ယမန်နေ့ (ဒီဇင်ဘာလ ၂၄ရက်)ည ၉နာရီခွဲအချိန်က စစ်ကိုင်းမှရွှေဘိုသို့ ဦးတည်ထွက်ခွာလာသည့် နောက်ပိုင်းမိုးကာအုပ်ထားသောစစ်ကောင်စီထောက်ပို့ ၁၂ဘီးကား ယာဉ် ၁စီးကို စစ်ကိုင်းမြို့နယ်အတွင်း ရွှေဘို-မန္တလေးလမ်းမပေါ် သိမ်ချောင်းမြောက်ဘက် သားပျောက်ကုန်းလမ်းခွဲအနီးတွင် ပြည်သူ့ကာကွယ်ရေးတပ်ဖွဲ့၊စစ်ကိုင်းခရိုင်တပ်ရင်း(၁)က တပ်စုက မိုင်းဆွဲတိုက်ခိုက်ခဲ့ခြင်းဖြစ်ကြောင်း စစ်ကိုင်းမြို့နယ် သတင်းမှန်ပြန်ကြားရေး၏ ထုတ်ပြန်ချက်တွင် ဖော်ပြသည်။
မိုးကာအုပ်ထားသည့် ကားနောက်ပိုင်းကို မိုင်းထိမှန်ခဲ့ပြီး ကားအတွင်း လိုက်ပါလာသည့် စစ်ကောင်စီတပ်သားများ၏ အော်ဟစ်သံများထွက်ပေါ်လာခဲ့ကြောင်း၊ မိုင်းဆွဲတိုက်ခိုက်ခံရမှုကြောင့် စစ်ကောင်စီတပ်သားများသေဆုံးမှုရှိနိုင်ပြီး တပ်သားအတော်များများ ထိခိုက်ဒဏ်ရာရသွားကြောင်း၊ ထို့အပြင် ဝက်လက်မြို့နယ် ဒေါင်းဧကရာဇ်တပ်ဖွဲ့ကလည်း အဆိုပါ စစ်ကောင်စီထောက်ပို့ယာဉ်ကို မိုင်းဆွဲတိုက်ခိုက်ခဲ့ပြီး တူမီးသေနတ်များဖြင့် ဝိုင်းပစ်ခဲ့ကြသည့်အတွက် စစ်ကောင်စီတပ် အထိနာသွားကြောင်း ထုတ်ပြန်ထားသည်။