မန္တလေးခရိုင်အတွင်း မြို့နယ်တွေ က ရပ်ကွက်လမ်းနေရာတွေမှာ စစ်ကောင်စီဟာ အင်အားအများအပြားအသုံးပြုပြီး ဒီနေ့မနက်ပိုင်းက စစ်ဆေးတာတွေပြုလုပ်နေပါတယ်။
သက်ဆိုင်ရာမြို့နယ်တွေရဲ့ လမ်းဆုံလမ်းခွနေရာတွေ ၊ လူအသွားအလာများတဲ့ ရပ်ကွက်တွေရဲ့ လမ်းနေရာတွေနဲ့ အဓိကလမ်းမကြီးတွေမှာ စစ်တပ်၊ ရဲနဲ့ သက်ဆိုင်ရာအုပ်ချုပ်ရေးအဖွဲ့တို့ပူးပေါင်းပြီး စစ်ဆေးနေတာဖြစ်ပါတယ်။
“ကျွန်တော်က လမ်း၁၂၀နဲ့ ၅၈လမ်းနေရာမှာ အစစ်ခံခဲ့ရတာ။ ဆိုင်ကယ်တူးဘောက်တွေဖွင့်စစ်တယ်။ နောက်ပြီး ဖုန်းပါတဲ့လူဆို ဖုန်းတွေပါ စစ်တာ” လို့ဒီမနက် ၁၀နာရီလောက်က စစ်ဆေးခံရသူတစ်ဦးကပြောပါတယ်။
မနက် ၉နာရီလောက်ကစတင်ပြီး ကန်တော်ကြီးမီးပွိုင့်အနီးနေရာတွေ ၊ ၁၀၇လမ်း ၊လမ်း၇၀အနီးနေရာတွေ ၊၆၂လမ်း စက်မှုပန်းခြံလမ်း၊၆၂လမ်း ၊ကုတင်၃၀၀၊ရှမ်းလေးကျွန်းလမ်းဆုံးစတဲ့နေရာတွေနဲ့ မြို့တွင်းလမ်းမတွေမှာပါစစ်ဆေးနေတာဖြစ်ပါတယ်။
Public Service Announcement
” ဒီနေ့မနက်ကတော့ တော်တော်ကိုကြမ်းတယ် စစ်ဆေးတာ။ အရင်က တနေရာစစ်ရင် သူတို့နဲ့ထိတ်တိုက်မဆုံချင်ရင် ရှောင်သွားလို့ရတယ် ဒီနေ့ကျတော့ အခု ဒီလမ်းမှာစစ်တယ်နော် နောက်လမ်း၂ပြလောက်နေရင် သူတို့ကရှိနေပြန်ကောပဲ “လို့ အောင်မြေသာစံမြို့နယ်မှာ စစ်ဆေးခံခဲ့ရတဲ့ အမျိုးသားတစ်ဦးကပြောပါတယ်။
စစ်ကောင်စီတပ်ဖွဲ့ဝင်တွေဟာ မန္တလေးမှာ အဖွဲ့ပေါင်းစုံပါဝင်တဲ့ သိန်းငှက်စစ်ဆင်ရေးလို့ အမည်ပေးထားတဲ့ စစ်ဆင်ရေးကို ပြီးခဲ့တဲ့တစ်ပတ်ကျော်ခန့်က စတင်လုပ်ဆောင်နေတယ်လို့သိရပါတယ်။
