မှောင်ခိုဈေးကွက်(ပြင်ပဈေးကွက်)တွင် ဒေါ်လာဈေးပြန်လည်မြင့်တက်လာပြီး တစ်ဒေါ်လာကို ကျပ် ၁၉၀၀ကျော်ဈေးပေါက်ကြောင်း ဒေါ်လာအရောင်းအဝယ်လုပ်နိုင်နေသူများကပြောသည်။
ဗဟိုဘဏ်က ငွေစက္ကူအသစ်များ ရိုက်နှိပ်ရန် ငွေစက္ကူများ ပြည်ပမှ တင်သွင်းလာခြင်းကြောင့် မှောင်ခိုဈေးကွက်တွင် ဒေါ်လာဈေးမှာ ကျပ် ၁၉၁၀ ကျော်အထိ မြင့်တက်လာခြင်းဖြစ်သည်။ နိုဝင်ဘာ လဆန်းမှစ၍တစ်ဒေါ်လာလျှင် ၁၈၅၀ကျပ် အထိကျဆင်းခဲ့သည့် ဒေါ်လာဈေးသည် ဒီဇင်ဘာ ၁၁ ရက်တွင် တစ်ဒေါ်လာကို ၁၉၁၀ ကျပ် အထိပြည်လည်မြင့်တက်လာခြင်းဖြစ်သည်။
“ဈေးပြန်တက်တာ သုံးရက်လောက်ရှိပါပြီ။ အဓိကကျပ်ငွေ အသစ်တွေရိုက်ထုတ်မယ့်ဆိုတဲ့ သတင်းအရလူတွေကဒေါ်လာကိုပြန်ဝယ်လာကြတာပါ”ဟုဒေါ်လာအရောင်းအဝယ်လုပ်နေသူတစ်ဦးကပြောသည်။
ဈေးကွက်အတွင်း ဒေါ်လာလိုအပ်ချက်ကို စစ်ကောင်စီထိန်းချုပ်ထားသည့် ဗဟိုဘဏ်က မဖြည့်တင်းပေးနိုင်ကြောင်းနှင့် လက်ရှိတွင် ဒီဇင်ဘာလအတွင်း ဒေါ်လာ ၂၃ သန်းသာထုတ်ရောင်းနိုင်ခဲ့သည်ဟု၎င်းကဆက်ပြောသည်။
ထိုပြင်စစ်ကောင်စီ၏ဗဟိုဘဏ်က နှစ်သောင်းကျပ်တန်နှင့် ငါးသောင်းကျပ်တန်ငွေစက္ကူများရိုက်နှိပ်မည့်မဟုတ်ကြောင်းနှင့် ငွေစက္ကူအသစ်ရိုက်နှိပ်ပါကလူထုကို ကြိုတင်အသိပေးမည်ဖြစ်ကြောင်းဒီဇင်ဘာ၁၀ ရက်တွင်ထုတ်ပြန်ထားသည်။
Public Service Announcement
အကြမ်းဖက်စစ်ကောင်စီကထိန်းချုပ်ထားသောကြောင့်ငွေလဲကောင်တာများတစ် တစ်ဒေါ်လာကို ၁၇၈၃ ကျပ်မှ ၁၇၈၈ ကျပ်အတွင်းသာဈေးဖွင့်ရသည်။ သို့သော်ပြင်ပဈေးကွက်တွင် ဈေးပိုမြင့်နေပြီး ဈေးနှုန်းအမှန်မှာ ပြင်ပဈေးကွက်ပေူက်ဈေးဖြစ်ကြောင်းငွေကြေးရောင်းဝယ်သူများကပြောသည်။
ဧရာဝတီသတင်းဌာနက ဥဇဘက်ကစ္စတန် လေကြောင်းမှ လေယာဉ်တစ်စီးသည် ရန်ကုန်လေဆိပ်တွင် ဒီဇင်ဘာလ ၇ ရက်က ဆိုက်ရောက်လာပြီး ငွေရိုက်နှိပ်ရန် အလေးချိန် ကီလိုဂရမ် ၃ သောင်းခွဲနီးပါးရှိ စက္ကူသေတ္တာ ၉၂ သေတ္တာကို လာရောက်ချသွားကြောင်း ရေးသားဖော်ပြခဲ့သည်။
ထိုသို့ရေးသားဖော်ပြပြီးနောက် ပြည်တွင်းရွှေဈေးနှင့် ဒေါ်လာဈေးမှာ တဖြေးဖြေးပြန်လည်မြင့်တက်လာသည်။ ဒီဇင်ဘာ ၁၀ ရက်တွင် နိုင်ငံအနှံတွင် တိတ်ဆိတ်ခြင်းသပိတ်ပြုလုပ်ခဲ့ခြင်းကြောင့် ဒေါ်လာနှင့် ရွှေအရောင်းအဝယ်များ တစ်ရက်တာ ရပ်တန့်ခဲ့၍ဈေးနှုန်းအတက်အကျမရှိခဲ့ပေ။
ယနေ့(ဒီဇင်ဘာ ၁၁ ရက်) မနက်ပိုင်းတွင် ရန်ကုန်တိုင်းရွှေလုပ်ငန်းရှင်များအသင်း၏ ထိန်းချုပ်မူကြောင့် ရွှေဈေးပြန်ကျဆင်းခဲ့သော်လည်း ဒေါ်လာဈေးမှ ဆက်လက်မြင့်တက်နေဆဲဖြစ်သည်။
ဒီဇင်ဘာ ၉ ရက်က အခေါက်ရွှေတစ်ကျပ်သားကို ကျပ် ၁၈၂၅၀၀၀ကျပ်အထိမြင့်တက်ခဲ့သော်လည်း ဒီဇင်ဘာ ၁၁ ရက်တွင် ၁၇၉၀၀၀၀ကျပ် သို့ပြန်လည်ကျဆင်းခဲ့သည်။
