တနင်္သာရီတိုင်း ထားဝယ်-မြိတ်အဝေးပြေးကားလမ်း
ပေါ်တွင်စစ်ကောင်စီ၏ ရဲကားတစ်စီးယနေ့( နိုဝင်ဘာ ၁၃ ရက်) မနက်ပိုင်းက မိုင်းခွဲတိုက်ခိုက်ခံရပြီးရဲ ရှစ်ဦးဒဏ်ရာရရှိခဲ့ကြောင်း ဒေသခံများကပြောသည်။
တနင်္သာရီတိုင်း၊ ထားဝယ်ခရိုင်၊ သရက်ချောင်းမြို့နယ်၊ ရငဲ နဲ့ ကတွဲရွာကြားတွင် ယနေ့ မနက် ၁၀နာရီခွဲခန့်က မိုင်းခွဲတိုက်ခိုက်ခဲ့ခြင်းဖြစ်ပြီး အကြမ်းဖက်စစ်ကောင်စီလက်အောက်ခံရဲတပ်သား ၈ယောက် ဒဏ်ရာရရှိသွားသည်ဟု ဒေသခံအချို့ကပြောသည်။ ထိုအပြင် မိုင်းခွဲတိုက်ခိုက်မူကြောင့် ရဲတပ်သားတစ်ဦးသေဆုံးသည်ဟု ဆိုသော်လည်း People’s Spring ကသီးခြားအတည်ပြုနိုင်ခဲ့ခြင်းမရှိပေ။ ထိုတိုက်ခိုက်မူကို မည်သည့်အဖွဲ့အစည်းက ဆောင်ရွက်သည်ဟုလည်း သတင်းထုတ်ပြန်ခြင်းမရှိသေးပေ။
“မိုင်းခွဲခံရလို့ ရွာတွေဘက်ကို တစ်နာရီကျော်လောက် သေနတ်တွေ လိုက်ပစ်နေတယ်၊ လုပ်တဲ့သူတွေကိုတော့ မမီလိုက်ဘူး”ဟု ဒေသခံတစ်ဦးကပြောသည်။
အကြမ်းဖက်စစ်ကောင်စီ၏ ရဲကားတိုက်ခိုက်ခံရပြီး ရဲများက လမ်းသွားလမ်းလာများကို ဖမ်းဆီးစစ်ဆေးများ ပြုလုပ်သည်ဟုလည်း ဒေသခံများကဆိုသည်။
Public Service Announcement
ထိုအတူ ထားဝယ်ခရိုင်၊လောင်းလုံမြို့နယ်၊ ကျောက်နီမော်ရွာတွင်လည်း အကြမ်းဖက်စစ်ကောင်စီတပ်၏ယာဥ်တစ်စီးကို လောင်းလုံမြို့နယ် ပြည်သူကာကွယ်ရေးတပ်ဖွဲ့က
နိုဝင်ဘာ ၁၂ ရက် ည ၆ နာရီခန့်ကမိုင်းခွဲတိုက်ခိုက်ခဲ့သေးသည်။
လောင်းလုံမြို့တွင် ပြုလုပ်သည့် ဒေသခံ ပျူစောထီးအစည်းအဝေးကို တက်ရောက်ရန် ပျူးစောထီးများနှင့် အကြမ်းဖက်စစ်ကောင်စီတပ်သားတို့ အဆိုပါယာဉ်တွင်လိုက်ပါလာခြင်းဖြစ်သည်ဟု ဒေသခံများကပြောသည်။
ထိုမိုင်းခွဲတိုက်ခိုက်မူကြောင့် ဒဏ်ရာရရှိမူများရှိသော်လည်း သေဆုံးသူမရှိကြောင်း ဒေသခံများထံမှသိရသည်။
