ဘားအံမြို့နယ်က ကျေးရွာတွေအချို့မှာ အကြမ်းဖက်နယ်ခြားစောင့်တပ် (BGF) က ဒေသခံရပ်မိရပ်ဖတွေကို ခေါ်တွေ့ပြီး အုပ်ချုပ်ရေးမှူးလုပ်ဖို့ အဓမ္မစေခိုင်းညွှန်ကြားခဲ့တယ်လို့ ကေအဲန်ယူရဲ့ ထုတ်ပြန်ချက်အရ သိရပါတယ်။
ကေဲအန်ယူ တပ်မဟာ ၁ ဘားအံမြို့နယ် တကောင်ဘိုးကျေးရွာအုပ်စုက ဂျို့ပင်ဆိပ်၊ မြိုင်၊ ကုန်းတန်းကြီးနဲ့ မီးပုံးကျေးရွာတွေက ရပ်မိရပ်ဖနဲ့ ဂေါပကတွေကို ပြီးခဲ့တဲ့အောက်တိုဘာ ၃ ရက်က နယ်ခြားစောင့်တပ် ၁၀၁၄ တပ်ရင်းက တပ်ခွဲမှူး ဗိုလ်တင်ဝင်းက ခေါ်ယူတွေ့ဆုံခဲ့တာပါ။
အဲ့ဒီလိုခေါ်ယူတွေ့ဆုံရာမှာ ဗိုလ်တင်ဝင်းက ရပ်မိရဖတွေကို တစ်လသူကြီး (အုပ်ချုပ်ရေးမှူး) ဒါမှမဟုတ် ၁၅ ရက်အုပ်ချုပ်ရေးမှူး စနစ်နဲ့အုပ်ချုပ်ဖို့ အမိန့်ပေးညွှန်ကြားခဲ့တယ်လို့ သိရပါတယ်။
ဂျို့ပင်ဆိပ်ကျေးရွာက တစ်လသူကြီး ၂ ဦး၊ မြိုင်ကျေးရွာက တစ်လသူကြီး ၂ ဦး၊ မီးပုံးကျေးရွာက တစ်လသူကြီး ၄ ဦးနဲ့ ကုန်းတန်းကြီးရွာက ၁၅ ရက်သူကြီး ၃ ဦးတို့ကို အောက်တိုဘာ ၅ ရက်နေ့နောက်ဆုံးထားပြီး ရွေးချယ်ဖွဲ့စည်းပေးဖို့ BGF က အမိန့်ပေးညွှန်ကြားခဲ့တယ်လို့ ကေအဲန်ယူက ထုတ်ပြန်ထားတာပါ။
Public Service Announcement
ကေအဲန်ယူ တပ်မဟာ ၁ နယ်မြေ ဘားအံမြို့နယ်မြောက်ဘက်ပိုင်းက တကောင်ဘိုးကျေးနယ်ဘက်မှာ တိုက်ပွဲတွေဖြစ်ပွားနေတာနဲ့ ကျေးရွာအုပ်ချုပ်ရေးမှူးတွေ အသတ်ခံရတာရှိနေတာကြောင့် ဒေသခံပြည်သူတွေက ကြောက်ရွံ့ပြီး ဘယ်သူကမှ အုပ်ချုပ်ရေးမှူးနေရာကို မလုပ်ရဲကြဘူးလို့ ဒေသခံတစ်ဦးက ပြောပါတယ်။
“အခုကတိုက်ပွဲဖြစ်နေတော့ လူကြီးလုပ်မပျော်ဘူးလေ။ လူကြီးကကြားညှပ်တာကိုး။ စစ်တပ်ကခေါ်လိုက် ကေအဲန်ယူက ခေါ်လိုက်ဆိုတော့ ဘယ်သူမှမလုပ်တော့ အဲ့ဒါမလုပ်မနေရပုံစံမျိုးဖြစ်တယ်။ ကျနော်တို့ဒီဘက်မှာ လုပ်တာ အဲ့ဒီပုံစံမျိုးပဲလေ။ သူကြီးကိုလာပစ်သတ်သွားတာကိုး။ သူကြီးသေသွားတာလေ အဲ့ဘက် ၂ ယောက်သေသွားတယ် ။ဘယ်သူမှမလုပ်ရဲတော့ဘူး။ ကြားညှပ်တာပေါ့။ ကျနော်တို့မှာ ၁ လသူကြီးရှိတယ် ၃ လသူကြီးရှိတယ် အဲ့လိုမျိုး။ လုပ်မပျော်တော့ အလှည့်ကျပေါ့။ မဲနှိုက်ပေါ့။ နင်မဲပေါက်ရင် နင်လုပ် ငါမဲပေါက်ရင် ငါလုပ်ပေါ့ အမျိုးသမီးလည်းပါတာပဲ။ ကျနော်တို့ဘက် ဟိုးအရင်ကတည်းက ဖြစ်ခဲ့တာလေ။ လူကြီးမရှိရင်အဆင်မပြေဘူးလေ။ သွားရဆိုရလုပ်ရကိုင်ရ အဆင်မပြေဘူးဆိုတော့ တခုခုဆိုရင် လူကြီးကိုပဲမှာတာကို ။ ကေအဲန်ယူကလာရင် လူကြီးကိုလှမ်းပြောတာပေါ့။ စစ်တပ်က လာရင် လူကြီးကိုလှမ်းပြောတယ် အဲ့လိုမျိုး” လို့ ဒေသခံတစ်ဦးက ပြောပါတယ်။
အဲ့ဒီလို ရွေးချယ်ဖွဲ့စည်းပေးလိုက်တဲ့ ရွာအုပ်ချုပ်ရေးမှူးတွေရဲ့ဖုန်းနံပါတ်တွေကို BGF က ယူထားပြီး သက်ဆိုင်ရာကျေးရွာတွေမှာ KNU/KNLA တပ်ဖွဲ့တွေ သွားလာလှုပ်ရှားမှုရှိပါက BGF တပ်ဖွဲ့ထံ အမြန်ဆုံးသတင်းပို့ဖို့ အမိန့်ပေးညွှန်ကြားထားသေးတယ်လို့ ကေအဲန်ယူ ဘားအံမြို့နယ်တာဝန်ရှိသူတစ်ဦးထံကနေ သိရပါတယ်။
“ကျနော်တို့ဘက် ဟိုးအရင်ကတည်းက ဖြစ်ခဲ့တာလေ။ ခေတ်ကနောက်ပြန်ဆွဲသွားပြီလေ။ လွန်ခဲ့တဲ့အနှစ် ၂၀ က ပုံစံပြန်ဖြစ်သွားတာပေါ့။ လွန်ခဲ့တဲ့ နှစ် ၂၀ ၃၀ က သူကြီးမျိုးရှိခဲ့တာကို ဒီပုံစံမျိုးပဲ” လို့ ကေအဲန်ယူ တပ်မဟာ ၁ နယ်မြေက ဒေသခံပြည်သူတစ်ဦးက ပြောပြပါတယ်။
အခုလို နယ်ခြားစောင့်တပ် (BGF) က ဒေသခံပြည်သူလူထုသဘောထား ဆန္ဒမပါပဲ ကျေးရွာအုပ်ချုပ်ရေးမှူးလုပ်ဖို့ အတင်းအဓမ္မ ခိုင်းစေညွှန်ကြားတာဟာ စစ်ရေးအရ ဒေသခံလူထုကို အသုံးချတာနဲ့ အကြမ်းဖက်ခိုင်းစေတာဖြစ်တယ်လို့ ကေအဲန်ယူ ဒူးသထူခရိုင်တာဝန်ရှိသူတစ်ဦးက သုံးသပ်ပါတယ်။
ပြီးခဲ့တဲ့လတွေက ဘားအံမြို့နယ် တကောင်ဘိုးကျေးနယ်ဘက်က ရွာတွေအနေနဲ့ တစ်ရွာကိုတစ်ယောက် စစ်မှုထမ်းရမယ်လို့ နယ်ခြားစောင့်တပ် (BGF) ၁၀၁၄ တပ်ရင်းက တပ်ခွဲမှူးဗိုလ်တင်ဝင်းက ကျေးရွာလူကြီးတွေကို အသိပေးပြောကြားခဲ့သေးတယ်လို့ ကေအဲန်ယူရဲ့ ထုတ်ပြန်ချက်အရ သိရပါတယ်။
