NLD ပါတီ သဘာပတိ တစ်ဦးဖြစ်တဲ့ ဦးဝင်းထိန် ကို ဒီနေ့ နေပြည်တော် တရားရုံးက နိုင်ငံတော်အကြည်ညိုပျက်စေမှုပုဒ်မ နဲ့ ထောင်ဒဏ် နှစ် ၂၀ ချလိုက်တယ်လို့ သိရပါတယ်။
ဖေဖော်ဝါရီလ ၁ ရက် အာဏာသိမ်းချိန်က စစ်ကောင်စီဟာ သမ္မတ ၊နိုင်ငံတော်အတိုင်ပင်ခံအပါအဝင် NLD ထိပ်ပိုင်းခေါင်းဆောင်တွေကို ဖမ်းဆီးခဲ့ပေမယ့် NLD သဘာပတိအဖွဲ့ဝင် ဦးဝင်းထိန်ကို မဖမ်းခဲ့ပါဘူး။
ရွေးကောက်ပွဲအနိုင်ရ NLD အစိုးရ ကိုဖြုတ်ချပြီး အာဏာသိမ်းတဲ့လုပ်ရပ်ကို NLD ပါတီခေါင်းဆောင်တစ်ဦးအနေနဲ့ ပြောသင့်ပြောထိုက်တာ ပြောရမှာဖြစ်ပြီး ဒီလိုပြောတဲ့အတွက် သူ့ကိုလည်း ဖမ်းဆီးလိမ့်မယ်လို့ ဖေဖော်ဝါရီလ ၁ ရက် က မီဒီယာတွေနဲ့ နေပြည်တော်မှာတွေ့ချိန်မှာ ဦးဝင်းထိန်က ပြောခဲ့ပါတယ်။
ဦးဝင်းထိန်က မီဒီယာတွေကို ပြောရာမှာ ပြည်သူတင်မြှောက်ထားတဲ့ သမ္မတ နဲ့အတိုင်ပင်ခံကိုဖမ်းလိုက်ကတည်းက မင်းအောင်လှိုင်ဟာ မထူးဇာတ်ခင်းသွားပြီဖြစ်ပြီး အာဏာသိမ်းတာဟာ နိုင်ငံအတွက်မဟုတ်ဘဲ သူရဲ့ကိုယ်ရေးကိုယ်တာဆန္ဒတွေကြောင့်ဖြစ်တယ်လို့ ပြောပါတယ်။
Public Service Announcement
ဒါအပြင် တိုင်းပြည်မှာကိုဗစ်ဖြစ်ပြီး စီးပွားရေးကျချိန်အာဏာသိမ်းတာဟာ အမျှော်အမြင်နည်းပြီးအမြင်ကျဉ်းမြောင်းရာလည်းရောက်တယ်လို့ ဆိုပါတယ်။
မင်းအောင်လှိုင်နဲ့မိသားစု တိုင်းပြည်မှာ ကျိကျိတက်ချမ်းသာနေပြီး ဒီပုဂ္ဂိုလ်တွေအာဏာသိမ်းတာဟာ တိုင်းပြည်နစ်နာတာကြောင့် အဲဒီလို လူမျိုးကို တပ်မတော်ခေါင်းဆောင်တွေ ဆက်ထောက်ခံရင် တပ်မတော်ဟာ အစကတည်းက ပြည်သူမထောက်ခံရာကနေ ပြည်သူရွှံရှာတဲ့ တပ်ဖြစ်မယ်လို့ ဖေဖော်ဝါရီလ ၁ရက်မှာ ဦးဝင်းထိန်က ပြောပါတယ်။
နိုင်ငံသူ နိုင်ငံသားတွေအနေနဲ့လည်း အာဏာသိမ်းတဲ့ လုပ်ရပ်ကို တတ်နိုင်သမျှ ဆန့်ကျင်ပေးဖို့ CDM နည်းနဲ့ဆန့်ကျင်ပေးကြဖို့ ဦးဝင်းထိန်က စစ်တပ်အာဏာသိမ်းတဲ့နေ့မှာတင် မီဒီယာတွေကတဆင့် တိုက်တွန်းခဲ့ပါတယ်။
အဲဒီနောက် စစ်ကောင်စီဟာ ဦးဝင်းထိန် ကို ဖမ်းကာနေပြည်တော်အချုပ်ထောင် ပို့ပြီး နိုင်ငံတော်အကြည်ညိုပျက်စေမှု ပုဒ်မ ၁၂၄ (က) နဲ့တရားစွဲဖမ်းဆီးထားလိုက်တာပါ။
ဒီနေ့မှာတော့ အဲဒီပုဒ်မ နဲ့ ထောင်ဒဏ် နှစ် ၂၀ချလိုက်ပြီးအသက် ၈၀ အရွယ်ရှိဖြစ်တဲ့ဦးဝင်းထိန်ကို ထောင်ချပြီး အိုးဘိုထောင်ကိုပို့မယ်လို့သိရပါတယ်။
Photo – epa
