စစ်တပ်ပိုင် Mytel ဆက်သွယ်ရေးကုမ္ပဏီရဲ့ ဘဏ္ဍာရေးအမှုဆောင်အရာရှိချုပ် သေနတ်နဲ့ပစ်သတ်ခံရမှုမှာ ပါဝင်သူ ၄ ဦးကို ဖမ်းမိထားတယ်လို့ စစ်ကောင်စီက သတင်းထုတ်ပြန်ထားပါတယ်။
Mytel ကုမ္ပဏီရဲ့ အကြီးအကဲ ဗိုလ်မှူးဟောင်း ဦးသိန်းအောင်နဲ့ဇနီးဟာ နိုဝင်ဘာလ ၄ ရက်မနက်ပိုင်းက မရမ်းကုန်း ၊တေးနုယဉ်လမ်း မှာရှိတဲ့နေအိမ်ကနေ လမ်းလျှောက်ထွက်ချိန်မှာ သေနတ်နဲ့ပစ်ခံခဲ့ရတာပါ။
ဒီပစ်ခတ်မှုမှာ ဦးသိန်းအောင် ဟာ သေဆုံးသွားပြီးအမျိုးသမီးကတော့ ဒဏ်ရာရသွားခဲ့တယ်လို့သိရပါတယ်။
အဲဒီဖြစ်စဉ်နဲ့ပတ်သက်ပြီး အမျိုးသမီး ၁ ဦးအပါအဝင် ၄ ဦးကို ဖမ်းမိထားတယ်လို့ စစ်ကောင်စီက ဒီနေ့မှာ သတင်းထုတ်ပြန်ထားပါတယ်။
ဖမ်းဆီးဖို့ ၂ ဦးကျန်သေးတယ်လို့လည်း စစ်ကောင်စီရဲ့သတင်းထုတ်ပြန်ချက်မှာ ဖော်ပြထားတာတွေ့ရပါတယ်။
စစ်ကောင်စီက စွပ်စွဲဖမ်းခံရသူတွေကတော့ အသက် ၁၉ နှစ်အရွယ် လူငယ်အမျိုးသား ၊ အသက် ၃၅ နှစ်အရွယ် အမျိုးသား ၊ အသက် ၂၃ နှစ်အရွယ် လူငယ်အမျိုးသား နဲ့ အသက် ၂၄ နှစ်အရွယ် လူငယ်အမျိုးသမီး တွေဖြစ်တာကိုတွေ့ရပါတယ်။
သူတို့ ၄ ဦးကို မင်္ဂလာဒုံ ၊ လှိုင် ၊ တိုက်ကြီး တို့မှာ ဖမ်းမိတယ်လို့စစ်ကောင်စီကဆိုထားပါတယ်။