မကွေးတိုင်းဒေသကြီး နတ်မောက်မြို့နယ် သမြှားရွာတွင် အာဏာသိမ်းစစ်ကောင်စီတပ်က ယမန်နေ့မွန်းလွဲပိုင်းတွင် အကြမ်းဖက်ပစ်ခတ်၍ ၅ဦးဒဏ်ရာရပြီး ၇ဦး ဖမ်းဆီးခံရကြောင်း ဒေသခံက ပြောသည်။
“သမြှားက ဒလန်က လှမ်းခေါ်တော့ စစ်ကား နှစ်စီးနဲ့ အင်အား ၁၅ယောက်လောက် ရွာလာတာ။ အဲဒီမှာ သပိတ်တွေတုန်းက ဦးဆောင်တဲ့ သူတွေကို လိုက်ဖမ်းတာ ပေါ့။ ဦးဆောင်တဲ့သူတွေက ထွက်ပြေးနေတော့ လွတ်တယ် ။အဲဒီမှာ ဦးဆောင်တဲ့ သူ ဦးမောင်မြင့် တဲ့ သူ့ကိုမတွေ့တော့ သူ့သမီးကို ဖမ်းခေါ်တာ”ဟု ဒေသခံက ပြောသည်။
ထိုသို့ ဖမ်းဆီးမှုကို ရွာခံများက လက်မခံဘဲ ပြန်လွှတ်ပေးရန် ရွာလူထုအင်အားဖြင့် ဝိုင်းဝန်းတောင်းဆိုခဲ့ရာ ဦးမောင်မြင့် ၏ သမီးဖြစ်သူကို ပြန်လွှတ်ပေးခဲ့သည်။ သို့သော် စစ်ကောင်စီ တပ်ဖွဲ့က အင်အားထပ်ဖြည့်ပြီး ပြန်ရောက်လာကာ အကြမ်းဖက် ပစ်ခတ်ခဲ့ခြင်းဖြစ်ကြောင်း ဒေသခံအချို့က ပြောသည်။
“ကျောင်းကုန်းရွာက သုံးယောက်ကိုတော့ သူတို့ကို ခုခံလို့ ဆိုပြီး တော်တော်ကြီးကို နှိပ်စက်သွားတယ်။ အခု ညနေ ၅နာရီလောက်မှာ သမြှားအရှေ့ဘက်မှာ ပင်မစစ်လက်နက် သိုလှောင်ရေးတပ် အဲဒီတပ်ကို သွားတဲ့ လမ်းဘေးမှာ စစ်တပ်သုံးရေကန်ရှိတယ် အဲဒီမှာ သူတို့ အင်အား ၅၀လောက်နဲ့ တပ်စွဲထားတယ်။
ညဘက်ကျရင် မင်းတို့ကို ပစ်မယ် ခတ်မယ်ဆိုပြီး သူတို့ ခြိမ်းခြောက်နေတယ်။ လူထုကတော့ တော်တော့်ကို ကြောက်နေကြတယ်”ဟု သမြှားရွာသား တစ်ဦးက ပြောသည်။
Public Service Announcement
အဖမ်းခံရသူများမှာ သမြားရွာမှ ၄ဦး ၊ ကျောင်းကုန်းကျေးရွာမှ ၃ဦး ဖြစ်သည်။၎င်းတို့ ခုနှစ်ဦးလုံးကို စစ်ကောင်စီ တပ်က အကြမ်းဖက်ရိုက်နှက် ဖမ်းစီးသွားခြင်းဖြစ်ကြောင်း နယ်ခံတစ်ဦးက သမြှားရွာ အခြေအနေကို ၎င်း၏ Facebookတွင် ရေးသားထားသည်။
ဒဏ်ရာရသူ ၅ဦးမှာ ရာဘာကျည်ထိမှန်ခြင်းဖြစ်ကြောင်း ၎င်းက ဆိုသည်။
