ချောင်းဦးမြို့နယ်အစပ်တွင် အကြမ်းဖက်စစ်ကောင်စီတပ်ကို မိုင်းဆွဲတိုက်ခိုက်ရာ စစ်ကောင်စီတပ်သား ကိုးဦးသေဆုံးကြောင်း ချောင်းဦးမြို့နယ် ပြည်သူ့ကာကွယ်ရေးတပ်ဖွဲ့က ထုတ်ပြန်သည်။
ယနေ့(ဒီဇင်ဘာ ၃၀ ရက်)တွင် စစ်ကောင်စီတပ်ဖွဲ့ဝင်များသည် ပွိုင့်ကားတစ်စီး နှင့် ကားကြီးတစ်စီးတို့ဖြင့် ချောင်းဦးမြို့နယ် ကျေးရွာများကို ဝင်ရောက်စီးနင်းရန် နံနက် ၇ နာရီခန့်တွင် ဝပ်ကျင်းများမှ ထွက်လာခဲ့သည်ဟု ဆိုသည်။
ထို့နောက် အကြမ်းဖက်စစ်ကောင်စီယာဥ်တန်းသည် ပုံမှန်လမ်းကြောင်းဖြစ်သည့် ချောင်းဦး-အမြင့်လမ်းကို အသုံးမပြုဘဲ မြို့တွင်း ကြားလမ်းများမှတစ်ဆင့် မြို့စပ်သို့ ရောက်ရှိလာသည်။
ထို့နောက် မြို့အစပ်တွင် ကားများပေါ်မှ ဆင်လာသည့် စစ်ကောင်စီတပ်ဖွဲ့ဝင်များသည် ခြေလျင် စစ်ကြောင်း ထိုးရန် ပြင်ဆင်စဥ် စောင့်ဆိုင်းနေသည့် ပြည်သူ့ကာကွယ်ရေးတပ်ဖွဲ့၏ မိုင်းဆွဲခြင်းကို ခံခဲ့ရသည်။
Public Service Announcement
ချောင်းဦး ပြည်သူ့ကာကွယ်ရေးတပ်ဖွဲ့၏ ထုတ်ပြန်စာအရ စစ်ကောင်စီတပ်သားငါးဦးမှာ နေရာတွင် သေဆုံးပြီး လက်မောင်းရင်းမှ ပြတ်ထွက်သွားသည့် တစ်ဦးအပါအဝင် ၂၀ ဦးခန့် ဒဏ်ရာရရှိခဲ့သည်ဟု ဆိုသည်။
အကြမ်းဖက်စစ်ကောင်စီ၏ သေဆုံးထိခိုက်ခဲ့သည့် တပ်သားများကို ကားကြီးတစ်စီးပေါ် ပြန်လည်တင်ဆောင်ပြီး နောက်ချန်ကင်းအဖြစ် ခြေလျင်လိုက်ပါသူ စစ်သားခုနှစ်ဦးကို ထပ်မံမိုင်းဆွဲခဲ့ရာ လေးဦးသေဆုံးပြီး သုံးဦး ဒဏ်ရာရရှိခဲ့ကြောင်း ချောင်းဦး PDFက ဆိုသည်။
ထို့အပြင် ချောင်းဦး-အမြင့်လမ်းနှင့် ရေစကြိုချောင်းဦး လမ်းပိုင်းများကို သွားလာခွင့် ခေတ္တ ပိတ်ထား ကြောင်းလည်း ပြည်သူ့ကာကွယ်ရေးတပ်ဖွဲ့များက ယနေ့ နံနက်ပိုင်းတွင် အသိပေးထားသည်။
