ဇေအောင်/People’s Spring
စစ်ကိုင်းတိုင်း၊ ဒီပဲယင်းမြို့နယ် ကျေးရွာအချို့မှ ပြည်သူများမှာ စစ်ဘေးရှောင်နေရသည့်ကာလ တစ်လကျော်လာ၍ စားနပ်ရိက္ခာအခက်အခဲများရှိနေကြောင်း သတင်းရရှိသည်။
ပြီးခဲ့သည့် သြဂုတ်အတွင်းက ဒီပဲယင်းမြို့ကို တော်လှန်ရေးတပ်ဖွဲ့များက ဝင်ရောက်တိုက်ခိုက်ခဲ့ပြီးနောက် စစ်ကောင်စီက မြို့ပေါ်ကို စစ်အင်အားဖြည့်တင်းပြီး ပြန်လည်အထိုင်ချထားခဲ့သည်။
Public Service Announcement
ဒီပဲယင်းမြို့ပေါ်ရှိ စစ်ကောင်စီတပ်က စစ်ကြောင်းထိုးသတ်ဖြတ်ခြင်း၊ မီးရှို့ဖျက်ဆီးခြင်းများ ပြုလုပ်နေ၍ ဒီပဲယင်းမြို့ပေါ်ပြည်သူများ၊ ပျော်ဘွယ်ရွာနှင့် မြို့အရှေ့ဘက်ရှိ ရေဦးနယ်အနောက်ခြမ်း မစိုးရိမ်ကျေးရွာမှ ပြည်သူ ၅၀၀ကျော်တို့သည် ယနေ့အထိ ရက်ပေါင်း ၄၀ကျော်ကြာ တိမ်းရှောင်နေရကြောင်း ရေဦးမြို့နယ် စစ်ရှောင်ပြည်သူထောက်ပံ့ရေးအဖွဲ့၏ တာဝန်ရှိသူက ပြောသည်။
“ရှောင်နေကြတဲ့အထဲမှာ သက်ကြီးရွယ်အိုတွေနဲ့ ကလေးသူငယ်တွေ ကလေးမိခင်တွေ အများဆုံးပါဝင်တယ်။ ဆန်၊ ဆီ ဟင်းချက်စရာ ကူညီနိုင်သလောက် ကူညီပေးထားကြပေမယ့် ရက်ရှည်ဖြစ်နေတော့ ကူညီရေးက မလောက်ငှတော့ဘူး။ သူတို့ဟာသူတို့ တတ်နိုင်သလောက်ရုန်းကန်ပြီး ချက်ပြုတ်စားသောက်နေကြရတာ။”ဟု အထက်ပါတာဝန်ရှိသူက ပြောသည်။
လက်ရှိ မစိုးရိမ်ကျေးရွာစစ်ရှောင်ပြည်သူများအား ဆန်၊ဆီ နိုင်သလောက်ကူညီသွားရန်ရှိပြီး ပြည်သူများ ပါဝင်ကူညီပေးကြရန် ရေဦးမြို့နယ် စစ်ရှောင်ပြည်သူထောက်ပံ့ရေးအဖွဲ့က မေတ္တာရပ်ခံသည်။
ဒီပဲယင်းမြို့အား ပြီးခဲ့သည့် သြဂုတ် ၁၈ ရက်က တော်လှန်ရေးတပ်များက တိုက်ခိုက်သိမ်းပိုက်နိုင်ခဲ့သော်လည်း စစ်ကောင်စီ၏ လေကြောင်းနှင့် မြေပြင်စစ်ကူများကြောင့် တော်လှန်ရေးအဖွဲ့များ ပြန်လည်ဆုတ်ခွာခဲ့ရသည်။
