ရန်ကုန်တိုင်း ခရမ်း-သုံးခွလမ်းပိုင်း လက်ပံကျိုးကျေးရွာအနီးတွင် ယနေ့(ဒီဇင်ဘာ ၂၀)နံနက်ပိုင်းက စစ်ကောင်စီတပ် ၏ ကားနှစ်စီး မိုင်းခွဲတိုက်ခိုက်ခံခဲ့ရကြောင်း ဒေသခံများက ပြောသည်။
ယနေ့နံနက် ၉ နာရီခန့်က ရိက္ခာတင်စစ်ကားနှစ်စီးကို သုံးခွမြို့နယ် လက်ပံကျိုးကျေးရွာ ဖက်ကလီရိုးတံတားအနီး တိုက်ခိုက်ခံရခြင်းဖြစ်ပြီး စစ်ကောင်စီဘက်မှ ထိခိုက် ကျဆုံးမှုအခြေအနေအား မသိရသေးပေ။
“သေချာတော့ မသိရသေးဘူး။ အွန်လိုင်းပေါ်ပြန့်နေတဲ့အတိုင်း စစ်ကားနှစ်စီး လက်ပံကျိုးနား တိုက်ခိုက်ခံရတယ်လို့ပဲ သိရသေးတယ်။ မြို့ပေါ်မှာတော့ ပုံမှန်အခြေအနေပါပဲ”ဟု သုံးခွမြို့ခံတစ်ဦးက ပြောသည်။
ဒီဇင်ဘာ ၁၆ ရက် ခရမ်းမြို့နယ်အတွင်း စစ်ကောင်စီတပ်စွဲထားသည့် နေရာနှစ်ခုကို ပြည်သူ့ကာကွယ်ရေးတပ်ဖွဲ့(PDF)များက တိုက်ခိုက်ခဲ့ပြီးနောက် သုံးခွဘက်မှနေ၍ ခရမ်းမြို့သို့ စစ်ကူများပို့လျှက်ရှိသည်။
Public Service Announcement
လက်ရှိတွင် သုံးခွမြို့နှင့် (၈)မိုင်ခန့်သာဝေးသည့် ခရမ်းမြို့အဝင်အား စစ်ကောင်စီဘက်မှ လုံခြုံရေးတင်းကြပ်ထားပြီး ကားနှင့်ဆိုင်ကယ်များအပါအဝင် ခရီးသွားဝင်ရောက်ခွင့် ပိတ်ပင်ထားသည်။
ယနေ့နံနက်က စစ်ကောင်စီတပ်၏ ရိက္ခာတင်ကားနှစ်စီး မိုင်ဆွဲတိုက်ခိုက်ခံရသည့်နေရာသည် ခရမ်း-သုံးခွ-သန်လျင်လမ်း မိုင်တိုင် ၄၄/၇ အနီး တိုက်ခိုက်ခံရခြင်း ဖြစ်သည်။
