ဒူးပလာယာခရိုင် တပ်မဟာ(၆)နယ်မြေ ဝင်းရေးမြို့နယ်အတွင်း ခရီးသွားလာခွင့်ကို အချိန်ကန့်သတ်ပိတ်ပင်လိုက်ကြောင်း KNU က ထုတ်ပြန်သည်။
ဇန်နဝါရီ ၂ ရက် ရက်စွဲပါ ထုတ်ပြန်စာအရ ယခုလက်ရှိ နိုင်ငံအတွင်း မတည်ငြိမ်မှုများကြောင့် ဝင်းရေးမြို့နယ်အတွင်းရှိ ပြည်သူများနှင့် ခရီးသွားပြည်သူများသည် အန္တရာယ်များ မဖြစ်စေရန် ည ၇ နာရီ မှ နံနက် ၆ နာရီအထိ ခရီးသွားလာခွင့်မပြုဟု အသိပေးသည်။
အရေးပေါ်ကိစ္စရပ်များရှိလာပါက သက်ဆိုင်ရာတာဝန်ရှိသူများထံ အကြောင်းကြားထောက်ခံချက်ရယူရမည် ဖြစ်သည်။
ထောက်ခံချက်မရှိဘဲ ခရီးသွားလာပါက ပြဿနာ တစ်စုံ တစ်ရာရှိလာပါက တာဝန်ယူဆောင်ရွက်သွားမည်မဟုတ်ပါကြောင်း ထုတ်ပြန်ချက်တွင် ဖော်ပြသည်။
Public Service Announcement
ဇန်နဝါရီ ၁ ရက်တွင် ဝင်းရေးမြို့နယ် ကျားမီးတိုကျေးရွာအပြင်ဘက်နှင့် ခုံခံကျေးရွာ၊ နို့ဝါးဆူ့ လမ်းမကြီးတွင် အကြမ်းဖက်စစ်ကောင်စီတပ် နှင့် KNLAတို့ တိုက်ပွဲ ဖြစ်ပွားထားသည်။
အကြမ်းဖက်စစ်ကောင်စီတပ်မှ ဝင်းရေးမြို့နယ်တွင် တပ်ချိန်းမှုများနှင့် စစ်ရေးလှုပ်ရှားများ ပိုမိုလှုပ်ရှားဆောင်ရွက်လျှက်ရှိကြောင်း ဒူးပလာယာခရိုင် သတင်းနှင့်ပြန်ကြားရေးက ထုတ်ပြန်ထားသည်။
