အာဏာသိမ်းစစ်ကောင်စီလက်အောက်မှ အကျင့်ပျက်တရားရေးဝန်ထမ်း ၃၂ ဦးကိုဝန်ထမ်းအဖြစ်မှ ထုတ်ပစ် လိုက်ပြီး ပြည်သူ့သစ္စာဖောက်ဝန်ထမ်းများအဖြစ် အမည်ပျက်စာရင်း ထုတ်ပြန်လိုက်ကြောင်း အမျိုးသားညီညွတ်ရေးအစိုးရ(NUG) တရားရေးဝန်ကြီးဌာနကကြေငြာသည်။
ပြည်ထောင်စုတရားလွှတ်တော်ချုပ်ရုံးမှ အမြဲတမ်းအတွင်းဝန် ဦးကိုကိုနိုင်အပါအဝင် ၁၈ဦးနှင့် တိုင်းဒေသကြီးနှင့်ပြည်နယ် တရားလွှတ်တော်မှ ညွှန်ကြားရေးမှူး ၁၄ဦးကို သစ္စာဖောက်ဝန်ထမ်းများအဖြစ် အမည်ပျက်စာရင်းကြေငြာကြောင်း ယနေ့ ထုတ်ပြန်ခြင်းဖြစ်သည်။အထက်ပါ တရားရေးဝန်ထမ်း ၃၂ဦးသည် မတရားဖမ်းဆီးခံထားရသည့် ပြည်သူများ၏အမှုများအပေါ် တရားစီရင်ရေးဆိုင်ရာ စီမံခန့်ခွဲမှုများတွင် အဓိကတာဝန်အရှိဆုံးဖြစ်သည်ဟုလည်း ထုတ်ပြန်ချက်တွင်ဖော်ပြထားသည်။
“အာဏာဖီဆန်ရေးလှုပ်ရှားမှု (CDM) ဆောင်ရွက်နေကြသည့် ဝန်ထမ်းများအပေါ် ဖိနှိပ် အရေးယူခြင်းများ နှင့် အပြစ်မဲ့ ပြည်သူများအပေါ် ဥပဒေနှင့်ညီညွတ်ခြင်းမရှိသည့် အမိန့်များချမှတ်နေသည့် တရားသူကြီးများအား တရားစွဲဆိုဆောင်ရွက်သွားမည်ဖြစ်ကြောင်း တစ်ပါ တည်း သတိပေးလိုက်သည်”ဟု ကြေငြာချက်တွင်ပါရှိသည်။
စစ်ကောင်စီ၏ လက်အောက် ဆက်လက်တာဝန်ထမ်းဆောင်နေခြင်းသည် တရားသူကြီးများထားရှိရမည့် ကျင့်ဝတ်သိက္ခာများအား ဖောက်ဖျက်ကျူးလွန်သည့် အကျင့်ပျက်တရားသူကြီးများအဖြစ် သမိုင်းမှတ်တမ်းတင် ကျန်ရစ်နေမည်ဟုလည်း Non CDM တရားရေး ဝန်ထမ်းများအား သတိပေးထားသည်။
Public Service Announcement
ထို့အပြင်တရားသူကြီးများအနေဖြင့် ပြည်သူ့ဘက်မှရပ်တည်၍အာဏာဖီဆန်ရေးလှုပ်ရှားမှု (CDM) အား အချိန်မီ လုပ်ဆောင်နိုင်ရန်လည်း တရားရေးဝန်ကြီးဌာန
က ယခုအချိန်ထိ ဆက်လက်ဖိတ်ခေါ်ကမ်းလှမ်းလျှက်ရှိကြောင်း အသိပေးထားသည်။
NUG၏တရားရေးဝန်ကြီးဌာနက CDMတရားရေး ဝန်ထမ်းများကို စုစည်း၍ မြန်မာနိုင်ငံလုံးဆိုင်ရာပြည်သူ့တရားရေးဝန်ထမ်းများအဖွဲ့အစည်းကို ဖွဲ့စည်းထားသည်။မြန်မာနိုင်ငံလုံးဆိုင်ရာပြည်သူ့တရားရေးဝန်ထမ်းများအဖွဲ့အစည်းက တရားရေးဌာနCDMဝန်ထမ်းများအားထောက်ပံ့ရေးနှင့် တရားရေးဆိုင်ရာ ကိစ္စရပ်များကို ဆောင်ရွက်နေသည်။
