ကယားပြည်နယ်၊ချင်းပြည်နယ်နဲ့ စစ်ကိုင်းတိုင်းပြီးရင် မကွေးတိုင်းက အာဏာသိမ်းစစ်ကောင်စီတပ်တွေကို ပြည်သူတွေက လက်နက်ဆွဲကိုင်ခုခံတော်လှန်တာအားအကောင်းဆုံးဒေသတစ်ခု ဖြစ်ပါတယ်။ မကွေးတိုင်းမှာ ယောဒေသပြည်သူကာကွယ်ရေးတပ်(YDF) ကအကြမ်းဖက်စစ်ကောင်စီကို အထိနာအောင် အစွမ်းကုန်ခုခံကာကွယ်တိုက်ခိုက်နေတဲ့ တပ်ဖွဲ့ဖြစ်ပါတယ်။ချင်းတောင်က ချင်းဒေသကာကွယ်တပ်(CDF)တွေ၊စစ်ကိုင်းတိုင်းက ပြည်သူ့ကာကွယ်ရေးတပ်တွေ နဲ့ပါပူးပေါင်းပြီး စစ်ကောင်စီတပ်တွေကို တိုက်ခိုက်တာရှိသလို ၊ ဒေသအလိုက်YDF တပ်တွေအနေနဲ့ တိုက်ခိုက်နေတာတွေရှိပါတယ်။ နိုဝင်ဘာအတွင်းက တချို့တိုက်ပွဲတွေမှာစစ်ကောင်စီတပ်တွေ အထိနာလို့ ရဟတ်ယာဥ်တွေပါအသုံးပြုခဲ့ရတာရှိပါတယ်။အကြမ်းဖက်စစ်ကောင်စီကစစ်ကြောင်းထိုးပြီး ဖိနှပ်မှုတွေတိုးလုပ်လာပေမယ့် ယောဒေသပြည်သူ့ကာကွယ်ရေးတပ်သားတွေက နောက်မတွံဘဲရဲရင်စွာ ခုခံတော်လှန်တိုက်ခိုက်နေကြပါတယ်။ ယောတပ်သားတွေ နေ့စဥ်ဘဝမှာ နေထိုင်ရတာ၊စားသောက်ရတာ၊အိပ်စက်နေရတဲ့အခြေအနေကို YDF ကဒီကနေ့ထုတ်ပြန်ပါတယ်။အာဏာသိမ်းစစ်ကောင်စီကိုဖြုတ်ချဖို့ တိုက်ပွဲဝင်နေတဲ့ယောတပ်သားတွေရဲ့ နေစဥ်ဘဝကိုတစ်ချက်လောက်ကြည့်ကြရအောင်။
“တောထဲမှာ နေရတဲ့ တပ်သားတစ်ယောက်ရဲ့ နေထိုင်စားသောက်မှုဘဝဟာ ခက်ခဲကြမ်းတမ်းမယ်ဆိုတာကို အကြမ်းဖျင်း သိကြမှာပါ။
တောထဲရောက်နေရတာမို့ ပျော်ပါး၊ သွားလာ၊ စားသောက်ရတဲ့ ဘဝကို အတိတ်မှာ ချန်ခဲ့ရပါတယ်။ တပ်သား ဘဝမို့ မှက်ကိုက်၊ ခြင်ကိုက်၊ ချမ်းချမ်းအေးအေးနဲ့ တောထဲမှာ နေပြီး ပြည်သူတွေရဲ့ အသက်အိုးအိမ်စည်းစိမ်တွေကို အကြမ်းဖက် စစ်အုပ်စုရဲ့ ရန်ကနေ ကာကွယ်ဖို့ အမြဲအသင့်ဖြစ်နေရတာပါ။
ယောဒေသမှာ ဆောင်းရာသီဟာ အင်မတန် ချမ်းအေးလှပါတယ်။ ဒီလို ချမ်းအေးမှုထဲ အိမ်က စောင်ပုံထဲ ကွေးကွေးလေး အိပ်နေချင်ပါတယ်။ သို့သော် လက်တွေ့ဘဝမှာတော့ ခြုံစောင်ပင် အလောက်အငမရှိ။ ရဲဘော်တို့အတွက် မွေ့ယာဟာ တစ်ခါတရံ ဝါးကြမ်းခြင်း ဖြစ်ပြီး၊ ကင်းစောင့်ရတဲ့အခါမှာတော့ သင်ပင်ဟာ မွေ့ယာပါပဲ။ (ညကင်းဆို သစ်ပင်မှီရင်း ငိုက်ရတာကိုး)
