NLD ပါတီနာယကဦးတင်ဦးရဲ့ ရန်ကုန်က နေအိမ်ကို ဒီနေ့မနက်ပိုင်း ၉ နာရီခွဲလောက်က စစ်ကောင်စီခေါင်းဆောင်မင်းအောင်လှိုင်လာရောက်သွားပါတယ်။
ဘာကြောင့်လာရောက်တာလဲဆိုတာကိုတော့အကြောင်းရင်းမသိရသေးပါဘူး။
“မနေ့ထဲက နေအိမ်ကိုလုံခြုံရေးတွေချထားတယ်။ မိုင်းရှင်းတာတွေဘာတွေလုပ်ပြီး လုံခြုံရေးယူထားတယ်လို့သိရတယ်” လို့ ဦးတင်ဦးမိသားစုနဲ့ နီးစပ်သူတစ်ဦးက ပြောပါတယ်။
နာယကဦးတင်ဦးဟာအသက် ၉၀ ကျော်အရွယ်ရှိပြီဖြစ်ပြီး ၂၀၁၇ ခုနှစ်အတွင်းက နေအိမ်က ရေချိုးခန်းမှာချော်လဲပြီး လေဖြတ်ဝေဒနာခံစားနေရပြီး စကားလည်းမပြောနိုင်တဲ့ အခြေအနေဖြစ်ပါတယ်။
အမျိုးသားဒီမိုကရေစီအဖွဲ့ချုပ်ကိုတည်ထောင်သူတစ်ဦးဖြစ်တဲ့ ဦးတင်ဦးဟာ တပ်မတော်ကာကွယ်ရေးဦးစီးချုပ်ဟောင်းလည်းဖြစ်ပါတယ်။
မင်းအောင်လှိုင်ဟာ လာရောက်ဂါရဝပြုတာလို့ ဦးတင်ဦးရဲ့မြေးမြစ်သူကဖေ့ဘွတ်ခ်မှာရေးသားထားပါတယ်။
နာယကကြီးဦးတင်ဦးဟာ အသက်အရွယ်ကြီးရင့်နေပြီးလေဖြတ်ထားသူလည်းဖြစ်လို့ လမ်းလည်းမလျောက်နိုင်သလို စကားလည်းမပြောနိုင်တော့တာကြောင့် အိမ်အထိလာရောက်တွေ့ဆုံသူကိုငြင်းပယ်မရတဲ့အခြေအနေနဲ့ လက်ခံတွေ့ဆုံလိုက်ရတာလို့ရှင်းပြထားပါတယ်။
တွေ့ဆုံချိန်မှာလည်း ဦးတင်ဦးဟာ ပင်နီတိုက်ပုံဝတ်ပြီးတွေ့ဆုံခဲ့တာလို့သိရပါတယ်။
ဒါဟာ လေဖြတ်ထားလို့စကားမပြောနိုင်ပေမယ့် သူရဲ့စိတ်သဘောထားကိုပြသလိုက်တာလို့ မြေးဖြစ်သူကဆိုထားပါတယ်။
ဒီကနေ့ရန်ကုန်ကို မင်းအောင်လှိုင်ရောက်နေပြီး ဒီကနေ့မနက်လူငယ်တွေရဲ့သပိတ်ကို သူ့တပ်ဖွဲ့ဝင်တွေက ကားနဲ့တိုက်ဖြိုခွင်းဖမ်းဆီးခဲ့လို့ ၄ ဦးထပ်မနည်းသေဆုံးဒဏ်ရာရခဲ့ပါတယ်။