ဖယ်ခုံတွင် KNDF ပူးပေါင်းအဖွဲ့နှင့် စစ်ကောင်စီတပ်များ ၂ နာရီကျော်တိုက်ပွဲဖြစ်၊ စစ်ကောင်စီတပ်ဘက်မှ အထိအခိုက်ရှိ

ဖယ်ခုံမြို့နယ်တွင် ယနေ့ညနေ ၃နာရီက ကရင်နီတပ်မတော်(KA)နှင့် ကရင်နီအမျိုးသားကာကွယ်ရေးတပ်(KNDF)ပူးပေါင်းတပ်နှင့် စစ်ကောင်စီတပ်များ ၂ နာရီကျော်အထိ တိုက်ပွဲဖြစ်ပွားခဲ့ကြောင်း KNDF က သတင်းထုတ်ပြန်သည်။

စစ်ကောင်စီတပ်များက ဖယ်ခုံမြို့နယ် ခေါင်းအိကျေးရွာအနီး ထိုးစစ်ဆင်လာခြင်းဖြစ်ပြီး KA နှင့် KNDF ပူးပေါင်းတပ်များက ပြန်လည်ခုခံတိုက်ခိုက်ခဲ့ရာ စစ်ကောင်စီတပ်မှ အနည်းဆုံးနှစ်ဦး ထိခိုက်ဒဏ်ရာရရှိခဲ့သော်လည်း ၎င်းတို့ပူးပေါင်းတပ်ဖွဲ့ဝင်များ၌ ထိခိုက်ဒဏ်ရာရရှိခြင်းမရှိခဲ့ဟု ထုတ်ပြန်ချက်က ဆိုသည်။

အဆိုပါတိုက်ပွဲတွင် အကြမ်းဖက်စစ်ကောင်စီတပ်များက ဖယ်ခုံမြို့နယ်၊ ကုန်းဆုံရွာရှိ အရဟံဘုရားတောင်ဘက်မှ စစ်ကြောင်းတစ်ကြောင်း ‌ရွှေပြည်အေးကျေးရွာဘက်မှ စစ်ကြောင်းတစ်ကြောင်းဖြင့် စစ်ကြောင်းနှစ်ကြောင်းဖြန့်ကာ ခေါင်းအိကျေးရွာဘက်သို့ ထိုးစစ်ဆင်လျက်ရှိကြောင်း KNDF ၏ထုတ်ပြန်ချက်တွင် ဖော်ပြသည်။

စစ်ကောင်စီ၏ လက်ပါးစေ ပျူစောထီးအဖွဲ့များသည် လည်း ဖယ်ခုံမြို့အတွင်း လှုပ်ရှားလျက်ရှိပြီး ပြည်သူများကို ချိန်းခြောက်လျက်ရှိသည်ဟု ထုတ်ပြန်ချက်က ဆိုသည်။

Public Service Announcement