ကယားပြည်နယ် ဒီးမော့ဆိုမြို့နယ်တွင် ၃ရက်အတွင်း စစ်ကေင်စီတပ်နှင့် တိုက်ပွဲ ၅ကြိမ်ဖြစ်ပွား ခဲ့ကြောင်း ကရင်နီအမျိုးသားကာကွယ်ရေးတပ်ဖွဲ့(KNDF) ထုတ် ပြန်သည်။
ဒေသတွင်းသို့ အင်အားအများအပြားဖြင့် ထိုးစစ်ဆင် စစ်ရေးလှုပ်ရှားလာသည့် စစ်ကောင်စီတပ်ကို ကရင်နီတပ်မတော်(KA)နှင့် KNDFတို့က ခုခံတိုက်ခိုက်ခဲ့ခြင်းဖြစ်သည်ဟုဆိုသည်။
စက်တင်ဘာ ၁၄ရက်တွင် ဒီးမော့ဆိုမြို့နယ် ကဒါးလာကျေးရွာအနီး၌ ၄နာရီကြာ တိုက်ပွဲဖြစ်ပွားခဲ့ပြီး ဒေါပိုးစီရွာနှင့် စံပြ ၆မိုင်ရွာအကြားတွင်လည်း တိုက်ပွဲဖြစ်ခဲ့သည်။
ကဒါးလာကျေးရွာတိုက်ပွဲ၌ စစ်ကောင်စီတပ်မှ သေဆုံးထိခိုက်မှုများရှိနိုင်သကဲ့သို့ KNDF ရဲဘော်နှစ်ဦး ကျဆုံးခဲ့သည်ဟုဆိုသည်။ ဒေါပိုးစီရွာနှင့် စံပြ ၆မိုင်ရွာကြား တိုက်ပွဲ၌ စစ်ကောင်စီ တပ်က အင်အား ၂၀၀ ခန့်ဖြင့် ထိုးစစ်ဆင်လာခြင်းဖြစ်ပြီး လက်နက်ကြီးများဖြင့် ပစ်ခတ်ခဲ့ရာ KA မှ တပ်ကြပ်ကြီး တစ်ဦး လက်နက်ကြီးကျည်ထိမှန်ကျဆုံးခဲ့ကြောင်း ထုတ်ပြန်ထားသည်။
စက်တင်ဘာ ၁၅ရက်က ဒီးမော့ဆိုမြို့နယ် ထွီးလွှီးဘီလာ ကျေးရွာအနီး ခြေရာတော်တောင်ပေါ်တွင် တပ်စွဲထားသည့် စစ်ကောင်စီတပ်ကို တိုက်ခိုက်ခဲ့ကောင်း ထုတ်ပြန်သည်။ စက်တင်ဘာ ၁၆ရက် တွင် ဒီးမော့ဆိုမြို့နယ် ၆မိုင် ရွာအနီး တောင်ပေါ်၌ တပ်စွဲထားသည့် စစ်ကောင်စီတပ်ကို တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၄ဦးခန့် ကျဆုံးခဲ့သည်ဟုဆိုသည်။ ယင်းနေ့ ညပိုင်း၌ ဒေါပိုးစီနှင့် ပန်းကန် ကျေးရွာ အကြား တွင် တိုက်ပွဲဖြစ်ခဲ့ရာ စစ်ကောင်စီတပ်မှ ၂ဦးသေဆုံးခဲ့ကြောင်း ဖော်ပြထားသည်။
တော်လှန်ရေးတွင် အသက်စတေးရသော ရဲဘော်များ၊ ပြည်သူများ၏ပေးဆပ်မှုများကို အမြဲ အမှတ်ရပြီး KNDF မှ တော်လှန်ရေးအောင်မြင်သည်အထိ ဆက်လက် တိုက်ပွဲဝင်သွားမည်ဟု အဓိဌာန် ပြုကြောင်း ထုတ်ပြန်ခဲ့သည်။
ဒီမော့ဆိုမြို့နယ် စံပြ (၆) မိုင်ကျေးရွာ အနီးဝိုက်တွင် အကြမ်းဖက်စစ်ကောင်စီတပ်များမှ လက်နက်ကြီးများဖြင့် ပစ်ခတ်ကာ ခြေကုပ်ရယူရန်ကြိုးစားလျက်ရှိသည်ဟုလည်း ဖော်ပြထားသည်။