အသံတိတ်သပိတ်ပြုလုပ်မည့် ဒီဇင်ဘာ၁၀ ရက်တွင် ရန်ကုန်မြို့တွင်း ပစ္စည်းပို့ဆောင်မှုပြုလုပ်ပေးနေသည့် လုပ်ငန်းများကို ရပ်နားထားကြောင်း Delivery လုပ်ငန်းရှင်များက အသီးသီးကြေညာထားကြသည်။
“Delivery မနက်ဖြန်နားပါတယ်။ ၁၁ ရက်နေ့မှပြန်ထွက်ပါမယ်။ လက်ကျန် Way အကုန်ဖြတ်ပြီးပါပြီ။ ဖုန်းစက်ပိတ်ထားပါမယ်” ဟု သန့်ဇင် Delivery က ၎င်း၏ ဖေ့စ်ဘွတ်ခ်၌ ရေးသားထားသည်။
အလားတူ ရန်ကုန်မြို့တွင်း ပစ္စည်းပို့ဆောင်ပေးနေသည့် လုပ်ငန်းများက ဒီဇင်ဘာ ၁၀ ရက်တွင် တစ်ရက်တာ လုပ်ငန်းရပ်နားမည်ဖြစ်ကြောင်း ကြေညာထားသည်။
“10 Dec 2021 မှာ Deli ပို့ခြင်းတစ်ရက်နားပါမည်။ OSနှင့် Cus များလည်း ပူပေါင်းပါဝင်မည်ဟု ယုံကြည်ပါသည်။” ဟု Delivery လုပ်ငန်းလုပ်သည့် ကိုအတာဦးကလည်းဆိုရှယ်မီဒီယာကတဆင့် ကြေညာထားသည်။
Delivery လုပ်ငန်းလုပ်ကိုင်သူများအနေဖြင့် ၎င်းတို့တတ်နိုင်သည့် ဘက်ကပါဝင်ပေးခြင်းဖြစ်ပြီး အားလုံးပါဝင်ပေးရန် Wow Delivery လုပ်ငန်းက မေတ္တာရပ်ခံထားသည်။
ပြီးခဲ့သည့် လအတွင်းက မြန်မာပလာဇာ၌ ငြိမ်းချမ်းစွာ ဆန္ဒထုတ်ဖော်သည့် လူငယ်များကို အကြမ်းဖက်ခဲ့သောကြောင့် မြန်မာပလာဇာသို့ ပစ္စည်းပို့ခြင်းမပြုလုပ်ကြောင်း Delivery လုပ်ငန်းလုပ်ကိုင်သူများက ကြေညာခဲ့သည်။