ရန်ကုန်မြို့မှာ ကိုဗစ်ရောဂါကူးစက် မြင့်မားလာနေပြီး ကိုဗစ်လူနာတွေအတွက် လိုအပ်တဲ့အောက်ဆီဂျင်ရဖို့ အခကြေးငွေနဲ့လူငှားပြီးတန်းစီနေရတယ်လို့ ကိုယ်တိုင်အောက်ဆီဂျင်ရှာဖွေနေရသူတွေက ပြောပါတယ်။
မြို့တွင်းမှာ တစ်နိုင်တစ်ပိုင်ဖြန့်ဝေပေးနေတဲ့ လူမှုကူညီရေးအသင်းတချို့နဲ့ ပုဂ္ဂလိကလုပ်ငန်းတချို့မှာ တစ်ရက်ကြိုတိုကင်ယူရတာကြောင့် အောက်ဆီဂျင် အရေးပေါ်လိုအပ်သူတွေက စက်ရုံတွေကို အားကိုးနေကြရပါတယ်။
ဒါကြောင့် စက်မှုဇုံတွေကို အောက်ဆီဂျင်လာဖြည့်တဲ့သူရာနဲ့ချီရှိနေပြီး ဒီကနေ့တောင်ဒဂုံစက်မှုဇုံမှာဆိုရင် အိုးလေးတစ်အိုးစာအတွက် အချိန် ၆ နာရီကနေ ၇ နာရီအထိ စောင့်ဆိုင်းတန်းစီခဲ့ရတယ်လို့ ကိုယ်တိုင်သွားတန်းစီခဲ့တဲ့ အမျိုးသမီးတစ်ဦးက ပြောပါတယ်။
“အိုးလေးလို့သတ်မှတ်တဲ့ ၁၅ လီတာကနေ ၂၀ လီတာအထိ တန်းစီခ ၅၀၀၀ ပေးရတယ်။ အဲဒီအိုးလေးတွေက နေ့ချင်းရတယ်။ ၂၀ လီတာနဲ့အထက် အိုးကြီးတွေဆိုရင်တော့ တန်းစီခက ၁၀၀၀၀ ဖြစ် သွားပြီ။ ဒါတောင်သူက နေ့ချင်းမရဘူး။ အိုးကြီးက ၃ ရက်ကနေ ၅ ရက်အထိ စောင့်ယူရတယ်”လို့ အဲဒီအမျိုးသမီးက ပြောပါတယ်။
တောင်ဒဂုံစက်မှုဇုံ စစ်တောင်လမ်းမှာရှိတဲ့ စက်ရုံလေး ၊ငါးရုံလောက်ဟာ စက်ရုံတစ်ရုံကို အောက်ဆီဂျင်ဖြည့်ပေးနိုင်တဲ့အနေအထားက အိုးလေးအလုံး ၄၀၀ ဝန်းကျင်နဲ့ အိုးကြီးအလုံး ၁၀၀ ကျော်လောက်ဆီ နေ့စဉ်ဖြည့်ပေးနိုင်တယ်လို့ စုံစမ်းသိရပါတယ်။
အောက်ဆီဂျင်ဖြည့်သွင်းခအနေနဲ့ အိုးလေးတစ်လုံးကို ကျပ် ၅၀၀၀ နဲ့ အိုးကြီးတစ်လုံးကို ကျပ် ၁၀၀၀၀ သတ်မှတ်ထားပြီး အလှည့်ကျစနစ်နဲ့ ဖြည့်သွင်းပေနေတာလည်း ဖြစ်ပါတယ်။
(ဇူလိုင် ၁၇ ရက် ည ၇ နာရီခန့်က တောင်ဒဂုံစက်မှုဇုံမှာ အောက်ဆီဂျင်အိုးတန်းစီနေသူတွေဖြစ်ပါတယ်) (ဇူလိုင် ၁၇ ရက် ည ၇ နာရီခန့်က တောင်ဒဂုံစက်မှုဇုံမှာ အောက်ဆီဂျင်အိုးတန်းစီနေသူတွေဖြစ်ပါတယ်) (ဇူလိုင် ၁၇ ရက် ည ၇ နာရီခန့်က တောင်ဒဂုံစက်မှုဇုံမှာ အောက်ဆီဂျင်အိုးတန်းစီနေသူတွေဖြစ်ပါတယ်)
ကိုဗစ်တတိယလှိုင်းမှာ ရောဂါကူးစက်ခံရတဲ့ ရန်ကုန်လူထုရဲ့အောက်ဆီဂျင်လိုအပ်ချက်ကို ဒီလအစောပိုင်းအထိ သိမ်ဖြူသင်္ဘောကျင်းက အောက်ဆီဂျင်ထုတ်စက်ရုံအပါအဝင် ဌာနပိုင်နဲ့ ပုဂ္ဂလိကပိုင်စက် ရုံတွေက လိုသလောက်ဖြည့်ပေးခဲ့ပေမဲ့ ပုဂ္ဂလိကကိုအောက်ဆီဂျင်ဖြည့်ပေးနေတာတွေရပ်ဆိုင်းဖို့ စစ်ကောင်စီကညွှန်ကြားပြီးတဲ့နောက်ပိုင်း ပြည်သူတွေအတွက် လိုအပ်တဲ့အောက်ဆီဂျင်ရဖို့ အခက်အခဲမျိုးစုံနဲ့ ရင်ဆိုင်နေကြရပါတယ်။