောင်စီ၏ ခြေလျင်တပ်ရင်းနှင့် ဆေးတပ်မှ ဗိုလ်မှူးနှစ်ဦး (၃၃)ဗျူဟာနယ်မြေအတွင်း စစ်ရေးလှုပ်ရှားနေသော ဒေါနစစ်ကြောင်းထံ အလင်းဝင်လာကြောင်း ဒေါနစစ်ကြောင်း ဗျူဟာ(၃၃ )စစ်ဆင်ရေးမှူး စောဒါးကိုက ပြောသည်။

ပြီးခဲ့သည့် စက်တင်ဘာ ၁ရက်တွင် အဆိုပါ စစ်ကောင်စီ၏ ဗိုလ်မှူးနှစ်ဦး အလင်းဝင်လာခဲ့ခြင်းဟု ဒေါနစစ်ကြောင်း ဗျူဟာ(၃၃ )စစ်ဆင်ရေးမှူးစောဒါးကိုက ပြောသည်။

Public Service Announcement

“ဗိုလ်မှူးတစ်ယောက်ကတော့ သူတို့ရဲ့တပ်ပတ်ဝန်းကျင်မှာ တိုက်ပွဲတွေ ရှိနေတယ်။ တိုက်ပွဲတွေကြားက ခေါ်ထုတ်လာတာပေါ့နော်။ ကျနော်တို့ရဲဘော်တွေ ခေါ်ထုတ်လာရတာ”ဟု စောဒါးကိုက ပြောသည်။

အဆိုပါ ဗိုလ်မှူးမှာ သေနတ် ၂လက်နှင့် ကျည်များယူဆောင်လာသည်ဟု ၎င်းက ဆိုသည်။

“ဆေးတပ်ကဗိုလ်မှူးကလည်း ချိတ်ဆက်ပြီး ဝင်လာတာ”ဟု စောဒါးကိုက ပြောသည်။

ဒေါနတပ်ရင်းထံဆက်သွယ်ကာ CDM ပြုလုပ်၍ ပြည်သူ့ရင်ခွင် ခိုလှုံလာမှုအပေါ် ဒေါနတပ်ရင်းက လုံခြုံနွေးထွေးစွာ ကြိုဆိုစောင့်ရှောက်ထားသည့်အပြင် CDM ပြုလုပ်သည့်အရာရှိများအား ပြည်သူ့ကာကွယ်ရေးတပ်မတော် ကာကွယ်ရေးဝန်ကြီးဌာနမှတဆင့် ပြည်သူ့သားကောင်းများအဖြစ် အသိအမှတ်ပြု ဂုဏ်ပြုဆုငွေများချီးမြှင့်ပေးအပ်ခဲ့သည်ဟု ဒေါနစစ်ကြောင်းက ထုတ်ပြန်ထားသည်။

အကြမ်းဖက်စစ်အုပ်စုအနေဖြင့် တနိုင်ငံလုံးအတိုင်းအတာ စစ်ရေးရှုံးနိမ့်မှုများနှင့် နယ်မြေဆုံးရှုံးမှုများကြုံတွေ့နေရပြီး တပ်တွင်းတွင်လည်း မတရားမှုများ၊ အောက်လက်ငယ်သားများအနေဖြင့် စိတ်ဓာတ်ကျဆင်းမှုများ အကြီးအကျယ်ခံစားနေရပြီဖြစ်သဖြင့် ပြည်သူလူထုအားမျက်နှာမူသည့် ပြည်သူ့စစ်သားစစ်စစ်များအား ဒေါနတပ်ရင်းက အချိန်မရွေးနွေးထွေးစွာကြိုလျက်ရှိပြီး အသက်အန္တရာယ်အာမခံချက်ဖြင့် ဘေးကင်းလုံခြုံစွာ စောင့်ရှောက်ထားမည်ဟု ဒေါနစစ်ကြောင်းက ထပ်မံအသိပေးထားသည်။