တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) ၆နှစ်ပြည့် နှစ်ပတ်လည် အခမ်းအနားသို့ တက်ရောက်ခဲ့မှုသည် ဗဟိုကော်မတီ၏ သဘောထား မဟုတ်ကြောင်း NCA ထိုးထားသည့် မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး(ABSDF)က ထုတ်ပြန်သည်။
NCA လက်မှတ်ထိုးထားသည့် လက်နက်ကိုင် ၁၀ဖွဲ့အနက် အောက်တိုဘာ ၁၅ရက်က ကျင်းပသည့် NCA နှစ်ပတ်လည်ပွဲသို့ ABSDF အပါအဝင် လက်နက်ကိုင် ၈ဖွဲ့တက်ရောက်ခဲ့ပြီး ကရင်အမျိုးသား အစည်းအရုံး(KNU)နှင့် ချင်းအမျိုးသားတပ်ဦး(CNF)တို့ မတက်ရောက်ခဲ့ပေ။
NCA ၆ နှစ်မြောက် နှစ်ပတ်လည်အခမ်းအနား တက်ရောက်ခြင်းကိစ္စ နှင့်ပတ်သက်၍ ABSDF ဗဟိုကော်မတီ၏ သဘောထားကို ယနေ့ ထုတ်ပြန်ရာ NCA ၆ နှစ်ပြည့် နှစ်ပတ်လည်အခမ်း အနားသို့ တက်ရောက်ခဲ့ခြင်းသည် ဗဟိုကော်မတီ၏ သဘောထားမဟုတ်ကြောင်း၊ ယင်းအခမ်းအနားတွင် တက်ရောက်ပြောကြားချက်များသည် တက်ရောက်သူ၏ ပုဂ္ဂိုလ်ရေး ပြောကြားချက်သာ ဖြစ်ကြောင်း၊ ယင်းအခမ်း အနားသို့ တက်ရောက်ခဲ့ခြင်းသည် အခြေအနေအပေါ်မူတည်ပြီး ပါဝင်ဆောင်ရွက်ခဲ့သူ များ၏ တာဝန်ယူ တာဝန်ခံမှုဖြင့် ဆောင်ရွက်ခဲ့ခြင်းသာဖြစ်ကြောင်း ဖော်ပြသည်။
စစ်ကောင်စီက ကျင်းပသည့် NCA ၆နှစ်ပြည့်ပွဲသို့ တက်ရောက်ခဲ့သည့် အဖွဲ့များမှာ ရှမ်းအဖွဲ့(RCSS)၊ ပအိုဝ်းအဖွဲ့(PNLO)၊ မွန်အဖွဲ့(NMSP)၊ ရခိုင်အဖွဲ့(ALP)၊ ကရင်အဖွဲ့ DKBAနှင့် ကရင်ငြိမ်းချမ်းရေးကောင်စီ(KNLA-PC)၊ လားဟူအဖွဲ့(LDU)နှင့် ABSDF တို့ဖြစ်ပြီး စစ်ကောင်စီနှင့် ပူးပေါင်းသည့် ယင်းအဖွဲ့များ၏ လုပ်ရပ်ကို အထွေထွေသပိတ် ပေါင်းစပ်ညှိနှိုင်းရေးအင်အားစု(GSCB)က ပြင်းထန်စွာ ကန့်ကွက် ကြောင်း ထုတ်ပြန်ခဲ့သည်။