မန္တလေး-ရွှေဘိုလမ်းမကြီးပေါ်တွင် ယမန်နေ့ညက အကြမ်းဖက်စစ်ကောင်စီတပ်များ နှစ်ကြိမ်တိုင်မိုင်းဆွဲတိုက်ခိုက်ခံရပြီး သေဆုံး၊ထိ့ခိုက်မှုများရှိနိုင်ကြောင်း
ဒေသခံများကပြောသည်။
ယမန်နေ့( နိုဝင်ဘာလ ၂၈ ရက်) ည ၉ နာရီအချိန်ကစစ်ကိုင်းမှ ထွက်လာသော အကြမ်းဖက်စစ်ကောင်စီ၏ ကား ၁၁ စီးပါသော ယာဥ်တန်းကိုရွှေဘို-မန္တလေးလမ်းပေါ်တွင် ပဒေသာမိုင်း ၈ လုံးဖြင့် မိုင်းဆွဲတိုက်ခိုက်ခဲ့ရာ အကြမ်းဖက်စစ်ကောင်စီ၏ တပ်သားများ အများအပြားထိခိုက်ဒဏ်ရာ ရရှိခဲ့ပြီး သေဆုံးမှုများလည်းရှိခဲ့ကြောင်း ဝက်လက်မြို့နယ် ပြည်သူ့ကာကွယ်ရေးတပ်ဖွဲ့က သတင်းထုတ်ပြန်သည်။
အထိအခိုက်ကျဆုံးမှုအခြေအနေ အတိအကျကို သီးခြားအတည်ပြုနိုင်ခြင်းမရှိကြောင်း၊ ဝက်လက်မြို့နယ် ပြည်သူ့ကာကွယ်ရေးတပ်ဖွဲ့ဘက်မှ အောင်မြင်စွာဆုတ်ခွာနိုင်ခဲ့ပြီး အထိအခိုက်အကျအဆုံးမရှိကြောင်း ဝက်လက်မြို့နယ် ပြည်သူ့ကာကွယ်ရေးတပ်ဖွဲ့က အသိပေးသည်။
အလားတူ ရွှေဘို-မန္တလေးလမ်း၊ ရွာသာကြီးနှင့် ဆားတောင်မြို့ကြားတွင် စစ်သား ငါးဆယ်ခန့်ပါသော ကားတစ်စီးအား ယမန်နေ့ည ၉း၄၅အချိန်က အဝေးထိန်းစနစ်ဖြင့် မိုင်းဆွဲတိုက်ခိုက်ခဲ့ကြောင်း၊ စစ်ကားသည် မိုင်းမိသောနေရာတွင်ထိုးရပ်သွားခဲ့ပြီး စစ်ကောင်စီ တပ်သားများထိခိုက်မှုရှိနိုင်ကြောင်း၊ မိမိတို့ဘက်မှ အောင်မြင်စွာ ဆုတ်ခွာနိုင်ခဲ့ကြောင်း မြင်းဖြူရှင်အဖွဲ့က သတင်းထုတ်ပြန်သည်။
Public Service Announcement
နိုဝင်ဘာလ ၂၇ ရက် ည ၁၀း၃၀ အချိန်ကလည်း စစ်ကိုင်းရွှေဘိုလမ်းမကြီးပေါ်၌ အကြမ်းဖက်စစ်ကောင်စီ၏ စစ်ကိုင်းအခြေစိုက် တပ်မ ၃၃ တပ်သားများလိုက်ပါလာသော စစ်ကား ၃ စီးကို မိုင်းဆွဲတိုက်ခိုက်ခဲ့ရာ အကြမ်းဖက်စစ်ကောင်စီတပ်သား ၁၈ ဦးခန့် ထိခိုက်ဒဏ်ရာရရှိခဲ့ပြီး သေဆုံးမှုများလည်းရှိခဲ့သည်။
စစ်ကိုင်းတိုင်းအတွင်းရှိ မန္တလေး-မြင်းမူ-မုံရွာလမ်းပိုင်း၊ မန္တလေး-အရာတော်-မုံရွာလမ်းပိုင်း၊ မန္တလေး-ရွှေဘို-မုံရွာလမ်းပိုင်း၊ ပခုက္ကူ-ချောင်းဦး-မုံရွာလမ်းပိုင်းများအား နိုဝင်ဘာလ ၂၈ ရက်နေ့ ည ၇း၁၅ နာရီမှစတင်ကာအသုံးပြုခြင်း လုံးဝ(လုံးဝ) မပြုလုပ်ကြရန် ချောင်းဦးနှင့်မုံရွာ ပြည်သူ့ကာကွယ်ရေးတပ်ဖွဲ့များကအသိပေးထားသည်။
