လှိုင်သာယာမြို့နယ် ရန်ကုန်-ပုသိမ်လမ်းမကြီးဘေးရှိ စစ်ကောင်စီ၏စီမံခန့်ခွဲရေးရုံးကို ၄၀ မမဗုံးသီးဖြင့် ပစ်ခတ်တိုက်ခိုက်ခဲ့ကြောင်း လှိုင်သာယာမြို့ပြပြောက်ကျားတပ်
(CGF-HTY)ကယနေ့(နိုဝင်ဘာ ၂၃)ထုတ်ပြန်သည်။
တိုက်ခိုက်ခံရသည့် စစ်ကောင်စီ၏ စီမံခန့်ခွဲရေးရုံးမှာ လှိုင်သာယာအဝေးပြေးဝင်းအနီးတည်ရှိပြီး ရန်ကုန်တိုင်းစစ်ကောင်စီမှ ဗျူဟာမှူးတစ်ဦးအထိုင်ချတပ်စွဲရာ ဝါဝါဝင်းစီမံခန့်ခွဲရေးရုံးဟု CGF-HTY က အတည်ပြုသည်။
စစ်ကောင်စီ၏ စီမံခန့်ခွဲရေးရုံးအား တိုက်ခိုက်မှုကို ယနေ့(နိုဝင်ဘာ ၂၃) နေ့လယ် ၁ နာရီ ၄၅ မိနစ်ခန့်တွင်ပြုလုပ်ခဲ့ပြီး M79 Grenade launcher ဖြင့် 40 mmဗုံးသီးတစ်လုံး ပစ်ခတ်ခဲ့သည်ဟု CGF ထုတ်ပြန်ချက်တွင် ဖော်ပြသည်။
“ထိခိုက်မှုက ဗုံးသီးက သူတို့ အဲ့ဝင်းထဲက အိမ်ပေါ်ကိုကျတာခင်ဗျ။ အဲ့တော့ အဲအိမ်ထဲ စခတွေရှိမှ ထိမှာ”ဟု လှိုင်သာယာမြို့ပြ ပြောက်ကျားတပ်ဖွဲ့ဝင်တစ်ဦးက ပြောသည်။
Public Service Announcement
အထက်ပါပစ်မှတ်နေရာအား အောက်တိုဘာ ၂၂ ရက်နေ့ကတကြိမ် အဝေးထိန်းဗုံးများဖြင့် တိုက်ခိုက်ရန်ပြင်ဆင်ခဲ့သော်လည်း အမှိုက်ကောက်သမား ကြောင့် စစ်ဆင်ရေး ပျက်ပြယ်ခဲ့ဖူးသည်။
လက်ရှိအခြေအနေတွင် CGF-HTY မှ လှိုင်သာမြို့နယ်အတွင် မဟူရာစစ်ဆင်ရေးဟုအမည်ပေးထားသည့် စစ်ဆင်ရေးတစ်ခုအား အရှိန်မြှင့် ဆောင်ရွက်လျက်ရှိရာ ပြည်သူများအသွားအလာ သတိပြုကြရန် ၎င်းတို့က အသိပေးထားသည်။
လှိုင်သာယာမြို့နယ်အတွင်း ယမန်နေ့(နိုဝင်ဘာ ၂၂)ကလည်း နေရာ ၅ နေရာ၌ ပေါက်ကွဲမှုများဖြစ် ပွားခဲ့သေးသည်။
