စစ်ကောင်စီက မင်းတပ်မြို့နယ်အတွင်း တစ်ကျော့ပြန် ခြေချလာစဥ် ယခင်ကထက် စွမ်းဆောင်ရည်ကောင်းသော တိုက်ခိုက်ရေးပုံစံဖြင့် တုန့်ပြန်မည်ဟု CDF-MINDAT က သတိပေးလိုက်သည်။
ပြီးခဲ့သည့် ဇွန်လအတွင်းက နောက်ဆုံးတိုက်ပွဲဖြစ်ခဲ့သည့် မင်းတပ်မြို့ ဘုရားစခန်းရွာအနီးသို့ အကြမ်းဖက်စစ်ကောင်စီ အင်အား ၈ဝခန့်ဖြင့် ဒီဇင်ဘာ ၁၇ ရက် နံနက်တွင် စစ်ကြောင်းထိုးလာခဲ့သည်။ ထို့ကြောင့် နေ့လယ်ပိုင်းတွင် မင်းတပ် ပြည်သူ့ကာကွယ်ရေးအဖွဲ့ (CDF-MINDAT)နှင့် တစ်ကျော့ပြန်တိုက်ပွဲ ဖြစ်ခဲ့သည်။
အကြမ်းဖက်စစ်ကောင်စီနှင့်CDF-MINDATသည် ဇွန်လ ၄ရက်မှ ဇွန်လ ၆ ရက်အထိ တိုက်ပွဲဖြစ်ခဲ့ပြီး ယင်းအချိန်တွင် နှစ်ဘက်စလုံး အထိနာခဲ့ကြောင်း၊ ယခုအခါ CDF-MINDAT သည် အစစအရာရာ ပိုကောင်းအောင် ဖွဲ့စည်းထားပြီးဖြစ်ကြောင်း CDF-MINDAT သတင်းနှင့်ပြန်ကြားရေးတာဝန်ခံက ပြောသည်။
”သေချာတာကတော့ လက်ရှိ CDF-MINDAT သည် လွန်ခဲ့တဲ့ ၇ လပိုင်း ဝန်းကျင်က CDF-MINDAT မဟုတ်တော့ဘူး။ အင်အား၊ တိုက်ပွဲ၊ နည်းပညာ၊ ဗျူဟာ၊ အတွေ့အကြုံ၊ ပစ်အား အကုန်လုံး ကွာသွားပြီ။ဘာပဲဖြစ်ဖြစ် စောင့်ကြည့်ကြတာပေါ့။ CDF-Mindat ကတော့ အလုပ်နဲ့သက်သေပြတယ်” ဟု ထုတ်ပြန်ထားသည်။
Public Service Announcement
ယနေ့ နေ့လယ်ကစတင်ခဲ့သည့် တစ်ကျော့ပြန်တိုက်ပွဲကြောင့် ဘုရားစခန်းကျေးရွားနှင့် အနီးဝန်းကျင်ကျေးရွာများရှိ ဒေသခံပြည်သူများ ဘေးလွတ်ရာသို့ အရေးပေါ်တိမ်းရှောင်နေရသည်ဟု မင်းတပ်မြို့ ပြည်သူ့အုပ်ချုပ်ရေးအဖွဲ့က သတင်းထုတ်ပြန်ထားသည်။
ယခုအခါ အကြမ်းဖက်စစ်ကောင်စီတပ်များမှာ စစ်ကိုင်း၊ချင်း၊ ကရင်၊ကယား၊မကွေး၊ရှမ်းစသောဒေသအများစုတွင် စစ်ကြောင်းထိုးလာသဖြင့် တိုင်းရင်းသားလက်နက်ကိုင်အဖွဲ့များ၊ ဒေသခံပြည်သူ့ကာကွယ်ရေးတပ်ဖွဲ့များက ခုခံတော်လှန်စစ်ဆင်နွှဲနေရာ စစ်ကောင်စီတပ်အထိ့နာလျှက်ရှိသည်။
