နိုင်ငံတကာအသိုင်းအဝိုင်းဟာ အကြမ်းဖက်မြန်မာစစ်တပ်ကို ဖြတ်သုံးဖြတ်ကတစ်ဆင့် အရေးယူမှုတွေ တိုးချဲ့လုပ်ဆောင်ဖို့ မြန်မာနိုင်ငံဆိုင်ရာအထူးအကြံပေးကောင်စီ(SAC-M)က ဒီနေ့တောင်းဆိုလိုက်ပါတယ်။
ကုလသမဂ္ဂကျွမ်းကျင်ပညာရှင်တွေနဲ့ဖွဲ့စည်းထားတဲ့ အထူးအကြံပေးကောင်စီ(SAC-M)ဟာ သူတို့ရဲ့ တတိယ မြောက် ဆန်းစစ်လေ့လာချက်စာတမ်း(မြန်မာနိုင်ငံမှာ ကာကွယ်ပေးရန်တာဝန်ရှိမှု-R2P)ကို ဒီနေ့ထုတ်ပြန်ခဲ့ပြီး ကမ္ဘာ့နိုင်ငံတွေအနေနဲ့ မြန်မာစစ်တပ်ကို (၁)စစ်လက်နက် ပစ္စည်းထောက်ပံ့တာကို ဖြတ်တောက်ဖို့၊ (၂)ငွေကြေး စီးဝင်မှုကို ဖြတ်တောက်ဖို့၊ (၃)အပြစ်ကင်းလွတ်နေမှုကိုအဆုံးသတ်ဖြတ်တောက်ဖို့ စတဲ့ ဖြတ်သုံးဖြတ်ကို တိုးချဲ့ လုပ်ဆောင်ရေး တောင်းဆိုခဲ့တာပါ။
ဖေဖော်ဝါရီ ၁ ရက် အာဏာသိမ်းချိန်ကစလို့ မြန်မာနိုင်ငံမှာနေထိုင်သူတွေက နိုင်ငံတကာအသိုင်းအ၀ိုင်းဆီက ကူညီထောက်ပံ့မှုရရှိဖို့ တောင်းဆိုခဲ့ကြပြီး အထူးသဖြင့် အာဏာသိမ်းအပြီး အစောပိုင်းကာလတွေမှာ နိုင်ငံခြား စစ်တပ်တွေဝင်ရောက်စွက်ဖက်မှုကိုမျှော်လင့်တဲ့အနေနဲ့ ဆန္ဒပြသူအများအပြားက R2Pကိုတောင်းဆိုတဲ့ ဗီနိုင်း တွေ ကိုင်ဆောင်ပြသခဲ့ကြပါတယ်။
ဒါပေမဲ့ အာဏာသိမ်းမှု ၇ လကြာချိန်အထိ နိုင်ငံတကာအသိုင်းအ၀ိုင်းဟာ R2P ပဋိဉာဉ်အောက်ကနေ စုစည်းညီ ညွတ်တဲ့အရေးယူမှုလုပ်ဆောင်ဖို့ ပျက်ကွက်ခဲ့တယ်လို့ အထူးအကြံပေးကောင်စီရဲ့ စာတမ်းမှာ ဖော်ပြပါတယ်။
ကုလသမဂ္ဂလုံခြုံရေးကောင်စီကလည်း မြန်မာစစ်တပ်ရဲ့ ဥပဒေမဲ့ အာဏာသိမ်းမှုနဲ့ လူ့အခွင့်အရေးချိုးဖောက်တဲ့ ဆက်စပ်တဲ့ကိစ္စရပ်တွေကို အရေးယူတုံ့ပြန်ဖို့ ထိရောက်တဲ့လုပ်ဆောင်ချက်တွေ မရှိခဲ့ပါဘူး။
မြန်မာနိုင်ငံတွင်ကို နိုင်ငံခြားစစ်တပ်တွေကြားဝင်ဆောင်ရွက်ခြင်းဟာ လွန်စွာမဖြစ်နိုင်ဘဲ ပြည်တွင်းအခြေအနေ ကိုလည်း ပြင်းပြင်းထန်ထန်ဆိုးရွားသွားစေနိုင်တယ်လို့ စာတမ်းမှာ ထောက်ပြထားပါတယ်။
တစ်ဖက်မှာလည်း R2P အောက်ကနေ အခြားနည်းလမ်းတွေနဲ့ အရေးယူဆောင်ရွက်နိုင်တာတွေ ရှိနေပြီး အကြမ်း ဖက်မြန်မာစစ်တပ်ကို လက်နက်ရောင်းချမှုပိတ်ပင်ခြင်း၊ ပစ်မှတ်ထားတာ အရေးယူဒဏ်ခတ်ခြင်းနဲ့ တာဝန်ခံစေဖို့ တိုးမြှင့်ဆောင်ရွက်ခြင်း စတာတွေ ပါဝင်တယ်လို့ SAC-M က သုံးသပ်ထားပါတယ်။
(ရန်ကုန်မြို့ရှိ အမေရိကန်သံရုံးရှေ့၌ ဆန္ဒပြတောင်းဆိုနေသူများကို ဖေဖော်ဝါရီလက တွေ့ရစဥ်၊ ဓါတ်ပုံ – PS)