လတ်တလော စစ်ရေးနှင့် နယ်မြေလုံခြုံရေးအရ မုံရွာ-ဒီပဲယင်း-ရေဦး လမ်းပိုင်းအား သွားလာခွင့် ကန့်သတ်လိုက်သည့် အသိပေးချက်ကို ဂဠုန်တပ်တော် (ဒီပဲယင်း)က ထုတ်ပြန်လိုက်သည်။
အထက်ပါလမ်းပိုင်းတွင် ဒီဇင်ဘာ ၁၁ရက်မှ ဒီဇင်ဘာ ၁၇ ရက်အတွင်း အဝေးပြေးခရီးသည်တင်ယာဥ်များနှင့် ကုန်တင်ယာဥ်များ ဖြတ်သန်းသွားလာခြင်းမပြုရန် ဂဠုန်တပ်တော် (ဒီပဲယင်း)က ပန်ကြားထားသည်။
ထို့အပြင် အိမ်စီးကားများ ဖြတ်သန်းသွားလာမည်ဆိုပါက ကားမှန်များ အောက်ချ၍မောင်းနှင်ရန်၊ အလံဖြူ (သို့မဟုတ် )အဝတ်ဖြူထောင်၍ မောင်းနှင်ကြရန်လည်း အသိပေး ထားသည်။အရေးပေါ်အကြောင်းတစ်စုံတစ်ရာရှိခဲ့ပါက သက်ဆိုင်ရာ ပြည်သူ့ကာကွယ်ရေးတပ်များထံ ဆက်သွယ်အကြောင်းကြားပြီးမှ သွားလာကြရန် အနူးအညွတ်ပန်ကြားအပ်ပါသည်ဟု ဂဠုန်တပ်တော် (ဒီပဲယင်း)က ထုတ်ပြန်ထားသည်။
ဂဠုန်တပ်တော် (ဒီပဲယင်း)သည် အကြမ်းဖက်စစ်ကောင်စီယာဥ်တန်းအား မကြာခဏ မိုင်းခွဲတိုက်ခိုက်နေသည့် ပြည်သူကာကွယ်ရေးတပ်ဖွဲ့ ဖြစ်သည်။ နိုဝင်ဘာ ၁၉ရက်ကလည်း စစ်ကောင်စီခန့် စစ်ကိုင်းတိုင်းဝန်ကြီးချုပ်ရာထူးယူထားသည့် မြတ်ကျော်လိုက်ပါလာသော ယာဥ်တန်းကို မိုင်းခွဲတိုက်ခိုက်ခဲ့သည်။
Public Service Announcement
