မန္တလေးတိုင်း သပိတ်ကျင်းမြို့နယ်တွင် စစ်ကောင်စီကိုထောက်ခံသောစျေးဆိုင်တစ်ဆိုင်သေနတ်ဖြင့် ပစ်ခတ်သတိပေးခံရပြီးနောက် လာရောက်စစ်သည့် စစ်ကောင်စီတပ်သားအချို့ မိုင်းဆွဲတိုက်ခိုက်ခံရကြောင်း ဒေသခံများကပြောသည်။
ယမန်နေ့ (ဒီဇင်ဘာ ၄ ရက်) ည၉နာရီဝန်းကျင်က သပိတ်ကျင်းမြို့နယ် ၊ ချောင်းကြီးအုပ်စု၊ကျောက်ဖြူကျေးရွာရှိ စစ်ကောင်စီထောက်ခံသည့်ကုန်စုံဆိုင်ပစ်ခတ်ခံရခြင်းဖြစ်ပြီး ချောင်းကြီးကျေးရွာဘက်မှ တတ်လာသော စစ်ကောင်စီတပ်ဆိုင်ကယ်နှစ်စီးကို မိုင်းဆွဲတိုက်ခိုက်ခံရကြောင်း ဒေသခံများက ပြောသည်။
ကျောက်ဖြူကျေးရွာမှ ဒလန်အား သေနတ်လေးချက်ဖောက်၍ သတိပေးခြင်းနှင့် လာစစ်ဆေးသည့် ချောင်းကြီးဘက်မှတက်လာသော စစ်ကောင်စီ ဆိုင်ကယ်နှစ်စီးအား မိုင်းဆွဲခြင်းသည် ဗိုလ်လင်းယုန် အဖွဲ့မှ လုပ်ဆောင်ခြင်းဖြစ်ပြီး ဆိုင်ကယ်မိုင်းဆွဲခံရမှုတွင် စစ်ကောင်စီဘက်မှ အနည်းဆုံးနှစ်ဦး ထိခိုက်နိုင်ကြောင်း ဗိုလ်လင်းယုန်အဖွဲ့က အသိပေးသည်။
“ကျောက်ဖြူမှာ ၉နာရီလောက်ကဖြစ်ပြီး သေနတ်သံတွေကြားတယ်။ ဆိုင်ကယ်မောင်းသံကြားပြီး ၉နာရီ ၂၀ လောက် ထပ်ကွဲသံကြားတယ်။ သေနတ် ဆက်တိုက်ပစ်တာအချက် ၂၀၊ ၃၀ လောက်ရှိမယ်”ဟု ဒေသခံတစ်ဦးက ပြောသည်။
Public Service Announcement
ပစ်ခတ်ခံရသည့် ကုန်စုံဆိုင်သည် ကျောက်ဖြူကျေးရွာ ရွာအလယ် လမ်းမဘေးတွင်တည်ရှိပြီး အဆိုပါဆိုင်ပိုင်ရှင်သည် ပြီးခဲ့သည့် ၂၀၂၀ ရွေးကောက်ပွဲကာလတွင် ၎င်း၏ ဆိုင်ရှေ့တွင် ကြံ့ခိုင်ရေးအလံများ စိုက်ထူခြင်း ၊ နေအိမ်တစ်အိမ်တွင် အလံတခုစိုက်ထူပါက ၂၀၀၀ ကျပ်ပေးကာ မဲဆွယ်စည်းရုံးမှူ့များပြုလုပ်ခြင်း၊
စစ်ကောင်စီမှ အာဏာသိမ်းပြီးနောက် ၎င်းတို့၏ ဆိုင်အတွင်းတွင် တပ်မတော်အား ထောက်ခံကြိုဆိုပါသည်ဟူသော စာတမ်းများအား ချိတ်ဆွဲခဲ့ခြင်းလည်းပြုလုပ်ခဲ့ကြောင်း သပိတ်ကျင်းဒေသခံအချို့က ပြောသည်။
ပစ်ခတ်မှု ဖြစ်ပွားခဲ့ပြီးနောက် ၁၅မိနစ်ခန့်အကြာတွင် ချောင်းကြီးရဲကင်းသို့ ဖုန်းဆက်ခေါ်ခဲ့သဖြင့် စစ်သားရဲသားများ ရောက်ရှိလာပြီး လမ်းတွင်မိုင်းဆွဲခံခဲ့ရခြင်းဖြစ်ကြောင်း ဒေသခံများက ပြောသည်။
