မကွေးတိုင်းဒေသကြီး ပေါက်မြို့နယ် တောင်ပိုင်းရှိ ဝန်ခြုံးရွာအား စစ်ကောင်စီနှင့် ပျူစောထီးအဖွဲ့ ဝင်ရောက်ပြီး နေအိမ်အချို့အား မီးရှို့ဖျက်ဆီးခဲ့ကြောင်း ဒေသခံအချို့က ပြောသည်။
ဝန်ခြုံးရွာနှင့် ပင်ထောင်ရွာအကြားတွင် တိုက်ပွဲဖြစ်ပြီးနောက် ယနေ့ ဇူလိုင် ၃၁ရက် မွန်းလွဲ ၁နာရီခွဲတွင် မီးရှို့ခံရခြင်းဖြစ်သည်ဟု ဆိုသည်။
“ပျူစောထီးနဲ့ PDF တွေနဲ့ တိုက်ပွဲတွေဖြစ်ပြီး ရွာဝင်တာ။ နှစ်အိမ်မီးရှို့ခံရတာ။ အခုတော့ ငြိမ်းသွားပြီ။ ရွာကို ဝင်တာလည်း စစ်သားတွေနဲ့ဝင်တာလို့ ပြောတယ်” ဟု ဒေသခံက ပြောသည်။
ယခု မီးရှို့ဖျက်ဆီးခံရသည့် ဝန်ခြုံးရွာသည် စစ်ကောင်စီတပ်က ရွာလုံးကျွတ်နီးပါး မီးရှို့ခဲ့သည့် ကင်းမရွာနှင့် ချောင်းသာခြားသည်ဟု ဒေသခံက ပြောသည်။ ထိုစဉ်ကလည်း ကင်းမရွာ အနီး တိုက်ပွဲဖြစ်ပွားပြီး စစ်ကောင်စီတပ်ဖွဲ့ဝင်များ အထိနာ၍ ရွာသို့ ဝင်ရောက်မီးရှို့ခဲ့ခြင်းဖြစ်သည်ဟု ဒေသခံများက ပြောသည်။
