မြန်မာပလာဇာရှိ ဆိုင်ခန်းအားလုံးကို ယနေ့ မနက်ကတည်းက ပိတ်ထားပြီး အာဏာသိမ်းစစ်ကောင်စီတပ်သားများနှင့် ၎င်းတို့လက်အောက်ခံ ရဲများကလုံခြုံရေးတင်းကျပ်စွာယူထားကြသည်။
ယမန်နေ့ (နိုဝင်ဘာ ၂၅ရက်နေ့)ကရန်ကုန်မြို့ ကမ္ဘာအေးဘုရားလမ်းပေါ်ရှိ မြန်မာပလာဇာတွင်ငြိမ်းချမ်းစွာဆန္ဒပြနေသောလူငယ်များကို လုံခြုံရေးဝန်ထမ်းများ ဝိုင်းဝန်းထိုးကြိတ်ဖမ်းဆီးသဖြင့် အဆိုပါလုပ်ရပ်အပေါ်ပြည်သူများကရှုတ်ချပြီးနောက် ပလာဇာရှိ ဆိုင်အားလုံးပိတ်ထားကြ
ခြင်းဖြစ်သည်။ဆိုင်များပိတ်ထားပြီး ခြောက်ကပ်နေသော ဗီယက်နမ်နိုင်ငံသားပိုင် မြန်မာပလာဇာတွင် အကြမ်းဖက်စစ်ကောင်စီက လုံခြုံရေးအမြောက်အများချထားသည်ကိုတွေ့ရသည်။
“ပလာဇာကတော့ ဖွင့်ထားတယ်။ ဒါပေ့မယ့် အထဲဆိုင်တွေကလုံခြုံရေးအရပိတ်ကြတယ်။ အကုန်လုံးပိတ်ထားကြတယ်”ဟု မြန်မာပလာဇာမှ ဆိုင်ဝန်ထမ်းတစ်ဦးကပြောသည်။
ငြိမ်းချမ်းစွာဆန္ဒပြခဲ့သော ပြည်သူများကို မြန်မာပလာဇာလုံခြုံရေးဝန်ထမ်းများကဝိုင်းဝန်းထိုးကြိတ်ကန်ကျောက်ပြီးဖမ်းဆီးရန်ကြိုးပမ်းခဲ့သဖြင့် ပြည်သူများက မြန်မာပလာဇာကို သပိတ်မှောက်ရန် ယမန်နေ့ညနေမှစ၍တိုက်တွန်းခဲ့သည်။ ထိုတိုက်တွန်းမူနှင့်အတူ ဆိုင်အများစုကလည်း မြန်မာပလာဇာရှိ ၎င်းတို့ဆိုင်များနှင့်ဆိုင်ခွဲများကို ယာယီပိတ်သိမ်းကြောင်းကြေငြာခဲ့ကြသည်။
မြန်မာပလာဇာဘက်ကလည်း ထိုကိစ္စရပ်အပေါ် အနူးအညွတ်တောင်းပန်ကြောင်း ယမန်နေ့ကထုတ်ပြန်ခဲ့သည်။ ထိုသို့မလျော်ကန်သော အပြုအမူများထပ်မံမဖြစ်ပွားစေရန် စည်းမျဉ်းစည်းကမ်းများကို တိုးမြှင့်သွားမည်ဟုလည်းဆိုသည်။
အမျိုးသားညီညွတ်ရေးအစိုးရ၊ ပြည်ထဲရေးနှင့်လူဝန်မူကြီးကြပ်ရေးဝန်ကြီးဌာနက မြန်မာပလာဇာကို ပြည်သူဗျူဟာချမှတ်ပြီး ပစ်မှတ်ထား သပိတ်မှောက်ကြရန် ယနေ့တိုက်တွန်းလိုက်သည်။ ထိုသို့လုပ်ဆောင်ခြင်းမှာလဲ အကြမ်းဖက်စစ်ကောင်စီ စီးပွားရေးဒေါက်တိုင်များ ချိနဲ့ အားနည်းစေရန်အတွက်ဖြစ်သည်ဟု အထက်ပါဝန်ကြီးဌာနဝန်ကြီး ဦးလွင်ကိုလတ်က ဆိုသည်။ မြန်မာပလာဇာသည် ပြည်သူ့ဆန္ဒကို သွေဖီပြီး အကြမ်းဖက်စစ်တပ်ဖက် ဖက်လိုက်ခြင်းဖြစ်၍ မြန်မာပလာဇာကို မသွားရန်၊ ဈေးမဝယ်ရန်နှင့် ဆိုင်မဖွင့်ရန်စသည့်တိုဖြင့် သပိတ်မှောက်ရန် တိုက်တွန်းထားသည်။
NUG ဒုတိယဝန်ကြီးဒေါက်တာတူးခေါင်ကလည်း “လူနည်းနည်းလေး ဆန္ဒပြတယ် ထင်ပြီး အာဏာပြ အဓမ္မဆန်ခဲ့တဲ့ မြန်နာ ပလာဇာ ကတော့ ကောင်းကောင်း သင်ခန်းစာ ရသွားလောက်ပြီ။အားမသန်လို့သာ မာန်လျှော့ထားတဲ့ လူတွေအများကြီး။ ဒီနေရာမှာတော့ ညီလိုက်ကြတာ။ ငွေကုန်လဲ သက်သာ အာဏာရှင်လဲ ဆန့်ကျင်ပြီးသား ဖြစ်သွားတာပေါ့။ပြည်သူတွေ ရဲ့ ပါဝင်မှုကို အသိအမှတ်ပြုပါတယ်။” ဟု ၎င်း၏ဖေစ်ဘွခ်တွင်ရေးသားထားသည်။
ပြည်သူများကလည်း မြန်မာပလာဇာကို ပုံစံမျိုးစုံဖြင့် သပိတ်မှောက်၊ကန့်ကွက်နေကြပြီး ၊Google Map တွင် မြန်မာပလာဇာနေရာကို ဘောမပလာဇာဟု ပြည်သူအချို့က အမည်ပေးထားကြသည်။