အာဏာသိမ်းစစ်ကောင်စီက မတရားပုဒ်မတပ်ပြီး ထောင်ဒဏ်သုံးနှစ်ချခံထားရသည့် နာမည်ကျော် သရုပ်ဆောင် ပိုင်တံခွန်သည် TC Candler က ရွေးချယ်သည့် ၂၀၂၁အတွက် ကမ္ဘာ့အချောဆုံးအမျိုးသားဆု ရရှိခဲ့ကြောင်း အဆိုပါအဖွဲ့က ထုတ်ပြန်အသိပေးထားသည်။
ပိုင်တံခွန်သည် ဟောလိဝုဒ်၊ ဘောလိဝုဒ်နှင့် K-Pop အနုပညာရှင်များကို ကျော်ဖြတ်၍ ဆုရရှိခဲ့ခြင်း ဖြစ် သည်။
ဆုကြေညာသည့် ဗီဒီယိုဖိုင်တွင် ပိုင်တံခွန်ကို နိုင်ငံရေးအကျဥ်းသားအဖြစ်မှ လွတ်မြောက်ရန်လည်းဆု တောင်းပေးထားသည်ကိုလည်း တွေ့ရသည်။
TC Candler က ၂၀၂၁ အတွက် အချောဆုံးအမျိုးသားဆုရှင် ၁၀၀ ကို ယနေ့နံနက်ပိုင်းတွင် ကြေညာခဲ့ခြင်း ဖြစ်သည်။
အဆိုပါရွေးချယ်မှုကို ကမ္ဘာတစ်ဝှမ်းရှိ နာမည်ကြီး အနုပညာရှင်များ ပါဝင်ပြီး ပိုင်တံခွန်က နံပါတ် ၁ နေရာကိုရရှိခဲ့ခြင်း ဖြစ်သည်။ ပိုင်တံခွန်သည် ၂၀၂၀ ကလည်း အဆိုပါစာရင်းတွင် ပါဝင်ခဲ့ဖူးပြီး အဆင့် နံပါတ် ၁၀ ရရှိခဲ့သည်။
ပိုင်တံခွန်ကို အာဏာသိမ်းစစ်ကောင်စီက မတရားပုဒ်မ ၅၀၅-က ဖြင့် ယမန်နေ့တွင် အလုပ်ကြမ်းနှင့်ထောင်ဒဏ်သုံးနှစ်ချမှတ်ခဲ့သည်။
ပိုင်တံခွန်သည် စစ်တပ်အာဏာသိမ်းချိန်ကစပြီး ပြည်သူနဲ့အတူ ရပ်တည်၍ ဆန္ဒပြသည်ဆိုကာ အာဏာသိမ်းစစ်ကောင်စီက ပြီးခဲ့သည့် ဧပြီအတွင်းဖမ်းဆီးထိန်းသိမ်းခဲ့ခြင်း ဖြစ်သည်။
TC Candlerသည် ဖျော်ဖြေရေး ဝက်ဆိုဒ်တစ်ခုဖြစ်ပြီး ၁၉၉၀က စတင်၍ အထက်ပါဆုရွေးချယ်ခြင်းကို နှစ်စဥ်ပြုလုပ်ခဲ့ခြင်းဖြစ်သည်။