အမျိုးသားညီညွတ်ရေးအစိုးရ(NUG)၊ ပြည်ထောင်စုလွှတ်တော်ကိယ်စားပြုကော်မတီ(CRPH)နဲ့ အခြားသော ဒီမိုကရေစီအင်အားစုများအပါအဝင် သက်ဆိုင်သူအားလုံးပါဝင်တဲ့နိုင်ငံရေးဆွေးနွေးမှုကသာ တိုင်းပြည်ရဲ့ အကျပ်အတည်းကိုအဆုံးသတ်နိုင်ဖို့ တစ်ခုတည်းသောအဖြေဖြစ်တယ်လို့ ပြင်သစ်သံရုံးက ဒီနေ့(နိုဝင်ဘာ ၃ ရက်)ထုတ်ပြန်ပါတယ်။
ကုလသမဂ္ဂအထွေထွေအတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးသံတမန်အဖြစ် Mrs. Noeleen Heyzer အား ခန့်အပ်ခြင်းကို ပြင်သစ်နိုင်ငံက ကြိုဆိုလိုက်ပြီး အပြည့်အ၀ ထောက်ခံတယ်လို့ ထုတ်ပြန်ချက်မှာ ဖော်ပြပါတယ်။
အထူးသံတမန်ဟာ မြန်မာ့နယ်မြေဒေသအားလုံးကို ဘေးကင်းလုံခြုံပြီး အဟန့်အတားမရှိ ဝင်ရောက်သွားလာနိုင်ခွင့် အာမခံချက်အပြင် ၎င်းရဲ့ အရေးကြီးတဲ့ လုပ်ငန်းမူဘောင်အတွင်းမှ သက်ဆိုင်ရာလူများ၊ ပါတီများအားလုံးနဲ့ ဆွေးနွေးနိုင်ဖို့ အရေးကြီးတယ်လို့ ပြင်သစ်သံရုံးက တိုက်တွန်းပါတယ်။
ဒါ့အပြင် ဖေဖော်ဝါရီ ၁ ရက် အာဏာသိမ်းပြီးနောက် မြန်မာလုံခြုံရေးတပ်ဖွဲ့တွေ ကျူးလွန်တဲ့ အကြမ်းဖက်မှုတွေကို အဆုံးသတ်ဖို့ ပြင်သစ်က ထပ်မံတောင်းဆိုလိုက်ပါတယ်။
Public Service Announcement
မတရားဖမ်းဆီးထိန်းသိမ်းထား သူများအားလုံးကို ခြွင်းချက်မရှိ အမြန်ဆုံးပြန်လွှတ်ပေးဖို့နဲ့ ၂၀၂၀ အထွေ ထွေရွေးကောက်ပွဲ ရလဒ်၊ မြန်မာပြည်သူလူထုရဲ့ဆန္ဒကို အပြည့်အဝလေးစားလိုက်နာဖို့ ပြင်သစ်က ထပ်မံတောင်းဆိုပါတယ်။
(ပုဂံမြို့၌ ဆန္ဒပြတောင်းဆိုနေသည်ကို မတ်လ၅ရက်က တွေ့ရစဥ်၊ ဓာတ်ပုံ – Win Min Oo)
