ပြည်တွင်းငွေကြေးဈေးကွက်တွင် တစ်ဒေါ်လာလျှင်ကျပ် ၄၅၀၀ ကျော်အထိ့ဈေးတက်လာပြီး၊ ဈေးကွက်အတွင်း ဒေါ်လာကို အလုအယက်လိုက်ဝယ်နေကြောင်း ငွေလဲလုပ်ငန်းရှင်များကပြောသည်။
ဈေးကွက်အတွင်းဒေါ်လာဝယ်လိုအားမြင့်တက်နေသော်လည်းရောင်းချမည့်သူမရှိကြောင်း လုပ်ငန်းရှင်များကပြောသည်။
“ဒေါ်လာက ဈေးဖွင့်တယ်ဆိုတာမရှိတော့မရှိတော့ဘူး။ ကြိုက်ရောင်းကြိုက်ဝယ်ပုံစံဖြစ်နေပြီ”ဟု ငွေလဲလုပ်ငန်းရှင်တစ်ဦးကပြောသည်။
စစ်ကောင်စီ၏ ဗဟိုဘဏ်က ၁ ဒေါ်လာလျှင် ၂၁၀၀ ကျပ်သတ်မှတ်ထားသော်လည်း ပြင်ပဈေးကွက်တွင် ၄၅၀၀ ကျော်နေသည့်တိုင် ရောင်းလိုသူမရှိ၍ဒေါ်လာဝယ်ယူလိုသူများက စောင့်ဆိုင်းနေရသည်ဟု ၎င်းတို့ကပြောသည်။
Public Service Announcement
“အခုက ဈေးကွက်အရမဟုတ်တော့ဘူး။ ဘာဖြစ်မယ်ဆိုတာ မသိတော့တဲ့ မသေချာမရေရာတဲ့ အနေအထားကို ရောက်သွားပြီး လူတွေက မနက်ဖြန်ဘာဖြစ်မယ်ဆိုကို မသိတဲ့ အခြေအနေဖြစ်သွားတာ။ ဒါကြောင့် အခုလို ရွှေနဲ့ဒေါ်လာကို လိုက်ဝယ်နေကြတာ”ဟု စီးပွားရေးလုပ်ငန်းရှင်တစ်ဦးကပြောသည်။
ထိုပြင်အခေါက်ရွှေတစ်ကျပ်သား ၃၄သိန်းအထိဈေးတက်လာပြီး ဈေးနှုန်းလည်း မတည်ငြိမ်ကြောင်းလည်း ရွှေလုပ်ငန်းရှင်တစ်ဦးကပြောသည်။
“ရွှေလည်း ဆိုင်တွေက အရောင်းပိတ်ထားလိုက်ပြီး လာရောင်းရင် ဝယ်ပေးတယ်။ ဆိုင်တွေက မရောင်းပေးတော့ဘူး”ဟု လုပ်ငန်းရှင်တစ်ဦးကပြောသည်။
ယနေ့ မနက်ပိုင်းတွင်ရွှေဈေးကို အခေါက်ရွှေတစ်ကျပ်သားကို ကျပ် ၃၃သိန်းခွဲနှင့်တစ်ဒေါ်လာဈေးကို ကျပ် ၄၃၀၀ဖြင့် ဈေးဖွင့်ခဲ့ခြင်းဖြစ်သည်။
ယမန်နေ့(သြဂုတ် ၃၀) ညနေကဒေါ်လာဈေးမှာ ၃၇၀၀ ကျပ်နှင့် ရွှေဈေးမှာကျပ် ၃၂သိန်း ဖြင့်ဈေးပိတ်ခဲ့သည်။
စစ်အုပ်စုအာဏာမသိမ်းခင် ၂၀၂၁ ဇန်နဝါရီလကုန်ပိုင်းက ၁ ဒေါ်လာလျှင် ၁၃၃၇ ကျပ် ၊ရွှေတစ်ကျပ်သားလျှင် ၁၃ သိန်းကျော်သာရှိသည်။