ရဲဘော်တွေဟာ လူသားတွေမို့ အိမ်ကို လွမ်းကြပါတယ်။ သို့သော် တောရိပ်ခိုပြီး အကြမ်းဖက်မှုတွေကို တိုက်ဖျက်ဖို့ ထွက်လာကတည်းကနေ အခုအထိ လွမ်းပါရက်နဲ့ အိမ်မပြန်နိုင်ခဲ့ကြပါဘူး။ အိမ်ရှိတဲ့ အရပ်ကို မျက်နှာမူပြီး ငေးကြည့်ရုံနဲ့ အလွမ်းဖြေကြရပါတယ်။
Public Service Announcement
ဘယ်လိုပဲ ဖြစ်ဖြစ် တော်လှန်ရေးကာလအတွင်းမှာ အသက်ပေးသွားခဲ့ကြတဲ့ ကျဆုံးရဲဘော်များကို တိုင်တည်ပြီး စစ်အာဏာရှင် အမြစ်ပြတ်သည်အထိ တိုက်ပွဲဝင်သွားမယ်ဆိုတဲ့ သစ္စာဓိဌာန်ကို ချထားသူများပီပီ နောက်ပြန်လှည့်ဖို့ စိတ်တောင် မကူးကြပါဘူး။
စားသောက်တာမှာလည်း အိမ်မှာဆို အသားတစ်မယ်နှင့် အရံဟင်းနှစ်မယ်လောက်ပါမှ စားလို့အဆင်ပြေတယ်ဆိုတဲ့ လူငယ်တွေဟာ တောထဲမှာဆို ပဲပြုတ်တစ်မယ်နဲ့လည်း စားကြတာပါပဲ။ ရှူးရှဲတစ်ထုတ် ဟာလည်း ထမင်းတစ်နပ်ဖြစ်ကြတာပါပဲ။
ဒေါင်းလန်းကြီးနဲ့ လက်ဆုံ ထမင်းစားတယ် ဆိုတာကို စာတွေထဲ တွေ့ဖူးပေမယ့် ငှက်ပျောရွက်ထဲ အလယ်မှာ ထမင်းပုံပြီး ရူးရှဲတစ်ထုတ်ကို ဖောက်ပြီး အလယ်ပုံထမင်းထဲက လိုသလောက် ယူပြီး နယ်ဖတ်စားရတာဟာ မကြာခဏ ဖြစ်နေတာမို့ စာပေထဲက ဘဝကို လက်တွေ့ပိုင်ဆိုင်နေကြတယ်လို့ စိတ်ကူးနဲ့ ပျော်အောင် ကျေနပ်နေကြသူတွေပါ။
နေထိုင်ရတာ ခက်ခဲလား ဆိုတော့ ခက်ခဲပါတယ်။ စားသောက်ရတာ ခက်ခဲလားဆို ခက်ခဲပါတယ်။ အိမ်ပြန်ပြီး မိဘအိမ်မှာ အေးအေးချမ်းချမ်း နေပါလား ဆိုရင်တော့
အာဏာရှင်တွေ အမြစ်ပြတ်မှ အိမ်ပြန်မယ် ဆိုတဲ့ အဓိဌာန်ဟာ ယောဒေသ ပြည်သူ့ကာ ကွယ်ရေးတပ်သားများရဲ့ ဆုံးဖြတ်ချက် တစ်ခု ဖြစ်နေတာကြောင့်
အာဏာရှင် အမြစ်ပြတ်တဲ့နေ့ရောက်ရင် အိမ်က ထမင်းဝိုင်းမှာ ဟင်းကောင်းကောင်းနဲ့ စားပြီး ဆောင်းညတွေရဲ့ အအေးထဲမှာ အိပ်ယာပေါ်က စောင်ပုံထဲ ဇိမ်နဲ့ အိပ်တော့မယ်။
အခုတော့ ပြည်သူတွေ အာဏာရှင်လက်အောက်က လွတ်ဖို့ ယောတပ်သားတွေ ဆက်လက်တိုက်ပွဲ ဝင်နေပါဦးမယ်”လို့ ဓာတ်ပုံတွေနဲ့တစ်ကွ ဖော်ပြထားပါတယ်။
