ဘင်္ဂလားပင်လယ်အော် အရှေ့အလယ်ပိုင်းမှာ ဖြစ်ပေါ်နေတဲ့ လေဖိအားနည်းရပ်ဝန်းအရှိန်ကြောင့် တိုင်းနဲ့ပြည်နယ် ၁၂ ခုမှာ မိုးကြီးနိုင်ပြီး လေပြင်းနဲ့မိုးကြိုးလျှပ်စီးအန္တရာယ်ကို သတိပြုနေထိုင်ကြဖို့ မိုးဇက ဒီကနေ့မနက်မှာ ထုတ်ပြန်ထားပါတယ်။
ဒီကနေ့ မနက် ၇ နာရီခွဲအချိန်က တိုင်းတာချက်အရ ဘင်္ဂလားပင်လယ်အော် အရှေ့အလယ်ပိုင်းမှာ လေဖိအားနည်းရပ်ဝန်းတစ်ခု ဖြစ်ပေါ်နေတာပါ။
အဆိုပါ လေဖိအားနည်းရပ်ဝန်းရဲ့အရှိန်ကြောင့် ဒီကနေ့မနက်ကနေ နောက်(၂၄)နာရီအတွင်း နေပြည်တော်၊ စစ်ကိုင်းတိုင်းအောက်ပိုင်း၊ မန္တလေး၊ မကွေး၊ ပဲခူး၊ ရန်ကုန်၊ ဧရာဝတီ၊ တင်္နသာရီတိုင်းနဲ့၊ချင်း၊ ရခိုင်၊ ကရင်နဲ့ မွန်ပြည်နယ်တို့မှာ နေရာစိပ်စိပ်ကနေ နေရာအနှံ့အပြားမိုးထစ်ချုန်းရွာတာ၊ ဒေသအလိုက်မိုးကြီးတာနဲ့ နေရာကွက်မိုးကြီးတာတွေ ဖြစ်ပေါ်နိုင်တယ်လို့ မိုးဇလက ခန့်မှန်းထားပါတယ်။
မြန်မာ့ကမ်းရိုးတန်းတစ်လျှောက်နဲ့ ကမ်းလွန်ပင်လယ်ပြင်တို့မှာ တစ်ခါတစ်ရံ မိုးသက်လေပြင်းများကျရောက်ပြီး လှိုင်းကြီးနိုင်တယ်လို့ မိုးဇလက ဆိုထားပါတယ်။
Public Service Announcement
မိုးသက်လေပြင်းကျစဉ် ရေပြင်/မြေပြင်လေဟာ တစ်နာရီကို (၃၅)မိုင်ကနေ မိုင် (၄၀)အထိ တိုက်ခတ်နိုင်ပြီး လှိုင်းအမြင့်မှာ မြန်မာ့ကမ်းရိုးတန်းတစ်လျှောက်နဲ့ ကမ်းလွန်ပင်လယ်ပြင်တို့မှာ (၉)ပေကနေ (၁၁)ပေခန့် ရှိနိုင်တယ်လို့ ထုတ်ပြန်ချက်မှာ ဖော်ပြထားပါတယ်။
လေဖိအားနည်းရပ်ဝန်း၏အရှိန်ကြောင့် မိုးရွာသွန်းတာနဲ့အတူ လေပြင်းတိုက်ခတ်တာ၊ မိုးထစ်ချုန်းတာ၊ မိုးကြိုးပစ်တာနဲ့ လျှပ်စီးလက်တာတွေ ဖြစ်ပေါ်နိုင်တဲ့အတွက် ကြိုတင်သတိပြုနေထိုင်ကြဖို့ မိုးဇလက အသိပေးထားပါတယ်။
“မိုးဦးနဲ့ မိုးနှောင်းကာလမှာ နေပူတလှည့်မိုးရွာတလှည့်နဲ့ မိုးထစ်ချုံးတာ မိုးကြိုးပြစ်တာ တိမ်တောင်တွေတလျှောက် လေပြင်းတိုက်တာတွေဖြစ်တတ်တယ်။ လေဖိအားနည်းရှိတော့ ပိုဖြစ်နိုင်တာပေါ့။ လေဖိအားနည်းဆိုတာကတော့ မုန်တိုင်းလောက်တော့မပြင်းပါ” လို့ မိုးဇလတာဝန်ရှိသူတစ်ဦးက ပြောပါတယ်။
ဒါ့အပြင် ပြည်တွင်းလေကြောင်းပျံသန်းရေးနဲ့ မြန်မာ့ကမ်းရိုးတန်းတစ်လျှောက်နဲ့ ကမ်းလွန် ပင်လယ်ပြင်မှာရှိတဲ့ ကမ်းနီး၊ ကမ်းဝေးငါးဖမ်းရေယာဉ်တွေ သင်္ဘောတွေအနေနဲ့လည်း ကြိုတင်သတိပြုဖို့ မိုးဇလက အသိပေးထုတ်ပြန်ထားတာ ဖြစ်ပါတယ်။
