မကွေးတိုင်း ဂန့်ဂေါမြို့နယ်ပြည်သူ့ကာကွယ်ရေးအဖွဲ့ (ပကဖ-ဂန့်ဂေါ)၏ အခြေခံစစ်ပညာသင်တန်းဆင်းပွဲသို့ အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာန ပြည်ထောင်စုဝန်ကြီး ဦးရည်မွန်က သဝဏ်လွှာပေးပို့ခဲ့ရာ ရန်သူကို ပြတ်သားစွာ တိုက်ခိုက်ရန် မှာကြားခဲ့သည်။
ပကဖ(ဂန့်ဂေါ)၏ အခြေခံစစ်ပညာသင်တန်း အပတ်စဉ် (၂)သင်တန်းဆင်းပွဲကို ဒီဇင်ဘာ ၉ရက်က ကျင်းပခဲ့ခြင်းဖြစ်သည်။
“ငါတို့နိုင်ငံနဲ့ နိုင်ငံသားတွေဟာ သုံးနှုန်းစရာ စကားလုံးမရှိအောင်ကို လူစိတ်ကင်းမဲ့တဲ့ အဖွဲ့အစည်းနဲ့ ရင်ဆိုင်နေရတာဖြစ်တယ်။ငါတို့ တကယ့်ရန်သူကို ပြတ်ပြတ်သားသား ခုခံတွန်းလှန် တိုက်ခိုက်ဖို့ မှာကြားလိုတယ်”ဟု ဝန်ကြီးဦးရည်မွန်က မှာကြားသည်။
ကာကွယ်ရေးဝန်ကြီးဌာနအနေဖြင့် စစ်အာဏာရှင် စနစ် အမြစ်ဖြတ်ချေမှုန်းနိုင်ရေးနှင့် ဖက်ဒရယ်ဒီမိုကရေစီ နိုင်ငံသစ် ပေါ်ပေါက်လာရေးအတွက် ခုခံတွန်းလှန်တိုက်ခိုက်မည့် တိုက်ပွဲဝင် စစ်သည်တော်များ မွေးထုတ်နိုင်ရန် ကြိုးစားခဲ့ကြောင်း၊ဂန့်ဂေါမြို့နယ်၌ အခြေခံ စစ်ပညာသင်တန်း အပတ်စဉ် (၂)သင်တန်းဆင်းပွဲကို ရောက်ရှိခဲ့ပြီး သင်တန်းဖြစ်အောင် ဆောင်ရွက်ပေးသည့် တာဝန်ရှိသူများနှင့် ဦးဆောင်သူများအားလုံးကို လေးစားကျေးဇူးတင်ကြောင်း ဝန်ကြီးက ဆိုသည်။
“ငါတို့ မူလပိုင်ဆိုင်ထားတဲ့ အခြေခံလူ့အခွင့်အရေးတွေ ဆုံးရှုံးခဲ့တာ ၁၀လကျော်ကြာခဲ့ပြီး ဆုံးရှုံးသွားတဲ့ ငါတို့ရဲ့ ဒီမိုကရေစီနဲ့ လူ့အခွင့်အရေး ပြန်ရယူဖို့အတွက် တိုက်ပွဲဝင်မယ့် တရားသော ခုခံတွန်းလှန်စစ်ဖြစ်တယ်ဆိုတာ အသိပေးလိုတယ်။ရဲဘော်တို့ဟာ မကြာခင် တရားသော ခုခံတွန်းလှန်စစ်ကို ကိုယ်တိုင်ပါဝင်ဆင်နွှဲကြရတော့မယ်။ ငါတို့ တပ်မတော်ဟာ ကျင့်ဝတ်ရိုသေမှုနဲ့ စည်းကမ်းလိုက်နာမှုမှာ စံနမူနာ ပြဖြစ်နေရမယ်။ ပြည်သူ့ ကာကွယ်ရေးတပ်မတော်က ချမှတ်ထားတဲ့ စစ်သည်တော်ဆိုင်ရာ ကျင့်ဝတ်တွေနဲ့ လက်တွေ့မြေပြင်မှာ ကျင့်သုံးရမယ့် စည်းမျဥ်းစည်းကမ်းတွေကို မဖြစ်မနေ လိုက်နာကျင့်သုံး ဆောင်ရွက်ကြမယ်လို့ ယုံကြည်တယ်” ဟု ဝန်ကြီး ဦးရည်မွန်က ပြောသည်။
တရားသော ခုခံတွန်းလှန်စစ်သည် အနှေးနှင့်အမြန် မုချအောင်မြင်မည်ဖြစ်ကြောင်း၊ အောင်မြင်စေရန် အားလုံးက ကျရာတာဝန်ကျေပွန်အောင်လုပ်ဆောင်ရမည်ဖြစ် ကြောင်း ဝန်ကြီးက ဆိုသည်။
“အမိ မြန်မာနိုင်ငံတော်ရဲ့ အနာဂတ်ဟာ ငါတို့အားလုံးရဲ့ လက်ထဲကို ရောက်ရှိနေပါပြီ။ ငါတို့အားလုံးက ကိုယ်စီကျရာတာဝန်ထမ်းဆောင်ရင်းနဲ့ အနာဂတ် ဖက်ဒရယ် ဒီမိုကရေစီ နိုင်ငံတော်သစ် တည်ဆောက် ရေး အတွက် ဇွဲ လုံ့လ၊ ဝီရိယ တို့ကို အရင်းတည်ပြီး အားအင်အပြည့်နဲ့ ပြင်ဆင်ထားကြပါလို့ တိုက်တွန်းပြောကြားလိုပါတယ်” ဟု ဝန်ကြီး ဦးရည်မွန်က ပြောသည်။