ကလေးမြို့ အင်ဒိုင်းလေး ခမရ(၃၆၃)ခြေမြန်တပ်ရင်းမှ တပ်ကြပ်ကြီးစာရေးဖြစ်သူ Mang Bawi Hring (ကိုယ်ပိုင်အမှတ် တ/၄၉၇၉၇၆)နှင့် အခြားနှစ်ဦးတို့သည် အာဏာသိမ်းစစ်ကောင်စီ၏ မတရားမှုများကို ဆန့်ကျင်ပြီး ချင်းကာကွယ်ရေးတပ်ဖွဲ့-ကလေး၊ကဘော်၊ ဂန့်ဂေါ(CDF-KKG)ထံ ပူးပေါင်းလာကြောင်း အဆိုပါအဖွဲ့က ယနေ့ ထုတ်ပြန်သည်။
အဆိုပါ တပ်မတော်သားသုံးဦးအပါအဝင် CDF-KKG မှတစ်ဆင့် CDMပြုလုပ်ပြီး အလင်းဝင်ရောက်လာသူ အရေအတွက် စုစုပေါင်းခြောက်ဦးအထိ ရှိပြီးဖြစ်သည်ဟု ဆိုသည်။
လက်နက်၊ကျည်အပြည့်အစုံဖြင့် လာရောက်သူများကိုသာ လုံခြုံစိတ်ချရသော နယ်မြေသို့ ပို့ဆောင်ပေးသွားမည်ဖြစ်ပြီး ထိုက်သင့်သော ဆုကြေးကိုလည်း ချီးမြင့်သွားမည် ဖြစ်ကြောင်း၊ လက်နက်၊ကျည် မပါသူများကိုမူ တာဝန်ယူတော့မည် မဟုတ်ပါကြောင်းလည်း CDF-KKGက အသိပေးထားသည်။
